IBIRAAWOOTA 11 - Qullaawa Maxaafa

AMMA'NA

¹ Amma'nate yaa hexxotenni agadhinoonni coye hawaqi'ratenna, illete leellinokki coyeno buuxi'rate yaate.

² Albi manna janjoonnihu amma'nansanni kainohunniiti.

³ Kalqe Maganu qaalinni kalaqantinota anfeemmohu ammanatenniiti. Kunni daafira leellanno coyi baalu leellannokki coyiwiinni dayinoha ikkinota anfoommo.

⁴ Aabeeli, Qaayeelita roortino kakkalo Maganoho shiqishinohu amma'natenniiti. Maganu Aabeeli kakkalo hagiidhe adhi yannara, Aabeeli amma'nasinni kainohunni keeraa'minota farci'noonni. Aabeeli reyirono, amma'nasi widoonni hige xaano coyi'ranni no.

⁵ Heenooki reyo amaddusikkinni gordo ha'rinohu amma'natenniiti. Maganu haa'rinosi daafira dianfoonnisi. Haa'rasira albaanni Magano hagiirsiisinota farci'noonni.

⁶ Amma'na nookkiha Magano hagiirsiinsara didandiinanni; mayira yiniro, Maganunniwa shiqqi yaanno manchi Maganu nootanna iso hasi'ranno mannirano ba'raa'ra aannota ammana hasiissannosi.

⁷ Illetenni leellinokki coyi're Maganu balaxe qorophisiise kulisi yannara Nohi Magano waajjatenni minisi manna gatisara markaawe seekkinohu amma'natenniiti. Amma'natenni alamete so'rose leellishino; amma'natenni afi'nanni keeraanchimmano ragi'rino.

⁸ Abirihaami Maganu albillitte aasira hexxo uyinosi gobba ha'rate woshshami yannara, ha'rannowa afa hoogirono ha'rate, hajajame fulinohu amma'natenniiti.

⁹ Isi gede uyinoonninsa hexxo ragidhannori Yisihaaqinna Yaiqoobi ledo, hexxote gobbara wosincho ikke dukkanu giddo hee'rinohu amma'natenniiti.

¹⁰ Hatto ikkinohu, jawaata safoha Maganu akeekinohanna minino katama agadhe noo daafiraati.

¹¹ Saarano hexxo uyino Magani ammanaminoha ikkinota affino daafira, lowo geeshsha geedhitinohura ila dandiitannokkita ikkiturono, godowate wolqa afidhinohu ammanatenniiti.

¹² Kunni garinni, reyino manchi gede assine hendoonnihu Abirihaami, gordu beeddahenna baaru shaafi gede kiirre dandiinannikki manna ilino.

¹³ Kuri baalu amma'nite heedhe reyitino. Maganu uyinonsa hexxono diafidhino. Ikkollana xeertote heedhe la'e, afidhinohu gede assite hagiidhite adhitino; tenne gobbara wosinanna manni gobba manna ikkitinota ammantino.

¹⁴ Hattoo coye coyi'ranno manni umisi gobba agadhe nooti xawoho.

¹⁵ Hattenne agurte fultanno gobba qaaggannoha ikkoommero, hakkiira higa dandiitanno.

¹⁶ Xa kayinni roore gordoho noo gobba halchitanno. Kunnira Maganu katama qixxeessinonsa daafira, «Maganonke» yite woshshidhannosita difokkanno.

¹⁷ Abirihaami fonqolami yannara Yisihaaqi kakkalote shiqishinohu amma'natenniiti. Hexxote qaale adhinohu afi'rinoha mitto beettosi kakkalanno gedeeti.

¹⁸ Maganu, «Sirchikki sirannohu Yisihaaqi widoonniiti» yiinosi.

¹⁹ Abirihaami, Maganu reyotenni kayisannota egenne agadhino daafira, Yisihaaqi reyotenni kainohu garinni galagale afi'rino.

