HOOSEI 9 - Qullaawa Maxaafa

HOOSEI ISRAEELETE DAANNO QORICHI DAAFIRA HIMANI

¹ Israeelete manna! Ayyaanna dagate garinni ayirrisa agurre. Kuneeti Magani'newiinni baxxitine ayiddaannase agurte foortanno mancho gede ikkitinoonni. Atoote uyitanno'neha laweenna, Maganoho uyinanni ayirrinye kaphu magannara uyitinanni, ayiddumme baalate foorrete looso loossinoonni.

² Kunni daafira, kunni ka'a ayiddumme'nera gidu, kooffichi'nerano woyinete xajje horonta diheedhanno. Woyinete kaashshi'neno guma diaanno'ne.

³ Israeelete manni Kaaliiqi uyinonsa baattora dihee'ranno; baxikkinni Gibitse higanno. Asoori mare seerunni hoolloonni sagale itanno.

⁴ Hakkiichono Kaaliiqira woyinete xajje shiqishate woy kakka'late didandiitanno. Tini kakkalote sagale wi'late qaera intannite gedeete; tenne sagale itannohu baalu lagaawanno. Insa hude hoo'late ittannote ikkinnina, Qullaawu Minira shiqinshannita di"ikkitino.

⁵ Hatto ikkina, Kaaliiqi ayirrinyira dirunni ayirrinsanni ayyaannara ma"assita ikka?

⁶ Baotenni gattara xooqqanno woyite, Gibitsootu gamba assite Memfiisi madaartannonsa. Duu'nitinoti birru jiro baala ishine uddidhe gattanno; galtanno mini giddono utunna kokko'lu fulanno.

⁷ Kuneeti qorichu barri dayino; mittu mittunku loosisi guma itannohu yoote barri iillino. Israeelete manni konne baalanka coye afo! Cubbi'nenna diinoomi'ne batinyinni himanaancho balala, ajuuja afi'nohano macharaaraamu gede assitine kiirtinanni.

⁸ Isi ledo hee're mannasi qorophisiiseemmo gede Maganu ane Hoosei himanaancho asse soyinoe. Ikkollana mareemmo base baalantera ceate gede woshshaaddine amaddinaera hasidhinanni. Maganu mine nafa mannu himanaanote diina ikkino.

⁹ Gibia Katami manni assinte gede, ki'neno lowo geeshsha battaabbinoonni. Kunni daafira, Maganu cubbo'ne baala kiire qorichishanno'ne.

ISRAEELETE CUBBI XAANXAANA

¹⁰ Kaaliiqi, «Anera, Israeele afi'ra'ya, halalli gobbara laalinoha woyinete guma afi'rate gedeeti. Akaakka'ne afi'rummo warono, birrate umira laalinoha balasate guma afi'rate geeshsha hagiidhoommo. Ba"aali-Fegoori daggu woyite kayinni, Ba"aalira kumbuultino. Insano, hakkunni baxxannohu kaphu magani gede tiyyi'nannire ikkitino.

¹¹ Israeelete manni ayirrinyi, ceate gede buuwe ba"anno. Kunni ka'a ila diheedhanno; godowano diheedhanno; godowuno digatanno.

¹² Ooso ilte lossidhuro nafa, baalanka qoome gudeemmo daafira, ilaweeloota ikkite gattanno. Mulinsanni fafeemmo yannara insara aanne'e!» yii.

¹³ Israeele dancha baattora kaansoonni saatticho labbanna afoommo. Xa kayinni uminsa ooso gorrantanno dargira haadhe hadhino.

¹⁴ Mooticha ballo, konne manna ma"assittoro woyyanno? Godowa kisidhannorenna moolu unuunire assinsa.

KAALIIQI YOO ISRAEELETE AANA

¹⁵ Kaaliiqi, «Galgalaho heedheennanni, bushu loosinsa reqecci yiino. Anino hakkiichinni kayise insa giwoommo. Loossinohu bushu loosinsa daafira, oommonsa baattonni fushsheemmonsa. Kunni ka'a insa dibaxeemmo. Sooreeyyensa baalanti haxawarroota ikkitino.

¹⁶ Israeelete manni bubbe gantinohu, rumushsho moolinohunna laalannokki haqqi gede gumiweelo ikke gatanno. Ooso ilturo nafa, lowo geeshsha baxxannota ilansa sheemmo» yii.

HOOSEI ISRAEELETE DAAFIRA KULINO HIMANA

¹⁷ Isira hajajantinokki daafira, Magani'ya wigidiide tugannonsa; insano dagate mereero raataabbanni heedhanno.