HIZIQEELI 5 - Qullaawa Maxaafa

HIZIQEELI UMO MEEXXI

¹ Kaaliiqi, «Koo manchi beetto, gamaxantino bise haadhe, ereedakkinna umokki gudisse meexxi. Dananchokkino keenaasinchunni keente sasewa badi.

² Sasunni mitte anga doru bano cancanittohu gedensaanni banu giddo giiri. Layinki anga doru bani qooxeessira giggishshittohu gedensaanni murmuri. Sayikki anga qolte, bubbete aana finci; anino bise'yanni shorreemmo.

³ Qolteno, shiima danancho haadhe uddanokki qoolira wori.

⁴ Kunni aaninni shiima qi'miidde haadhe giirate giddo tugge, buwanno gede assi. Hakkiinni ka'anno giira Israeele baala iillitanno» yii.

⁵ Mootichu Kaaliiqi, «Kuneeti Yerusaalame lai! Gaangaawisera noo gobba baalate mereerima ikkitanno gede assoommose.

⁶ Yerusaalame kayinni, haxawarrite anera hajajama gibbe, qooxeessisera noo gosanni roore bushshino. Yerusaalame hajajo'ya mishshino; seera'yano wonsha gibbino.

⁷ Ki'ne Yerusaalamete manni, ani Mootichu Kaaliiqi yeemmo'neta macciishshe: Seera'yanna hajajo'ya wonsha giwatenni, gaangaawi'nera noo manninni roore qarra kalaqqinoonni. Wole gosa assitannore assitinoonni.

⁸ Kunni daafira, ani Mootichu Kaaliiqi diina ikkoommo'neta kulanni noommo'ne. Dagate gashshooti baalu la"anna qorichisheemmo'ne.

⁹ Giweemmo coye baala assitinoonni daafira, kunni albaanni asse egennoommokkinna, kunni ka'ano asseemmokki garinni qorichisheemmo'ne.

¹⁰ Kunni daafira, Yerusaalamete noo annuwinna amuuwi oosonsa ittanno. Oosonsano qolte annuwansanna amuuwansa ittanno. Kunni garinni ki'ne baalanka qorichisheemmo; gattinoreno shoolenta faro qole billaalliseemmo.

¹¹ «Kunnira, heeshshote Magano ikka'yanni ani Mootichu Kaaliiqi yeemmohu konneeti. Bunshenna batte wo'mitino coye baala assatenni, Qullaawa Mine'ya batteessitinoonni daafira, anino mararro nookkiha badhe wodhe giweemmo'ne.

¹² Manni'ne giddonni sasunni mitte anga, katamu giddo hudetenninna dhibbunni gooffanno. Sasunni mitte anga katamu gobbaanni bagadunni reyitanno. Gattinori sayikki anga shoolenka raga billaallitanno gede asse, bagadunni shorreemmonsa.

¹³ «Rabbisi're higammo geeshsha haniqi'yanna aari'ya baalu ki'ne aana qiidanno. Kuni baalu ikkanno yannara, ammanama hooga'nera hanqoommohu ani Kaaliiqa ikkoommota affinanni.

¹⁴ Qooxeessi'nera noo gosa affanno'ne yannara, bao'ne la'e oso'litanno'ne.

¹⁵ Hanqi'yanninna aari'yanni qorichisheemmo'ne yannara, qooxeessi'nera noo daga xontanni haariintanno'ne. Assoommo coyinni insano masse huxidhanno.

¹⁶ Sagale ho'le hudidhinanni gede asseemmo'ne. Hudeno ki'ne hunate olloonni maxxi gede ikkite gawajjitanno'ne.

¹⁷ Ooso'ne shaanno moyichonna hude soyemmo'ne; shaanno dhibba, dartenna ola kayiseemmo'ne. ‹Ani Kaaliiqi konne coye coyi'roommo› yiino yite kulinsa» yiie.