HIZIQEELI 42 - Qullaawa Maxaafa

QULLAAWU MINI MULE MINNOONNIRE 2 MINNA

¹ Hakkunni gedensaanni, hakku manchi gobbayidi ragaanni noo nafarcho haa're massie. Qullaawu Minira aliyye ragaanni noo minirano eessie. Kuni mini Qullaawu Minira galchimaanni qaccete noo miniwiinni difafinoho.

² Kuni mini seendille 50 qaafooti; hala'linyisi qole 25 qaafooti.

³ Mitto ragaanni, Qullaawu Minira aane noohu fanu dargi ledo taashshinanni woyite, wole ragaanni kincho karroonni nafarchira alba hige no. Konne 3 diriminni seekkinoonni. Mittu mittunku, woroonni noo diriminni roore giddo hige hulfaminoho.

⁴ Kunni minira aliyyeenni aane, hakkiira sayissanno faro, hala'linye 5 qaafonna seendille 50 qaafo ikkitanno.

⁵ Mineho aleenni hige noo dirimi aana minnoonni kifilla, hundunna mereerimu dirimi aana minnoonnitenni roore ruukkaddaho. Togo ikkinohuno badhe qolle fafinse seekkinoonni daafiraati.

⁶ Sasunku dirimi aana minnoonni kifilla, baxxite leeltanno dirimma aana noota ikkitinohura, wole minna nafara noote gede, tuuqqa afidhinota di"ikkitino.

^7-8 Woroonni noo dirimi aana noo mini xarra, gobbayidi kifillatewiinni 25 qaafo fafanno. Gattinotera 25 qaafo aana kifilla no. Minu seendilli deerrinni iimiidi dirimi aana gudinse kifilla minnoonni.

^9-10 Tenne lamente kifilla mule mineho soojjaatoonni, kinchu huxxiwiinni kayisse, gobbayidi nafarchira sayissanno faro no. Qullaawu Minira galchimaanni noo minira wodiidoonni 1 iso lawanno mini no.

¹¹ Kifillate albaanni, aliyye ragaanni noohu garinni seekkinoonniti sa'nanni faro no. Tini faro taalo hala'linye, taalo seendillenna mittu gari waalchuwa afidhino.

¹² Soojjaati ragaanni kinchu huxxi qaccenni kayise, mineho wodiidoonni minnoonni kifilla mule 1 waalchi no.

¹³ Manchuno, «Kuni lamunku mini qullaawaho. Kaaliiqi albaanni soqqantanno qeesooti qullaawa sagale tenne minna giddo ittanno. Kifilla qullaawa ikkitinohura qeesootu: gidu fushshaate, cubbonna sao agursiisate kakkalo baala hakkiicho wortanno.

¹⁴ Qullaawu Minira e'ino qeesooti, gobbaanni noo nafarchira fula hasidhanno yannara, Kaaliiqira soqqantara uddidhinoha qullaawa imaana fushshite hatte kifillara wortanno. Mannu gamba yaanno nafarchira fultara albaanni wole imaana uddi'ra hasiissannonsa» yii.

QULLAAWU MINI HALA'LINYE

¹⁵ Hakku manchi Qullaawu Minira giddoyidi kifilla bikke gudihu gedensaanni, soojjaati waalchi widoonni qole gobbara haa're fushshie. Hakkunni gedensaanni gobbayidi qoqqowo bikki.

¹⁶ Bikkanno daabba haa're soojjaati raga bikkita, 250 qaafo ikki.

^17-19 Hakkunni gedensaanni aliyye, wodiidinna galchimi ragano bikki. Mittu mittunku ragi seendilli mimmitu ledo taale, 250 qaafo ikki.

²⁰ Kunnira, huxxu qoqqowira giddoonni noo dargi 4 madde afi'rinoha ikkanna, mitte mittenti madde 250 qaafooti. Kinchu huxxi Qullaawa darga woluwiinni badate kaa'lanno.