IMBAAQOOMI 2 - Qullaawa Maxaafa

¹ «Shaete aana fule uurreemmo. Hakkiicho hee're Maganu yaannoerenna abbooshshi'yara qolannoe dawaro agadheemmo» yii.

MAGANU IMBAAQOOMIRA QOLINOSI DAWARO

² Maganuno, «Leellisheemmohe ajuuja borreessi. Saleedu aana leeltanno gede assite xawisse borreessi.

³ Himanu wo'manno yanna di"iillitino. Ikkirono himanu wo'manno yanna rakke dagganno; kuni coyino kapho ikke digatanno. Keeshshannoha ikkiro nafa keeshshino gedeenni digatanno. Halaalintanni kuni barri dayikkinni digatannona cincite agari.

⁴ Sokkano, ‹Wodana mokkookku haxawarrira hee'rate hexxo dinosi. Keeraanchu kayinni amma'natenni heeshsho afi'ranno› » yitannote.

BUSHU MANNI UWANNO GARA

⁵ Jiro manna dogganno. Jirote hagaaggannori boonaleeyyete. Mitto darga difooliishshidhanno. Insa waammate gedee hafuuraammaati; reyote gede ikkinonke diyitannoreeti. Gobba horritannohunna manna qafaddannohu kunniraati.

⁶ Qafadantinori qafaddinonsare, «Manni jiro gamba assidhinannirira ki'nera aanne'e! Liqiissitinoonniriwiinni wolqatenni adhitine jiro duu'nitinannihu mamari geeshshaati?» yitanno.

⁷ Asalaasine assitine qarrissinanninsari hedeweelcho ka'e ki'neno asalaasine assite qarrissanno'ne. Ki'neno insa angara higginanni.

⁸ Ki'ne lowo gosa jajja gudhitinoonni. Gattinori qolte badote ki'ne mulqidhanno'ne. Kuni ikkannohu, ki'ne lowo manni mundee duntine, gobbate aana noo mannanna katamma baala beebba assidhinoonni daafiraati.

⁹ Beebbatenni gamba assidhinoonni jiro mine wonshidhinoonniri, dano iillitanno'nekki gede mine tullote aana mi'nitinoonnirira ki'nera aanne'e!

¹⁰ Xagarrotenni lowo manna shitine, mini'ne manna shollinyeho tugginoonni. Umi'nerano bao abbidhinoonni.

¹¹ Mine mi'nitinoonni kinna nafa ki'nera alba higge raartanno. Tuuqqano giddo heedhe guruursitanno.

¹² Katama bunshetenni xintidhinanniriranna mannu mundeenni mi'nitinannirira ki'nera aanne'e!

¹³ Wo'manka Dandaanno Magani mannu loosi'rinore giiramanno gede, gosa daafurtanno daafurono mullare asse aguranno.

¹⁴ Wayi baaraho wo'minohu gede, Kaaliiqi ayirrinye afano baatto wo'mitanno.

¹⁵ Teedisi mulqameenna la"attora yite olliichikkira dimbanno gede assate kaajjado ago hayikkisattohura atera aanne'e.

¹⁶ Atino agge dimbite gaggawatto; atino badokkira ayirrinyu darga shollinye uddi'ratto. Kaaliiqi qorichu finiincho cingiishshi'ratto gede assannohe; ayirrinyikkino shollinyeho soorramanno.

¹⁷ Libaanoosi assi'rootto beebba ateno amaddannohe; saada gudakkino masissannohe. Kuni ikkannohu manna shootto daafira, gobbanna katamma, qolteno giddonsa noore baala gudootto daafiraati.

¹⁸ Hanni misile makaa'litanno? Misile mannu anganni bonce seekkinoonnite. Misiletewiinni kapho agurranna mittoreno diafi'nanni. Boce seekkino manchira mittoreno coyi'ra dandiitannokki misile amma'na makaa'litannosi?

¹⁹ Haqqe bonce seekkinoonniricho «Baqqi yii!» Kincho soonfe seekkinoonniricho, «Kai!» yaattohura atera aanne'e! Misile mittono go'lino coye kulte affannoni? Misile birranna culka aanaho xalline seekkinoonnite ikkinnina foolu giddo dinoote.

²⁰ Kaaliiqi kayinni Qullaawu Minisi giddo no. Kunnira mannu baalu isi albaanni sammi yoo.