HOOSEI 5 - Qullaawa Maxaafa

¹ «Ki'ne qeesootu konne macciishshe! Ki'ne Israeelete mannino wodanche! Ki'ne mootoollate minino konne coye macciishshe! Kuneeti yoo aana'ne daggino; kaimuno, Mitsipha woshshaadote gede, Taaboori Ilaalirano qoxu gede ikkitinoonni.

² Haxawarrootu manna shaa batissino; kunnira baalanka qorichisheemmo» yii.

HOOSEI KAPHU MAGANO MAGANSI'RATE DAAFIRA WORINO QOROWO

³ Israeelete gara egennoommo; anewiinni go'litara didandiitanno. Kaphu magano magansi'ratenni battaabbinohura, ane magansi'rate ammanantinore di"ikkitino.

⁴ Israeelete manni assino sao Maganinsawa higgannokki gede ittissinonsa. Kaphu magani ayyaani foorrennihunni amadantino. Kunninni kainohunni Kaaliiqa afa qarra ikkitinonsa.

⁵ Israeelete mannira uminsa adawarshi naqqasannonsa. Cubbinsano guficho ikke tugannonsa; Yihudu mannino insa ledo gufi're uwanno.

⁶ Kaaliiqira kakkaltara ge'reewonna lalo gante massitanno. Kayinnilla Kaaliiqi insawiinni baxxino daafira diafidhannosi.

⁷ Kaaliiqira ammanantinore ikka hoogansanni kaphu magano magansidhanni darchu aani ooso iltino. Kunnira xa Aganu Leellanno yannara insano baattonsano mitteenni ba'anno.

YIHUDUNNA ISRAEELETE MEREERO KA"ANNO OLA

⁸ Olaho fultanno gede Gebaooni buudu xurumbi luulo, Raama siwiilu xurumbi luulo macciishshiishshe. Beetiaweeni, «Biiniyaami ga're! Ate ledo hee'noommo» yitinanni raarre.

⁹ Qorichu barri daanno yannara, Israeelete gobbara mitturino gatikkinni shakki yee goofanno. Kuni coyi Israeelete aana ikkikkinni gatannokkita egensiiseemmo.

¹⁰ Kaaliiqi, «Yihudu albisooti Israeelete danna diigge baattonsa adhitinohura, aara'ya insa aana lolahu gede dirriseemmo.

¹¹ Israeele mittore nafa aate dandiitannokkiriwiinni kaa'lo afi'rate insawa alba higgino daafira, shetto amaddinonsa. Uminsa amado ikkitino baattono hooggino.

¹² Kunnira bile imaana, daanillu gide hunannohu gede asse ani Israeelenna Yihuda huneemmo.

¹³ «Israeeli dhiwamasi, Yihudu madi'rasi afi woyite, Israeeli albasi Asoori widira higi. Kaa'lo afi'rate jawiidi mootewa manna soqqi. Kayinnilla isi gatisansara woy madansa hursara didandiino.

¹⁴ Kunninni kainohunni Israeele doobbiichu gede, Yihudano aju doobbiichi gede ikke hiiqqaqqe agureemmo. Hawulukki asse haa're ha'reemmonsa; ayino gatisansara didandaanno.

¹⁵ «Loossino sao egente anewa higga geeshsha insawiinni horonta fafe ha'reemmo. Assitino saonni qarru bati'rinsaro, miteekkite hasidhannoeha ikkanno» yii.