HOOSEI 14 - Qullaawa Maxaafa

HOOSEI ISRAEELE KAALIIQIWA HIGGANNO GEDE WOXARATI

¹ Israeelete manna! Magani'ne Kaaliiqiwa higge; sarraaqe tugino'nehu umi'ne cubbo ikkinota affe.

² Maganunniwa higgine, «Cubbonke baalanka agurinonke; dancha heeshshonkenni hagiidhi. E'noommo gondoori garinni suumenke laalcho galatanke shiqishi'neemmohe.

³ Kaaliiqa! Annanna ama shiidhino buxi atenni maaro afidhanno. Asoori digatisannonke; olu faradono diaddaxxineemmo. Kunni ka'a angankenni seekki'noommota kaphu maganna, ‹Magannankeeti› yine diwoshshi'neemmo» yitine aagintaabbe.

KAALIIQI ISRAEELETE HAARO HEESHSHOTA HEXXO UYINSA

⁴ Kaaliiqi, «Manni'yata ammana hoogansa hurse, anewa qoleemmonsa. Wo'mu wodaninni baxeemmonsa; hanqo'yano insawiinni fafiseemmo.

⁵ Israeelete mannira xeenu gede ikkeemmonsa. Insano daraarchu gede biiffanno; Libaanoosi daguwi gede rumuxxitanno.

⁶ Mu'rinsa lophe latanno; ejersu haqqi gede biiffanno. Libaanoosi dubbi gede, tanni yite su'niitanno.

⁷ Galagalte higge caali'ya hunda heedhanno; gidu mu'ri gede ikkite lattanno. Woyinete kaashshi gede daraartanno; Libaanoosi woyinete xajje gede egennantinore ikkitanno.

⁸ Israeelete mannira kunni ka'a, kaphu maganna ledo mittu xaadino dihee'rannonsa. Ani huuccattonsa macciishsheemmo; towateemmonsa. Lattino haqqicho gede ikkeemmonsa; laalono anewiinni afidhanno» yii.

GUMULSHA

⁹ Egenno afi'rinohu baalu konne coye buuxo; wodana afi'rinohu baalu konne coye wodancho. Kaaliiqi doogo suwashshote; aanaseenni higge keeraano hadhanno; cubbaataammu kayinni gufidhanno.