IBIRAAWOOTA 4 - Qullaawa Maxaafa

¹ Kunnira, isi aannonketa fooliishshote gobba eate afi'noommo hexxo xaa geeshsha noo daafira, ki'ne giddonni ayino fooliishshote gobba eate wolqa hoogannokki gede, baalunku waajjatenni agadhino.

² Dancha Duduwo insa macciishshitu gede, ninkeno macciishshinoommo. Insa macciishshitino qaale ammanatenni adhitinokki daafira, dikaa'linonsa.

³ Maganu loosi kalqe kalaqi yannanni kayise loosame goofinoha ikkiro nafa, isi, «‹Ani eemmonsata fooliishshote gobba horontanni die'anno› yee hanqi'yanni xaaroommo» yiino. Ninke amma'ninoommori kayinni, Maganu aannonketa fooliishshote gobba e'neemmo.

⁴ Qullaawa borro giddo mitto darga lamalki barri daafira, «Maganu loososi baala gude lamalki barra fooliishshi'ri» yine borreessinoonni.

⁵ Aleenni hakko darganni, «Ani eemmonsata fooliishshote gobba horontanni die'anno» yaanno.

⁶ Balaxxe fooliishshonniha Dancha Duduwo macciishshitinori hajajama giwansanni, Maganu aannonsata fooliishshote gobba die'ino. Ikkirono, hakkiira e'ara fajjinoonninsari mitu mitu manni no.

⁷ Balanxe yinoonnite gede, «Techo, huurosi macciishshitiniro, wodana'ne dilleessitinoonte!» yee, Maganu lowo yanna gedensaanni Daawiti widoonni qole coyi'rino qaalinni, «Techo» yine coyi'noonni barri hirqamino daafira buuxamino.

⁸ Iyaasu fooliishsho uyinonsaha ikkoommero, Maganu galagale, «Techo» yee wolu barrire dicoyi'rino.

⁹ Maganu mannira, Maganu fooliishshi'ri barrite gedee fooliishsho gatte noonsa.

¹⁰ Maganu loosisinni fooliishshi'rinonte gede, Maganu aannosi fooliishshowa eannohu loosisinni fooliishshi'ranno.

¹¹ Kunni daafira, ayino hakko mannita hajajama giwansa ha'runse uwannokki gede, Maganu fooliishshowa eate jawaanto.

¹² Maganu qaali lubbo afi'rinohonna loosannoho; lamu afii bisenni roore iibbinoho; lubbonna ayyaana, mikitanna qoe bada geeshsha raqqe e"e qasanno. Wodanu giddo noo hedonna yorto fonqole yoo yaanno.

¹³ Maganu albinni go'lanno kalaqami mittuno dino. Isi illera baalunkuri xawoho reqecci yee leellanno; ninkeno xa'mannonke coyira dawaro qolleemmohu isiraati.

YESUUSI QEESOOTU QARAATI

¹⁴ Kunnira, gordo fulinoha jawa Qeesootu Qara Maganu Beetto Yesuusa afi'noommo daafira, noonke yineemmo amma'na duu'ne cu'mi'no.

¹⁵ Cubbo agurranna ninke gede baalu coyinni fonqolaminohu Qeesootu Qari noonke. Isi wolqanke anjera kaa'le afannokkiha di"ikkino.

¹⁶ Maaro adhatenna hasiissanno yannara kaa'litannonke elto afi'rate, elto noowa ayirradu Maganu barcimiwa ruxxi yinummokkinni shinqo.