HIZIQEELI 38 - Qullaawa Maxaafa

GOOGI DAAFIRA HIMANNOONNI HIMANA

¹ Kaaliiqi,

² «Koo manchi beetto, Maagoogi baattora noore Mesheekinna Tubaali gosa gashshinohura Googira,

³ ‹Ani Mootichu Kaaliiqi hanqunni kaoommohe.

⁴ Afiikkira bixaala wore olantokki baalate ledo, faradokkinna faradaasinekki wonqonna bagado amaxxitino gedeenni baalanka badhera qoleemmo'ne.

⁵ Ledokki Faarisinni, Itiyophiyunninna Liibiyunni daggino olanto, wonqo amaxxite siwiilu gulleeno umoho wodhitinori no.

⁶ Qoleno, aliyyenni xeerto gobbanni dagginori Gomeerinna Beeti Togariima bagadaano lowoti ledokki no yiino.

⁷ « ‹Kunni daafira, atino qixxaawi; olantokki baala qixxaabbanno gede hajaji.

⁸ Lowo gobbanni galagalte dagge olu yaaddo nookkiha fafisidhe keere heedhannota Israeele horratto gede, lowo diri gedensaanni hajajeemmohe. Lowo diro mullicho ona ikkite keeshshitino. Xa kayinni, mannu baalu keere hee'rannota Israeelete ilaalla horratto.

⁹ Atinna olantokki hattenne gosara dambalu bubbe gede ikkitine bala tugginanni. Gomichu gede ikkitine baatto beeshshitine amaddinanni› yite kulisi» yiie.

¹⁰ Mootichu Kaaliiqi Googira, «Hakku diri iillanno waro wodanikkinni busha mala malatto.

¹¹ Huxxanna cufana afidhinokki katammara keere heedhannota hattenne wolqiweelo gosa horrate hedatto.

¹² Alba diigante mullicho ona ikkite noo katamma, galagalte minanteenna, lowo daga mereerinni gamba yee, lowo saadanna jajja duu'ne duroo'me, gobba baalate dannawa ikkitino gobbara keere hee'ranno manna, miiceemmo yaatto.

¹³ Saabanna Dedaani gosa, Terseesi daddalaasine ledo ate garooti. Insano, olantokki Israeeletenni adhitanno birranna culka, saadanna wole jajja beeqqitara hasidhanno» yii.

¹⁴ Mootichu Kaaliiqi, «Kunnira, koo mancho! Googira, ‹Kuneeti manni'ya Israeele yaaddo nookkiha keere noota affe,

¹⁵ aliyye ragaanni faffe hee'ratto darginni, faradaasine ikkite dagate mereerinni doorantinota jawa olanto hoode adhite gaadattonsa.

¹⁶ Baatto guggushshino gomichi gede ikkite, manni'ya Israeelete aana bala tugatto. Yanna iillituro, baatto'ya marte horratto gede soyemmohe. Togo asseemmohu, daga ane ayimma affanno gedenna ate widoonni qole wonsheemmo coyinni Qullaawa ikka'ya egensiisateeti.

¹⁷ Yanna iillituro, manni'ya Israeelete aana bala tuge horrannoha mitto kayiseemmo gede soqqamaano'ya Israeelete himanaano widoonni qole, seeda yannara albaanni himannanni gede assummohe manchi ateeti. Ani Mootichu Kaaliiqi konne coye coyi'roommo› yiino yite kulisi» yee hajajie.

KAALIIQI GOOGIRA ABBANNO QORICHA

¹⁸ Mootichu Kaaliiqi, «Googi Israeele horranno yannara, anino hanqunni kaeemmo.

¹⁹ Hakka waro, hanqi'yanni Israeelete baatto qece yite huxidhannota kuleemmo.

²⁰ Qulxu'menna cea baala, jajjabbanna shiimmaadda saada, baattote aana noo manni baalu ane waajje huxi'ranno. Ilaalla ubbanno; boonna hoshooshante to'anno; kinchu huxxi baalu diigamanno.

²¹ Batinyu dani bao aanasi abbe, Googi waajje huxi'ranno gede asseemmo. Ani Mootichu Kaaliiqi konne coye coyi'roommo. Olantosi bagado alba qo'lite mimmito guddanno.

²² Dhibbunninna reyotenni qorichisheemmosi. Isonna olantosi wishotenni, kaadetenninna buwanno ruqaninni ganeemmo.

²³ Kunni garinni, ani jawanna Qullaawa ikkoommota daga baalate leellisheemmo. Hatte yannara, insa ani Kaaliiqa ikkoommota affanno» yii.