HIZIQEELI 44 - Qullaawa Maxaafa

CUFAME HEE'RANNOHA SOOJJAATI WAALCHO

¹ Hakku manchino Qullaawu Mini qoqqowira soojjaati ragaanni noohuwa gobbayidi waalchira haa're massie; waalchuno cufame no.

² Kaaliiqino, «Kuni waalchi cufamino gedeenni hee'rannota ikkinnina horonta difa'namanno. Israeelete Magano ikkoommohu ani Kaaliiqi eoommoha ikkinohura, manchu sirchi baalu kawaanni hige eanna fula didandaanno; kunni daafira, cufammo gedeenni hee'ranno.

³ Ikkirono, gosate gashshaanni kakkalote sagale itate hakkiicho ofollara dandaanno. E'nanniwa noo kifile widoonni hige eanna fula dandaanno» yiie.

QULLAAWU MINIRA EATENNA FULATE UYINOONNI SEERA

⁴ Hakkunni gedensaanni, manchu aliyye waalchi widoonni qole Qullaawu Minira albaanni haa're massie. Hakkiicho hee're laummo woyite Qullaawa Mine, Kaaliiqi ayirrinye leellishanno xawaabbi wo'me no; anino alba hige baattote aana gombisamummo.

⁵ Kaaliiqino, «Koo manchi beetto, macciishshattorenna la"attore baala seekkite wodanchi. Kuneeti ani Qullaawu Mini'ya daafira hasiisanno seera baala kuleemmohe. Qullaawu Mini'yara eatenna fulate fajjinoonnihu hiittoo mannaatiro seekkite buuxi.

⁶ «Ani Mootichu Kaaliiqi kunni albaanni assitinoha tiyyi'nanni coye baala, kunni ka'ano assitannoha ikkiro cinceemmokkita haxawarru Israeelete mannira kuli.

⁷ Kunni albaanni anera kakkalote coomanna mundee shiqishshu yannara, hajajantaera hasidhinokkire barcintinokkire wole gobba manna eessite, Qullaawa Mine'ya batteessitino. Assitino coyi tiyyi'nannihunni gondooro'ya diiggino.

⁸ Woga'ya ayirrisa agurte, Qullaawu Mini'ya giddo wole gobba mannira annimma uyitino.

⁹ «Kunni daafira, anera hajajamannokkihu barciminokki manchi, wole agarranna Israeelete manni mereero hee'rannoha ikkiro nafa, Qullaawu Mini'yara eannokki gede ani Mootichu Kaaliiqi hooloommota egensiiseemmo» yiie.

QEESIMMATENNI SOQQANTANNOKKI GEDE HOOLLOONNI LEEWAAWOOTA

¹⁰ Kaaliiqi, «Wolu Israeelete manni ledo xaadde ane gibbe kaphu maganna magansidhino Leewaawoota qorichisheemmo.

¹¹ Annimma adhite waalchuwa agaratanni, Qullaawu Mini'ya giddo soqqamate dandiitanno. Saada shilqote kakkalora gorritanni, magansi'rate daanno mannano kaa'la dandiitanno.

¹² Kayinnilla insa uminsa kaphu maganna magansi'rate wogara umire ikkatenni manna cubbu giddora eessitino daafira, qorichisheemmonsa gede, ani Mootichu Kaaliiqi xaareemmo.

¹³ Insa qeesimmatenni soqqantaera didandiitanno; woy anera baxxe qullaawa ikkinore kisanna Qullaawu Holgira ea didandiitanno. Tiyyi'nanni assootinsara iillannonsa qorichi konneeti.

¹⁴ Kunnira, qeesimmatenni ikkikkinni Qullaawu Mini giddo nooha wole wolqate looso baala seekkite loossanno gede asseemmonsa» yiie.

QEESOOTAHO UYINOONNI SEERA

¹⁵ Mootichu Kaaliiqi, «Wolu Israeelete manni ane giwe albi'yanni fafita, Qullaawa Mine ammanamatenni anera soqqantanni heedhinorinna Leewi ga'renni Saadooqi ilama ikkitino qeesooti no. Insa kakkalote coomanna mundee shiqishatenni alba'yaanni uurrite soqqantaera dandiitanno.

¹⁶ Magansidhara daggannore kaa'latenni, kakkalo'ya darga anera soqqantara Qullaawu Mini'yara ea dandiitannori insaatilla.

¹⁷ Qullaawu Minira giddoyidi nafarchira massitanno waalchuwa e'anno yannara, waajjo shaalado uddano uddi'ra hasiissannonsa. Giddoyidi nafarchirano ikko Qullaawa Mine soqqantanno yannara, ge'reewu ordanni gannoonni uddano baala uddi'ra dihasiissannonsa.

¹⁸ Hunkiishshannonsata hoo'late shaalado xaanxanni koffiya wodhitona; shaalado luko hiito nookkiha qodhitona.

¹⁹ Mannu noowa gobbayidi nafarchira fultanno woyite, qullaawa kifillara fushshite worte wole imaana uddidhona. Hatto assa hoogguro konne imaana kisannohu gawajjamanno.

²⁰ «Qeesootu umonsa meexxa woy lossi'ra dihasiissannonsa; hatteentenni haransite mudha dandiitanno.

²¹ Qeesootu giddoyidi nafarchira eate albaanni, woyinete xajje aggoonke.

²² Qeesicha ikkinohu baalu galtesewiinni fultino mancho adhoonke. Kayinnilla, Israeelitte seemo woy qeesicha ikkino ayiddaanna shiidhinota adha dandaanno.

²³ «Qeesootu manni'yara qullaawa ikkinohanna ikkinokkiha, keeraa'minohanna battaawinoha badde kultona.

²⁴ Aye seeri giddono moronsiisanno coyi ka"anno yannara, qeesootu Seeri'ya garinni taashshitona. Seeri'yanna woga'ya garinni, amma'note ayyaanna ayirrissona. Fooliishshote Barra'ya qullaawa assite agadhitona.

²⁵ «Anna woy ama, umisi ooso, woy rodoosi, woy mine assidhinokki rodoosi ikka hoogguro, aye qeesichino wolu manni reeshsha kisatenni umosi batteessa dihasiissannosi.

²⁶ Kunni manni reeshsha amade kae keeraa'mihu gedensaanni nafa, 7 barra keeshsha hasiissannosi.

²⁷ Hakkiinni aanche, Qullaawu Minira giddoyidi nafarchira e"e keeraa'mate kakkalo shiqishona. Hakkunni gedensaanni, Qullaawu Minira e"e soqqama dandaanno. Ani Mootichu Kaaliiqi konne coye coyi'roommo.

²⁸ «Ani Israeelete mannira beettunni beettoho sa'anno baatto beehanni, qeesootaho oommo iqqi qeesimmate soqqansho callate. Insara Israeelete mereero baattote iqqi dihasiisannonsa; ani umi'ya insara iqqansaati.

²⁹ Gidu kakkalo, cubbonna sao agursiisate kakkalo insara sagale ikkitonsa. Israeelete baattora anera baxxe qullaawa ikkino afansha baala adhitona.

³⁰ Gidunniha umihanna seyinoha anera shiqinshoonni afansha baala qeesootu adhitona. Mannuno wo'manka woyite buddeena ga'nanno yannara, umi buddeencho qeesootaho fushshaate asse oona. Anino togo assanno manni mine atoote wonsheemmo.

³¹ Qeesootu, reyinoha woy moyichu shiinoha goyinqe ayidde woy saada ittoonke» yii.