HOOSEI 4 - Qullaawa Maxaafa

KAALIIQI ISRAEELE ABBOOSHSHI'RI

¹ Kaaliiqi, tenne baattora hee'ranno manna baala abbooshshi'rino. Kunni daafira Israeele, isi yaannohere baala macciishshi! Isi, «Baattote aaninni ammanama, baxillunna ane Kaaliiqa egenna ba'ino.

² Xaarte e'ino gondooro diigge kaphitanno; shitanno, moortanno, foortanno; manna shaano batidhino.

³ Kunninni kainohunni baattote aana moolle dagganno. Aanase hee'rannori baalu goofanno. Saada ceanna baaru giddo qulxu'mi baalu reyanno» yiino.

KAALIIQI QEESOOTA ABBOOSHSHI'RI

⁴ Kaaliiqi, «Ani ki'ne qeesoota abbooshshi'reemmo daafira, mannu mimmito abbooshshi'roonke; ku'u ko'onne bushiishoonke.

⁵ Hashshanna barra babbaattitinanni; himanaanono ki'ne gede babbaattitannore ikkitino. Kunni daafira ama'ne Israeele huneemmo.

⁶ Manni'ya egenno hooge baino; ki'neno ane habbinoonnie daafira, anino qeesoota ikkitine soqqantinaera dihasi'reemmo'ne. Hajajo'ya shotissinoonninna habbinoonni daafira anino ooso'ne haweemmo.

⁷ «Ki'ne qeesootu kiiro'ne batidhu deerrinni, cubbi'ne ane albaanni bati'rino. Kunni daafira ayirrinye'ne mulqe shollisheemmo'ne.

⁸ Manni'ya cubbi ki'nera jiro ikkino'ne daafira, mannu cubbo lede loosara hasidhinanni.

⁹ Ki'ne qeesootuno callichu manni gedeere ikkitinoonni. Kunni daafira, hakko mannira iillanno qorichi ki'nerano iillanno. Bushu loosi'ne gumano ittinanni.

¹⁰ Wole maganna hoode ha'rate yitine ane Kaaliiqa agurtinoonni daafira, ittinannillana diduubbinanni. Kaphu maganna mine martine foortinannillana ooso di"iltinanni» yii.

KAALIIQI WOLE MAGANSI'NANNITA DIBAXANNO

¹¹ Kaaliiqi, «Foorre, galonna haaro woyinete xajje manni'ya wodana huntino.

¹² Kunni daafira haqqunni seekkinoonniha kaphu magano mala xa'midhanno. Kiilu siqqichonsano hasidhinore kultannonsaha lawannonsa. Foorrete ayyaaninni massagante Maganuwiinni faffino.

¹³ Ilaallate aana kakka'litanno; tulluwate aana hixaana giirtanno. Jajjabbanna caaffaame haqqe danchu caali noote hundano, kunni gari kakkalo shiqishshanno. Kunninni kainohunni seenninsa baashaawanno; oosonsa seennino fooranno.

¹⁴ Ikkollana seenni'ne baashaawannoha, ooso'ne seennino foorannoha ikkino daafira, diqorichisheemmonsa. Hatto asseemmokkihu, ki'ne labballu umi'ne galmuwate fooranno meenti hoode hadhinanni, insa ledo wole maganna magansidhinoonni. Wodancha nookki gosa ba'anno.

¹⁵ «Ki'ne Israeelete manni anera ammanama gibbinirono, Yihudu manni tenne sao giddora eanno gede assitinoonte. Kunnira ane magansidhinara Galgala woy Beetiaweeni hadhinoonte. ‹Kaaliiqi Halaaleeti› yitineno su'mi'yanni xaartinoonte.

¹⁶ Israeelete manni aggawarra adde gede maahoyye giwino. Hatto ikkina, Maganu insa hiitto asse ge'reewu goodanni gede danchu qanchira hosiisansara dandaanno?

¹⁷ Israeelete manni kaphu magano magansi'ratenni amadamino daafira, hasi'rinore assona agurre.

¹⁸ Lowota woyinete xajje agguhu gedensaanni foorrensa suffanno. Roorrootinsano saalsiisanno coye assa baxxanno.

¹⁹ Tenne bunshensanni kainohunni, bubbe fiite haadhe hadhannohu geeshsha faffe hadhanno; kaphu magannara kakkalansanni saalfattanno.