HIZIQEELI 46 - Qullaawa Maxaafa

ISRAEELETE GASHSHAANCHONNA AYYAANNA AYIRRINSANNI GARA

¹ Mootichu Kaaliiqi, «Giddoyidi nafarchira e'nannihu soojjaati waalchi, leyunku loosi'nanni barri giddo cufame keeshshona. Fooliishshote Barranna Aganu Leellanno Ayyaanira kayinni fa'namona.

² Qeesootu roorre uyinoonni gashshaanchi aannota gudinse giirrannitanna mittimmate kakkalo shiqishshanno yannara, gashshaanchu gobbayidi nafarchi waalchi mule nootera e'nanniwa noo kifile ragaanni hige eona. Waalchu mule noo tuuqqa mule uurrona; hakkiichono waalchoho albaanni magansi're galagale fulona. Waalchuno hawarra geeshsha cufama dihasiissanno.

³ Fooliishshote Barranna Aganu Leellihunni umi barra, mannu baalu waalchu ragaanni kumbuule ane Kaaliiqa magansi'rona.

⁴ «Gashshaanchuno Fooliishshote Barra gudinse giirranni kakkalora, muso afi'rinokkire 6 ge'reewu wilii'lenna 1 ge'rechu goco ane Kaaliiqira shiqishona.

⁵ Mittu mittunku ge'rechi ledo, 9 kiilo gide abbona. Hattono mittu mittunku wilii'lichi ledo, shiqishara hasi'rinoha wole fushshaateno oona. Mitte mittente kakkalo gidunnite ledo shiqinshannita 3 litire zayite abbona.

⁶ «Aganu Leellanno Ayyaanira, muso afi'rinokkire 1 middicha, 6 ge'reewu wilii'lenna 1 ge'rechu goco shiqishona.

⁷ Mittu mittunku middichinna ge'reewu gocca ledo, 9 kiilo gidu fushshaati shiqinshona. Ge'reewu wilii'li ledo shiqanno fushshaati, gashshaanchu aara hasi'rino deerrinni ikkona. Mittu mittunku gidu fushshaati ledo 3 litire ejersu zayite shiqqona.

⁸ Gashshaanchu konne baala assihu gedensaanni, waalchu mule nootenni hala'lado kifilenni fule, eino waalchi widoonni hige ha'rona.

⁹ «Aye ayyaani barrano mannu ane Kaaliiqa magansi'rara daanno yannara, magansi're kaihu gedensaanni, aliyye waalchi ragaanni hige eihu, wodiidi waalchi widoonni hige fulona. Wodiidi waalchi widoonni eihu, aliyye waalchi widoonni hige fulona. Aye manchino eino waalchi widoonni hige ikkikkinni, albaanni noohu wolu waalchi widoonni hige fulona.

¹⁰ Gashshaanchuno mannu eanno woyite e"e, fulanno woyiteno ledo fulona.

¹¹ Lowiddaannanna shiimmaadda ayyaanna ayirrinsanni barra, mittu mittunku woraaminna ge'rechu goci ledo 9 kiilo gidu fushshaate shiqinshona. Ane Kaaliiqa magansi'ranno manchi ge'rechu wilii'lichi ledo hedino geeshshi gide oona. Mittu mittunku gidu fushshaati ledo, 3 litire ejersu zayite shiqqona.

¹² «Roorre uyinoonnisi gashshaanchi, gudinse giirrannita ikkito, woy mittimmate kakkalo baxe umisinni Kaaliiqira aara hasi'riro, giddoyidi nafarchira e'nanniha soojjaati waalcho fannosina. Fushshaate Fooliishshote Barra shiqinshanni garinni oona; isi fule ha'rihu gedensaanni waalcho cunfona» yii.

BARRU BARRUNKUNNI SHIQINSHANNI KAKKALO

¹³ Kaaliiqi, «Soodo soodo muso afi'rinokkiha 1 diriha ge'rechu wilii'licho, gudinse shilqinshanni kakkalo assine anera shiqinshona. Kunni gari kakkalo barru barrunkunni shiqqona.

¹⁴ Hattono, 2 kiilo bullee, 1 litire zayite ledo liinse soodo soodo shiqinshona. Anera shiqinshannihu tenne kakkalo seeri disoorramannoho.

¹⁵ Togo yaano, ge'rechu wilii'lichi, bulleenna ejersu zayite kakkalo hegerera soodo soodo anera shiqqannote yaate» yii.

GASHSHAANCHU BAATTO DAAFIRA UYINOONNI SEERA

¹⁶ Mootichu Kaaliiqi, «Roorre uyinoonnisi gashshaanchi umisi qeecha ikkitino baattonni beehe oososi giddonni mittoho uyiro, umisite gede assine kiirreenna beettisira iqqasi ikkitanno.

¹⁷ Kayinnilla, roorre uyinoonnisi gashshaanchi umisi qeecha ikkitino baattonni bade soqqantannosiri giddonni mittoho uyiro, wondanni diri iillanno yannara galagalte gashshaanchoho higgosina. Umisita ikkitino daafira, baatto hegerera isitanna oososita calla ikka hasiissanno.

¹⁸ Roorre uyinoonnisi gashshaanchi, baatto mannuwiinni wolqatenni adha dihasiissannosi. Oososira beehanno baatto heedhuro, umisira iillino qeechi aaninni calla aa dandaanno. Kunni garinni iqqansa wolqatenni adhe manna'ya gadadisoonke» yee hajaji.

KAKKALOTE SAGALE QIXXEESSINANNI KIFILE

¹⁹ Hakku manchi wodiidi waalchi widoonni qole, aliyyera albaanni nootewa qeesootaho baxxite qullaawa ikkitino kifillawa haa're abbie. Tenne kifillara galchimaanni nooha mitto darga leellishanni,

²⁰ «Kuni dargi qeesootu cubbonna sao agursiisate kakkalora shiqinshanni maala gaffannowaatinna kakkalote shiqqanno bullee tima gantanno kifileeti. Kunni garinni mannaho gawajjo iillitannokki gede, qullaawa kakkalo giddonni haa'ne gobbayidi nafarchira difushshinanni» yiie.

²¹ Hakkunni gedensaanni, manchu gobbayidi nafarchira haa're abbe, shoolenta madde qole haa're ha'rie. Mitte mittenti madde shiima nafarcho afidhino.

²² Gobbaanni noo nafarchi maddera huxxinoonniti, hojja 20 qaafo, godowa 15 qaafo ikkinohu 4 taalu nafarchi no.

²³ Mittu mittunku nafarchira gaangaawaho kinchu huxxi noosi. Kinchu huxxira aanchine seekkinoonniti giirate darguwa no.

²⁴ Manchuno, «Tini baala Qullaawu Mini soqqamaano mannu kakkalote shiqishannore raissanno kifillaati» yiie.