HOOSEI 13 - Qullaawa Maxaafa

KAALIIQI ISRAEELETE YIINOTA GUMULOTE YOO

¹ Efireemi ga're Israeelete mannira aliidita ikkite noo waro, coyidhanna macciishshituri baalu huxidhanno. Gedensaanni kayinni Ba"aalira kumbuulatenni cubbo loossino daafira gooffino.

² Xaano cubbu aana cubbo loossanni no. Uminsara birra daashshite siittu misillanni kaphu maganna seekkidhe kumbuultino. Tenne angatenni seekkinoonnitera siittu misillara, «Amme kakkalo shiqishshe; sunqensa» yitanno.

³ Kunninni kainohunni insa guto guunjo gede ikkite ba'anno; soodo loji gede ikkite giggiltanno. Ayiddummete aaninni hombobolatte fiite kayissanno kuri gede woy minu giddoonni higge fulte gooffanno wiliile gede ikkitanno.

⁴ Kaaliiqi, «Gibitsete gobbanni fushshummo'nehu ani Kaaliiqi Magano'neeti; ane agurranna wolu Magani dino'ne. Gatisaanchi'neno ane callaati.

⁵ Moolle batidhino halallittera towatummo'nehu aneeti.

⁶ Kayinnilla hattenne dancha gobba iillitini yannara, ittine duubbine lowo geeshsha boo'nitinoonni; aneno habbinoonni.

⁷ Kunninni kainohunni hiiqqanno doobbiichi gede ikkeemmo'ne; doogote rie agare sianno dagunchi gede ikkeemmo'ne.

⁸ Qallosi ba'eenna hasi'ranni noohu waajjishannohu dibi yinanni moyichi gede hedeweelcho daye bibbideemmo'ne. Hakko darga doobbiichu gede ikke egemmeemmo'ne; moyichu gede tattayiseemmo'ne.

⁹ «Israeelete manna! Ane kaa'laanchi'ne aana diinoomunni ka'inoonni daafira, anino ki'ne shakki asse gudeemmo.

¹⁰ Ki'ne mootenna gashshaano eemmo'ne gede xa'midhinoonnie. Gatisanno'ne mootenna golantanno'ne gashshaanono hanniyya?

¹¹ Hanqe mootoolla oommo'ne; ikkollana insa qole aari'yanni haa're hooloommo.

¹² «Israeelete cubbinna sao borreessineenna tajete mine duunante no.

¹³ Israeelete lubbotenni hee'rate hexxo noonsa. Kayinnilla ilamanno barri iillanno woyite amasi godowi goddonni fulara hasi'rannokki qaaqqi gede gowwoota ikkitino.

¹⁴ Kunni ka'a tenne gosa jeennaate dirratannokki gede assate dihasi'reemmo. Reyotewiinnino diwodeemmonsa. Kunnira reyo, qoomamakki haadhe abbi! Jeennaate, baokki haadhe amo! Kunni ka'a konne manna horonta dimarareemmo.

¹⁵ Israeeli roduuwisi giddo jawaata ikkirono, giirtannota soojjaati bubbe halallinni soyemmosi. Bu'asinna wayi ballasi mooshshitanno; umo afi'rino coye baalanka huntanno.

¹⁶ Samaariyu anera maahoyye giwino daafira qorichisheemmo; mannisino olunni reyanno. Qaaqquullu baattote aana cancanamanno; godowinni noorihu godowinsa dadhamanno» yii.