HIZIQEELI 48 - Qullaawa Maxaafa

BAATTO BEENKANNI GARA

¹ Baatto beeqqate kiirantinori aante nooreeti: Daani ga'rera aliyye dannira mittu qeechi hee'rannonsa. Kunino, Hetilooninni Hamaati massitanno doogo amade, hakkiinnino Hatsaari-Enaaninna Demaasiqoha aliyye gafa soojjaatinni galchimi geeshsha noohura danna ikkanno.

² Aseeri, soojjaatinni galchimi geeshsha Daani baattora aanannoha mitto qeecha afi'rino.

³ Nifitaalemi, soojjaatinni galchimi geeshsha Aseeri baattora aanannoha mitto qeecha afi'rino.

⁴ Minaase, soojjaatinni galchimi geeshsha Nifitaalemi baattora aanannoha mitto qeecha afi'rino.

⁵ Efireemi, soojjaatinni galchimi geeshsha Minaase baattora aanannoha mitto qeecha afi'rino.

⁶ Roobeeli, soojjaatinni galchimi geeshsha Efireemi baattora aanannoha mitto qeecha afi'rino.

⁷ Yihudu, soojjaatinni galchimi geeshsha Roobeeli baattora aanannoha mitto qeecha afi'rino.

MEREEROHO NOOTA QULLAAWA BAATTO

⁸ Kaaliiqi, «Aantanno baatto badante addi hajara ikkitanno. Tini baatto hojja, aliyyenni wodiidi geeshsha 12,500 qaafo ikkitanno. Godowa, soojjaatinni galchimi geeshsha noo danni wolootu ga're baatto ledo taaloho. Qullaawu Minino kunni qoqqowi giddo hee'ranno.

⁹ «Kunni qoqqowi mereero, hojja 12,500 qaafo, godowa 10,000 qaafo ikkino dargi anera badaminoha ikkanno.

¹⁰ Qeesootahono kunni qullaawu qoqqowi giddonni qeechu hee'rannonsa. Insa baattono, soojjaatinni galchimi geeshsha 12,500 qaafo, aliyyenni wodiidi geeshsha 5,000 qaafo ikkitanno. Kunni qoqqowi mereero, aneha Qullaawa Mine minnanni.

¹¹ Konne qullaawa qoqqowo, Saadooqi sircho ikkitino qeesootira uyinanni. Insa Leewi ilama gedenna wolootu Israeelooti gede ikkitukkinni, anera ammanamatenni soqqantinoe.

¹² Kunnira, insara Leewaawootaho uyinoonni qeechira aante baxxitino baatto heedhansara hasiisanno. Hakku dargino baalunkunni roore qullaawa ikkanno.

¹³ Leewaawootuno qeesootu qote hojja, 12,500 qaafo, godowa 5,000 qaafo ikkitanno baatto adhitanno.

¹⁴ Anera qoqqombanni baatto, baatto baalantenni roore seekkinota ikka hasiissanno. Iseno dibeenkannite, dihirrannite, disoorrinannite, woy diragisiinsannite. Ise anera badante qullaawa darga ikkitanno.

¹⁵ «Baxxino qoqqowinni beehame gatanno dargi hojja, 12,500 qaafo, godowa 2,500 qaafo ikkanno. Kuni dargi qullaawa ikkinokkihura wo'munku manniho. Mannu hakko hee'raranna baattono horoonsi'rara dandaanno; katamuno mereeroho hee'rona.

¹⁶ Katamuno 4 madde afi'rinoha ikkanna, mitte mittenti madde 2,250 qaafo ikkitanno.

¹⁷ Katamu gaangaawira noohu fanu dargi, 125 qaafo ikkanno.

¹⁸ Qullaawu qoqqowira wodiidoonni, soojjaato hojja 5,000 qaafo, godowa 2,500 qaafo, galchimaanni hojja 5,000 qaafo, godowa 2,500 qaafo gatinse katama minnihu gedensaanni gatannohu, mullu dargi katamaho hee'ranno mannira loosi'ranno darga ikkanno.

¹⁹ Katamu giddo hee'rannohu hiitte ga'rehano ikkona, baalunku hattenne baatto loosi'ra dandaanno.

²⁰ «Kunnira, baattote mereero bandoonni dargi qoqqowi mitte mittente madde hojja, 12,500 qaafooti. Kuni katamu minamino darga amadanno.

^21-22 «Qullaawa Mine qeesootu baatto, Leewaawootu qeechinna katamu darga amadino qoqqowira soojjaatoonninna galchimaanni nooti gattino baatto, roorre uyineenna noo gashshaanchita ikkitanno. Tini baattono soojjaatoonni soojjaati danninna galchimaannino Mediteraaniyu Baari geeshsha iillitanno. Qolteno Yihudu qeechira wodiidoonni Biiniyaami baattora aantanno.

YERUSAALAMETE WODIIDI GA'RE

²³ «Gattino ga'rera uyinoonnihu baattote beehachi aane nooho. Biiniyaami ga're, soojjaatinni galchimi geeshsha iillannoha mitto qeecha afidhino.

²⁴ Simiooni ga're, soojjaatinni galchimi geeshsha Biiniyaami baattora aane wodiidoonni nooha mitto qeecha afidhino.

²⁵ Yisaakoori ga're, soojjaatinni galchimi geeshsha Simiooni baattora aane wodiidoonni nooha mitto qeecha afidhino.

²⁶ Zaabilooni ga're, soojjaatinni galchimi geeshsha Yisaakoori baattora aane wodiidoonni nooha mitto qeecha afidhino.

²⁷ Gaadi ga're, soojjaatinni galchimi geeshsha Zaabilooni baattora aane wodiidoonni nooha mitto qeecha afidhino.

²⁸ «Gaadihu wodiidi danni, Israeelete widiidi dannaati. Taamaari kataminni kae, wodiidi galchima Meriiba Qaadesi buicho geeshsha iillanno. Hakkiinnino Gibitsete baatto qasidhinowa amade Mediteraaniya Baara iillanno.

²⁹ «Israeelete ga're baalanti baatto kunni garinni beeqqitanno. Ani Mootichu Kaaliiqi konne coye coyi'roommo» yii.

YERUSAALAMETE WAALCHUWA

^30-34 Yerusaalamete katami 12 waalcho afi'rino. Shoolente maddeti kinchu huxxuwa mittu mittunku seendilli, 2,250 qaafooti. Mittu mittunku huxxira 3 waalchi noosi. Mitto mittonka waalcho, mitte mittente Israeelete ga're su'minni woshshinanni. Kunnira, aliyye ragaanni noo waalchuwa Roobeeli, Yihudunna Leewi su'minni woshshantanno. Soojjaati waalchuwano Yooseefi, Biiniyaaminna Daani su'minni woshshantanno. Wodiidi waalchuwano Simiooni, Yisaakoorinna Zaabilooni su'minni woshshantanno. Galchimi waalchuwa qolte Gaadi, Aseerinna Nifitaalemi su'minni woshshantanno.

³⁵ Shoolunku ragihu katamunnihu kinchu huxxi seendilli mitteenni, 9,000 qaafooti. Kunni ka'a katamu su'mi, «Kaaliiqi Konniicho No» yinanniha ikkanno.