HIZIQEELI 45 - Qullaawa Maxaafa

KAALIIQIRA BANDOONNI BAATTO

¹ Baatto mitte mittente ga'rera beekkinanni yannara, mittu qeechi anera baxxinoha ikkona. Baattono hojja 12,500 qaafo, godowa 10,000 qaafo ikkitanno. Tini baattono qullaawate.

² Kunni qoqqowi giddo noo dargi hojja, 250 qaafo, godowa 250 qaafo Qullaawu Minira ikkitona. Kunni qoqqowi gaangaawira hala'linye 25 qaafo ikkannohu fanu dargi hee'ranno.

³ Kunni qoqqowihu daratu godowa, 12,500 qaafo, hojja 5,000 qaafo ikkanno. Kuni dargino, wo'munkurinni roore qullaawa ikkinohu Qullaawu Mini minamannowaati.

⁴ Qullaawa Mine Kaaliiqira soqqantara doorantino qeesootira badame gobbate giddo qullaawa qoqqowo ikkanno. Kunino, qeesootu heedhanno minnanna Qullaawu Minira hendoonni qoqqowo baala mitteenni amadanno.

⁵ Wolu gatino qoqqowi Qullaawa Mine addi addi soqqanshora worroonni Leewaawootira iqqa ikkanno. Insa heedhanno katammano hakko minnanni. Kuni dargi hojja, 12,500 qaafo, godowa 5,000 qaafo ikkanno.

⁶ Qullaawu qoqqowinni aane noohu kuni dargi hojja, 12,500 qaafo, godowa 2,500 qaafo ikkanno. Kuni dargi Israeelete gosa baalannihonna Yerusaalamete katami noowaati.

GASHSHAANOTE UYINOONNI QEECHA

⁷ Manna gashshannohura wole darga qixxeessa hasiissanno. Kunino qullaawu darginna katamu qoqqowi galchimi danninni kayise, galchimi ragaanni Mediteraaniyu Baari geeshsha soojjaati danninni Israeelete qacce geeshsha iillanno. Hojjano Israeelete ga're giddonni mitte ga'rera uyinanni qeechi geeshshiha ikkanno.

⁸ Kuni qoqqowi Israeelete gashshaanchira iqqa ikkanno. Hakkiinni sae manna okka dihasiissannosi; gattino baatto baala Israeelete ga'rera agura hasiissannosi.

GASHSHAANCHU WONSHA HASIISSANNO SEERA

⁹ Mootichu Kaaliiqi, «Ki'ne Israeelete gashshaano seeda yanna cubbo loossinanni keeshshitinoonni. Xa kayinni beebbanna gadadishsha agurre; suwashshonna taalo ikkino coye asse. Manni'ya layinkimeeshsho baattote aaninni shorramanno gede assitinoonte. Konne coye kuleemmo'nehu ani Mootichu Kaaliiqaati.

¹⁰ «Mittu mittunku manchira halaalaanchu keenaasinchinna taashshanno safaraasinchi hee'rosi.

¹¹ «Moolare efa yinanni bikkaasinchinni bikkinanni; du'namannoricho baati yinanni bikkaasinchinni bikkinanni. Mittu homeri yinanni bikkaasinchi 10 efanna 10 baati ikkanno.

¹² «Mereerimu deerri bikki'nehu, seqeli deerrinni ikkona. Mittu seqeli 20 gerahi ikkona. Leyawu seqeli 1 minaani ikkona.

^13-15 «Fushshaate shiqishshinanni garino aane nooho: Gamba assidhinanni qamadenni leyawunni mitte anga, hayixunni, leyawunni mitte anga gate'ne nootenni ejedhete zayitenni xibbunni mitte anga uyitinanni. (Baatinni bikkiniro, tonnu baati mitto homeri woy mitto koori ikkanno.) «Lamu xibbi Israeelete ge'reewi giddonni, mitte anga uyitinanni. Kunni baalu ledo cubbo agursiisate gidu kakkalo, shilqote kakkalora ikkitannotanna mittimmate kakkalora hasiissanno saada uyitinanni. Ani Kaaliiqi konne coye hajajoommo.

¹⁶ «Israeelete baattora hee'ranno manni baalu, konne gashshaanchoho masse aanno.

¹⁷ Gashshaanchu loosino aane nooho: Shilqote kakkalora ikkitanno saada, gidu fushshaatenna woyinete fushshaate Israeelete mannira Aganu Leellanno Ayyaanira, Fooliishshote Barranna wole ayyaanna barra qixxeessanno. Hattono Israeelete manni cubbo agursiisate, kakkalote ikkitannotanna gudinse giirrannita mittimmate kakkalo shiqishanno» yiie.

AYYAANNA AYIRRINSANNI GARA

¹⁸ Mootichu Kaaliiqi, «Umi agani eihunni umi barra, muso afi'rinokkiha 1 middicha kakkaltine Qullaawa Mine keereensitinanni.

¹⁹ Qeesichu tenne cubbo agursiisate kakkalloonni mundee aaninni shiima haa're, Qullaawu Mini tuuqqa, kakkalote darga shoolenta maddenna giddoyidi nafarchira e'nanniwa noo tuuqqara gananno.

²⁰ Ayino hedikkinni woy afa hoogatenni loosino cubbi baalaho, aganu eihunni lamalki barra togo assitinanni. Kunni garinni Qullaawa Mine qullaawa assitine agartinanni.

²¹ «Umi agani eihunni tonaa shoolki barra, Mararrote Ayyaana ayirrisa hanaffinanni. Konne ayyaana ayirrissinanni woyite, 7 barri geeshsha shiishinokki tima ittinanni.

²² Ayyaanaho umi barra roorre uyinoonnisi gashshaanchi umisihanna mannu cubbo agursiisate 1 woraamo kakkalote qixxeessanno.

²³ Ayyaana ayirrinsanni barruwara, mitto mittonka barra muso afidhinokkire 7 boottanna 7 ge'reewu gocca, shilqote kakkalora Kaaliiqira haa're abbona. Kunni garinni, mitto mittonka barra cubbo agursiisate kakkalora ikkannoha 1 meichu goco haa're abbona.

²⁴ Mitto mittonka bootonna mitto mittonka ge'rechu goco kakkalanno yannara, mitto mitto efa gidenna 3 litire ejersu zayite ledo shiqishanno.

²⁵ «Lamalki agani eihunni tonaa ontikki barra, ayirrinsannihura Daasu Ayyaanira gashshaanchu lamalunku barrinni mitto mittonka barra, mittu garita cubbo agursiisate kakkalonna gudinse shilqinshannita mittu gari kakkalo shiqishanno. Gidunna zayitete kakkalono hakko garinni shiqishanno» yii.