IBIRAAWOOTA 12 - Qullaawa Maxaafa

MAGANU OOSOSI SEEJJANNO

¹ Bati'ru gomichu gede doyissitinonketi tini baala naqaashshe noonke. Kunni daafira, duha ikkannonkere baalanna aananke qa'manno cubbo hunne, albankeenni noo qolchanshora cincatenni jawaante dondo.

² Amma'nanke umonna gawalo ikkinohu Yesuusi aaninni ille'ne hooltinoonte. Isi albasiinni noo hagiirri daafira yee, shollinye waajjikkinni masiqalu aana ree, ayirradu Maganu barcimira qiniiteenni ofollino.

³ Kunnira, wolqa ba'inikkinninna hexxo mudhitinikkinni, cubbaataammu baalu gibbannasi cincinoha Yesuusa qaagge.

⁴ Ki'ne cubbu ledo sharramatenni, xaara mundee'ne du'nantanno gede ikkitine digaarantinoonni.

⁵ Maganu oososi gede asse, «Beetto'ya, Kaaliiqi seejjo mishshooti! Rufannohe woyiteno wolqa ba'ooti!

⁶ Kaaliiqi baxannoha seejjanno; beettosi ikkinoha baala qorichishanno» yee seejjino'ne seejjo habbinoonni.

⁷ Maganu oososi gede asse seejjanno'ne daafira, qorichasi cincitine adhe; annu qorichishannokki beetti nooni?

⁸ Ilate gede qoricha adhannokkihu, baanaho ikkinnina ila di"ikkino.

⁹ Wole widoonni, qorichishshannonketi iltino annuwa noonke; insano ayirrinsoommo. Hatto ikkina, lubbotenni hee'rate ayyaanunni Anna ikkinonkehura roorsine mayira dihajajammeemmo?

¹⁰ Iltinonke annuwa shiimalla qorichishinonke. Maganu kayinni qullaambesi gutammeemmo gedenna ninkera seyara yee qorichishannonke.

¹¹ Qorichu yannasira yaachishannota ikkinnina dihagiirsiisanno. Gedensaanni kayinni rosino mannira keeru giddo wo'minoha keeraanchimmate guma laalannonsa.

¹² Kunnira, shaqqitinota anga'nenna daafurtinota gulubba'ne jawaachishidhe.

¹³ Miicantinoti hurtanno gede ikkinnina, darginni ka'e faatantannokki gede lekka'nera taalo doogo seekkidhe.

MAGANU COYI'RANNA GIBBOOTI

¹⁴ Mannu baalu ledo keere hee'ratenna qullaawoota ikkate jawaatte! Qullaambe nookkiha ayino Kaaliiqa la"a didandaanno.

¹⁵ Ki'ne giddonni ayerano Maganu elto xe'annokki gede qorophe! Mereero'ne qaraaranno rumushshi mu're qarrisanno'nekki gedenna lowo mannano batteessannokki gede qorophe.

¹⁶ Foorannohu gede woy mittu woyiti sagalera yee bayirreenyesi hirihu Eesawu gede maganiweelo ikkinohu giddo'ne hee'rannokki gede qorophe.

¹⁷ Gedensaanni Eesawu maasso galagalche qo'lara hasi'reenna gimboonnisita affinoonni; hattenne maasso qo'late hururame wi'le nafa diafi'rino; gaabbeno qo'la didandiino.

¹⁸ Ki'ne Israeelete gede angatenni amandannihuwa woy buwannohuwa Siina Ilaaliwa di"iillitinoonni; guunjonniwa, tunsichunniwanna hombobolattete,

¹⁹ woy xurumbu luuliwa woy coyi'nanni huuro macciishshinanniwa di"iillitinoonni. Mannu Maganu huuro macciishshe, tenne lede wole qaale coyi'rannonsakki gede huucci'rino.

²⁰ «Saada nafa ilaala kissuro, kinnatenni ganne shinona» yitanno hajajo ayirritinonsa daafira duha didandiitino.

²¹ Illete leeltino ikkito lowo geeshsha waajjishshannota ikkitinohura, Muse nafa, «Ani waajjoommo; huxi'roommo» yiino.

²² Ki'ne kayinni Tsiyooni Ilaaliwa dagginoonni. Kumu kumi sokkaasine hagiidhitannowa Heeshshote Magani katama gordu Yerusaalame dagginoonni.

²³ Su'mansa gordoho borreessinoonniriwa bayirraaddu songo ammanaanonnitewa, wo'munkura yoo yaanno Maganiwanna guuta assinoonni keeraanowa gamba yitinoonni.

²⁴ Haaru gondoorira mereerima ikkinohuwa Yesuusiwa, Aabeeli mundeenni roore woyyino coye coyidhannotewa winxoonni mundeewa shiqqinoonni.

²⁵ Coyi'rannohura gara gibbinannikki gede qorophe. Uullate aana coyi'reenna gibbinori gattinokkiha ikkiro, gordoho hee're coyi'rannohura badhe wodhine hiitto ikkine ganteemmo?

²⁶ Hatte yannara huurosi baatto shaffino. Xa kayinni, «Baatto calla ikkitukkinni, layinkimeeshsho gordono shafeemmo» yee coyi'rino.

²⁷ Kuni, «layinkimeeshsho» yaanno qaali, shafamannokki coyi kaajje hee'rannotanna shafamannohu woy kalaqamino coyi ba"annota malaatisanno.

²⁸ Kunnira, ninke shafamannokki gashshoote ragi'neemmo daafira Magano galaxxineemmo. Hagiidhanno garinni ayirrinyunninna waajjatenni magansi'nosi.

²⁹ Maganinke ittanno giiraati.