HIZIQEELI 47 - Qullaawa Maxaafa

KAALIIQI MININNI FULTANNO BUICHO

¹ Hakku manchi qole Qullaawu Minira e'nanniwa haa're massie. Qullaawu Minira e'nannihu hundinni buicho fulte, Qullaawu Minira albaanni soojjaati widira higge lolakkanni no. Qullaawu Minira wodiidinni ka'e, kakkallanni darga sa'e soojjaatira higge lolakkanni no.

² Hakku manchino, aliyye waalchi ragaanni Qullaawu Mini qoqqowinni fushshe, soojjaatoonni noo waalcho gaangeesse haa're ha'rie. Waalchoho wodiidi ragaanni shiima buicho daaddanni no.

³ Hakku manchi amadino daabbinni soojjaatira hige ha'ranni noo waa ha'runse 500 qaafo bikki; aneno hakko wayi giddoonni hige saeemmo gede hajajie; wayino lekka'yata woriidi mikita amadi.

⁴ Qoleno 500 qaafo bikkeenna, wayi guluchu geeshsha amadie. Lede 500 qaafo bikkeenna, wayi hallu geeshsha amadie.

⁵ Hakkiinnino sae 500 qaafo bikki; hakku wayino lowo geeshsha diime ikkinohura, giddoonni hige sa"ammora dandeemmokkiho. Daanke fulliro ikkinnina fulle dianfanniho.

⁶ Manchuno, «Koo manchi beetto, konne la"attore baala seekkite wodanchi» yiie. Hakkunni gedensaanni, wayi qacce qole haa're ha'rie.

⁷ Hakkiira iillanni hee'renni, guranna qiniite qole laummota lowo haqqe leeltue.

⁸ Isino, «Kuni wayi baattote aana soojjaatira, Yordaanoosi lagichanna Reyote Baara hige ha'ranno. Reyote Baara hige ha'ranno woyite, Maxinete Baari haaroo'me dancha waa ikkanno.

⁹ Wayi ha'ranno darga baalaho addi addi saadanna batinyu qulxu'mi hee'ranno. Lolahanno wayi Reyote Baara e"e xalala assanno; ha'ranno darga baalaho heeshsho aanno.

¹⁰ Ayini-Gaadi Buichonni ka'e, Ayini-Egilayimi Buicho geeshsha nooti baaru qacce, qulxu'me amaddannori fooliishshidhannowaati. Insano hakkiicho woshshaadonsa haqqite mooshshidhanno. Mediteraaniyu Baari giddo noohu gedeehu, hakkono addi addi qulxu'mi no.

¹¹ Baaru qaccera noohu leephonnihunna kofote wayi mannu hakkiinni maxine adhanno gede soorramikkinni noowa hee'ranno.

¹² Lolahanno wayi qaccuwara guma intanni haqqe danu danunkunni no. Darono dimooltanno; laaltukkinni disa'anno. Qullaawu Mini hundinni lolahanno waa agganno daafira, aganu aganunkunni guma laaltanno. Tenne haqqe gumi sagale, daronsano mannaho xagicho ikkitanno» yiie.

BAATTOTE DANNA

¹³ Mootichu Kaaliiqi, «Tonaa lamenti ga're baatto beeqqitinanni yannara, Yooseefi ga'rera 2 qeechi iillanno; danninsano aane nooho.

¹⁴ Ani Akaakka'nera tenne baatto ragisiisate xaaroommo; xaano ki'ne baalunku taashshitine beeqqe.

¹⁵ «Aliyye danni Mediteraaniyu Baarinni kae, Hetilooni katama, Hamaati sa'nanniwa Tsedaadi katami geeshsha,

¹⁶ Demaasiqotenna Hamaati gashshooti mereero noori Berootanna Sibirayiimi katamma, Hawuraani gashshooti qaccera noohuwa Tikooni katami geeshsha iillanno.

¹⁷ Kunnira, aliyye danni Demaasiqotenna Hamaati qacce aliyye widira agure, Mediteraaniyaho soojjaatoonni Enooni katama iillanno.

¹⁸ «Soojjaati danni Demaasiqotenna Hawuraani gashshooti mereero noohunni mittu darginni kae, galchimaanni Israeele, soojjaatoonni Geleaadi nooha Yordaanoosi danna assi're, Reyote Baari mule noohuwa Taamaari Katami geeshsha iillanno.

¹⁹ «Wodiidi dannino Taamaarinni kae, wodiidi galchimi ragaanni Meriba-Qaadesi yinanni buicho iille, hakkiinnino aliyye galchimaanni Gibitsete qacce amade Mediteraaniyu Baari geeshsha iillanno.

²⁰ «Galchimi danni Mediteraaniyu Baara ikkeenna, aliyyeenni Hamaati sa'nanni dargi galchimihu geeshsha iillanno.

²¹ «Tenne baatto ga're'ne kiiro deerrinni beeqqe.

²² Hegere iqqano ikkito'nena; ooso ile giddo'ne hee'rannohura wole gobba mannira baatto beeqqitinanni yannara uminsa qeechi hee'ronsana. Israeelete ilama gede kiirreenna, baatto beeqqitinanni yannara insarano qeechu hee'ronsa.

²³ Israeelete gobbara hee'rannohu wole gobba manni, hee'ranno ga'rewiinni uminsa qeecha adhona. Ani Mootichu Kaaliiqi konne coye coyi'roommo» yii.