HOOSEI 2 - Qullaawa Maxaafa

¹ Kunni daafira labballo roduuwa'ne Israeeloota, Aami yiiyye. Meya roduuwa'ne, Ruhaama yitine woshshensa.

ISRAEELETE MANNI GOMEERI GEDE FOORAHO

² Ooso'ya ballo, kunni ka'a ama'ne galte'ya ikka hooggurono, anino ayiddaannase ikka hoogummorono, «Eeggatena foorakkinna baashaawakki aguri» yitine seejjese.

³ Higa hoogguro kayinni, imaanase mulqe ilantu barri gede mullicho asse agureemmose. Moola baatto gede asseemmose; wayi goo'rono shitannose.

⁴ Saalu nookkiti foora mancho iltinore ikkitino daafira, oososeno dimarareemmo.

⁵ Amansa foora ikkitino daafira, insa shollaataamu garinni godobbino. Konne coye assitinohuno, «Ella'yawa ha'reemma; insano sagalenna waa, ge'reewu ordanninna shaalado shalonni gannoonni imaana, ejersu zayitenna woyinete xajje uyitannoereeti» yitino daafiraati.

⁶ Kunni daafira doogose utunni cufeemmo. Fultanno furcho afidhannokki gede gangaawase kinchunni huxxeemmo.

⁷ Ellase hoode doddanno; kayinnilla di"iillitanno. Jawaatte hasidhannonsa; kayinnilla diafidhanno. Hakkunni gedensaanni, «Xaa heeshshonni albiti woyyitannoe. Kunni daafira albi ayiddaanni'yawa higeemma» yitanno.

⁸ Ise gide, woyinete xajje, ejersu zayite oommosehu ane ikkoommota diwodanchitino. Ani batise oommose birranna culka Ba"aalira uyitino.

⁹ Kunni daafira gide gamba assinanni woyite oommoseha gidenna woyinete xajje qole angasenni adheemmo. Uddidhara oommota ge'reewu ordanninna shaalado shalonni gannoonni uddano mulqe hooleemmose.

¹⁰ Ellase albaanni mullicho asse agureemmose; anga'yanni gatisannosehu dino.

¹¹ Hagiirrise ayyaanna baala, Fooliishshote Barra, Aganu Leellanno Ayyaananna wole ayyaannase uurriseemmo. Amma'note xaadiseno hee'rannokki gede asseemmo.

¹² Ellasera bisose uyite afidhinota woyinete laalosenna balasete haqqese buqqise huneemmo. Woyinenna balasete haqqe fultannowa hoxxete soorre, moyichu galannota asseemmo.

¹³ Ba"aalira hixaana giirtara yite, irrase wodhite ellase hoode hadhara ane agurtino daafira qorichisheemmose. Kaaliiqi konne coye coyi'rino.

KAALIIQI MANNASI BAXANNO GARA

¹⁴ Kunnira xaano halallitte gobba haa're masseemmose; hakkiichono baxillu qaalinni dogisiiseemmose.

¹⁵ Albiha woyinete kaashsho qoleemmose. Qarru Lagichino Hexxote Waalcho ikkannose gede asseemmo. Hakkiichono Gibitsete gobbanni fultu waro seennimmate yannara baxxue garinni qolte baxxannoe.

¹⁶ Qolteno, Ayiddaanna'ya yitannoeta ikkinnina kunni ka'a, Ba"aali yite diwoshshitannoe.

¹⁷ Kunni ka'a Ba"aali yinanni su'ma gantara wore diagureemmo; higgeno qaaggannokki gede asseemmo.

¹⁸ Hatte yannara manni'ya ledo gondooro e"eemmo. Moyichunna allaatte manna'ya gawajjitannokki gede asseemmo. Hattonni bagado baala baattote aaninni hooleemmo. Biseno maxxuno horonta dihee'ranno. Manni'ya harshammi yee keerunni hee'ranno gede asseemmo.

¹⁹ Israeele, ani ayiddaama'ya assi'reemmohe; halaalaanchonna ammanamoommoha ikkeemmohe. Bagamannokki baxillinni baxeemmohe; hegerera galte'ya assi'reemmohe.

²⁰ Gondooro'yano agare galte'ya assi'reemmohe; atino ani Kaaliiqa ikkoommota afatta.

^21-22 Hatte yannara manni'ya Israeelete huuccatto macciishsheemmo; xeenano baattote dirranno gede asseemmo; baattono gide, woyinennitanna ejersu laalo aatenni, Iyiziraeelira dawaro qoltanno.

²³ Manna'yano baattote aana wixeemmo; duroo'mitanno gedeno asseemmonsa; «Maaro nookkireeti» yinoonnire maareemmonsa. «Manna'ya di"ikkitinoonni» yinoonnire, manna'yaati yeemmonsa. Insano, «Ati Maganonkeeti» yitannoe.