²⁰ Yisihaaqi albillitte ikkara noori daafira, Yaiqoobinna Eesawu maassi'rinohu amma'natenniiti.

²¹ Yaiqoobi reyanno yanna iillituta, Yooseefi ooso maassi'rinohu amma'natenniiti. Siqqicho siqqi're hee're Magano magansi'rino.

²² Yooseefino reyanno yanna iillituta, Israeelootu Gibitsetenni fultannota coyi'rinohunna miqichosi hiissa hasiissannonsaro kulinonsahu amma'natenniiti.

²³ Muse anninna ama Muse ilami waro xuma ikkinota affino daafira, mootete hajajo waajjitukkinni sase agana maaxxinosihu amma'natenniiti.

²⁴ Muse lophihu gedensaanni, «Feriooni beetto beettooti» yinannisita giwinohu amma'natenniiti.

²⁵ Kunnira cubbunni afi'nannihunni yannate geeshshi hagiirrinni roore Maganu manni ledo qarra adha doodhi.

²⁶ Albillitte adhara noo ba'raa'ra buuxe laino daafira, Gibitsete jironni roore Kiristoosi daafira mishama roore jiro ikkitinota hedi.

²⁷ Mootete hanqo waajjikkinni Gibitsete gobba agure fulinohu amma'natenniiti. Illete leellannokki Magano afinohu gede asse hede noowa kaajje hee'ri.

²⁸ Bayirraadda ooso shaanno sokkaasinchi Israeelennita bayirraadda ooso shaannokki gede yine Mararrote Kakkalo mundee wixate woga wonshinoonnihu amma'natenniiti.

²⁹ Israeelootu moola baatto aanaanni ha'rannohu gede ikkite, Duumo Baara fultinohu amma'natenniiti; Gibitsete mannino hatto assara wo'naali yannara, baalunku itante gattino.

³⁰ Israeelootu lamala barra gaangaabbuhu gedensaanni kinchunnihu Iyyaarkote huxxi uwinohu amma'natenniiti.

³¹ Gunnitte Reaabi dooyyitannore haadhe gashshitinonsa daafira, hajajantannokkiri ledo ba'ukkinni gattinohu amma'natenniiti.

³² Hakkiinni sae wole ma yeemmo? Gedewoonirenna Baaraaqire, Samisonirenna Yofitahere, Daawitirenna Saamueelire, himanaanonnireno odeessate yanna ajjinoe.

³³ Insa amma'natenni mootoolla qeeltino; dagano taashshite gashshitino. Uyinoonninsata addi addi hexxono afidhino; doobbiyu afoono cuffino.

³⁴ Giirate wolqano xoyissitino; bisete qarinnino gatte fultino; wolqate anje afidhinori jawaattino; olahono wolqaataamma ikkitino; diinu olantono shorritino.

³⁵ Meentu reyinohu fiixinsa reyotenni kaeenna afi'rino. Wolootu roore kao afi'rate yite, fafisidhe hee'ra gibbe gawajjante reyitino.

³⁶ Mito qacifantanni gannoonninsa; woloota cagaagetenni usurre usuru mine tungoonninsa.

³⁷ Kinnatenni gannoonninsa; magaazetenni darroonninsa; bisetenni shinoonninsa; ge'reewunna meu lande uddidhe ka'anna kawa raataabbino; buxxe, gadadantenna hawaaxante heedhino.

³⁸ Halallitte gobbaranna gaarrate raataabbino; goddatenna ballate giddo heedhino. Tini gobba insara maltinota di"ikkitino.

³⁹ Kuri baalu amma'nansa daafira janjoonnire ikkiturono, uyinoonninsa hexxo xaara diafidhino.

⁴⁰ Maganu ninkera woyyanno coye hedinonke; kunnira, insa ninke ledo ikkinnina calluwinsa guuta manna ikka didandiitino.