HIZIQEELI 6 - Qullaawa Maxaafa

KAALIIQI KAPHU MAGANNA MAGANSI'NANNITA DIBAXANNO

¹ Kaaliiqi,

² «Koo manchi beetto, hakka Israeelete ilaalla widira higge himana coyidhanni,

³ ‹Israeelete ilaalla ane Maganu qaale macciishshe! Ani Mootichu Kaaliiqi coyi'reemmoha ilaalla, gaarra, boonnanna lagga baalu macciishshe! Alba hige, mannu kaphu magannara kumbuulanno darguwa baala diigeemmo.

⁴ Kakkalote darguwa baala diigantanno; hixaana giirranni uduunni baalu hiiqqaqqamanno. Hakkiicho noo manni, magansi'ranno maganna kaphunnite albaanni reyanno.

⁵ Israeelete mannihu reeshshinsa kaphu magannansa albaanni uwanno gede asseemmo. Miqqansano kakkalote darginsa qooxeessira billaalliseemmo.

⁶ Israeelete katamma baalanti co'o yite ba'anno; kakkalonsa darguwanna kaphu kakkalonsa baala hiiqqante butu yitanno. Hixaana giirranni uduunnino cancanamanno; seekkidhinori baalu co'o yee ba"anno.

⁷ Mannu darga baalaho reyanno yannara, lubbotenni noori kayinni ani Kaaliiqa ikkoommota affanno.

⁸ « ‹Shiima gorramatenni gatino manna kayinni, dagate mereero billaalliseemmo.

⁹ Kuni mannino hakko marino gobbara hee'ranno; hakko hee'ranno yannara ane qaaganno. Ani qorichishoommonsahunna shollishoommonsahu ammanantinokkire ikkitinohuranna ane agurte kaphu magannara soqqantino daafira ikkinota affanno. Assitino bunshenni kainohunni umonsa gibbanno.

¹⁰ Ani Kaaliiqa ikkoommotanna bao abbeemmo'ne yee cooyi'roommoti kapho ikkitinokkita buuxxanno› yiino yite kulinsa» yiie.

¹¹ Mootichu Kaaliiqi, «Israeelete manni assino bunshenninna shagaggi'nanni coyinni kainohunni, hudetenninna bagadunni goofanno daafira, umo cu'midhine gagaso ga'nitinanni bayisibao yitinanni hururantine wi'le.

¹² Fafowa noori dhiwante reyitanno; mule noorino bagadunni reyitanno. Hakkiinni gattannorino hudetenni gooffanno. Kunni garinni aari'ya aanansa qiidanno.

¹³ Kuni manni, gaarrate aana seekkinoonni dargi kakkalonnihura, ilaallate birxera jajjabbanna hala'lado caale afidhino haqqe hunda kaphu magannara hixaana giiranno. Kayinnilla, reeshshu kakkalote dargi mule uwe nooha la"anno woyite, ani Kaaliiqa ikkoommota afanno.

¹⁴ Halaaleho, anga'ya diriirse gobbansa huneemmo; wodiidoonni noo baatto moolatenni kayise, aliyye ragaanni Dibila katami geeshsha noo baatto mullicho asseemmo. Israeelootu heedhanno base baala co'o asse huneemmo; hatte yannara, ani Kaaliiqa ikkoommota mannu baalu afanno» yee coyi'rie.