HIZIQEELI 9 - Qullaawa Maxaafa

YERUSAALAMETE QORICHISHAMA

¹ Hakkunni gedensaanni Maganu qoonqosi naggi asse, «Katama qorichishshinanniri ki'ne kawa gamba yiiyye. Hunannoha olu bagado adhitine amme!» yaanna macciishshoommo.

² Gobbaanni aliyye ragaanni Qullaawu Mini waalchinni 6 manni olu uduunne amade daanna afummo. Insa ledo waajjo shaalado uddano uddi're borreessinanniricho amadinohu mittu manchi no. Baalunku dagge camotenni seekkinoonnihu kakkalote dargi mule uurritu.

³ Hakkunni gedensaanni, Israeelete Magani ayirrinyi, ofolle noowiinni kirubeeli aaninni kae, Qullaawu Minira e'nanni xullicho mari. Maganuno waajjo shaalado uddano uddi're borreessinanniricho amadino mancho,

⁴ «Yerusaalamete katami baalaho kawanna ka'a higge ha'rami. Katamaho assinoonnihu tiyyi'nanni coyinni kainohunni, lowo geeshsha yaade dadillanni noo manni albi aana malaate wori» yiisi.

⁵ Galagaleno Maganu wole manna, «Ki'neno isi hoode katamu giddo kawanna ka'a hadhinanni manna shiiyye; mittoreno marartine gatissinoonte.

⁶ Meya labbaaha aja akkala yitinikkinni oosonte ledo baalanka shiiyye. Kayinnilla albisi aana malaatu noosiha ayeno kissinoonte; shaano kawiinni Qullaawu Mini'yanni hanaffe» yaanna macciishshoommo. Kunnira, hakko Qullaawa Mine uurrite noo albisootinni kayisse shaa hanaffu.

⁷ Maganuno, «Looso'ne rakkine hanaffe; Qullaawa Mine batteesse; nafarano reeshsha calla asse» yiinsa. Insano katamu giddo noo manna shaa hanaffu.

⁸ Shinanni yannara ani calli'ya hakkiicho noommo. Alba hige diriire uwe qoonqo'ya naggi asse, «Mooticha Kaaliiqa, Israeelete giddonni gattinore gudate Yerusaalamete kageeshshi geeshsha hanqootto?» yoommo.

⁹ Maganuno, «Israeeletenna Yihudu manni lowo geeshsha busha cubbo loosatenni sao assino; baatto baalate aana shaa batidhino. Yerusaalameteno maqqaallo batidhino. Qolteno, ‹Kaaliiqi gobbanke hawino; ninkeno la"a agurinonke› yitino.

¹⁰ Kunni daafira, dimarareemmonsa; digatiseemmonsa. Insa wolootu aana assitinore baala, qole insa aana abbeemmo» yee dawarie.

¹¹ Hakkunni gedensaanni, hakku waajjo shaalado uddano uddi're borreessinannire amadino manchi galagale daye, «Hajajoottoeha baala wonshoommo» yee Kaaliiqira coyi'ri.