HIZIQEELI 36 - Qullaawa Maxaafa

ISRAEELETE ILAALLARA HENDOONNI MAASSO

^1-2 Kaaliiqi, «Koo manchi beetto, Israeelete ilaallara, ane Mootichu Kaaliiqiha himanu qaale macciishshitanno gede kulinsa: Diinu, ‹Hashshu! Hakkuri albi ilaalla ninketa ikkitino› yaanno.

³ «Xa ani yeemmoti: Qooxeessinsara noo gosa ilaallansa gaangeessite Israeele qassu yannara, baalunku mishshe xontino'ne.

⁴ Kunnira, ki'ne ilaallanna gaarra, wayibbanna lagga, diigantinoonni darguwanna gaangaawi'nera noo daga horritino'nerinna qaccino'neri mannu nookkire ikkitine gattinoonni katamma, ani Mootichu Kaaliiqi ki'nera yeemmo coye macciishshe.

⁵ «Ani Mootichu Kaaliiqi qooxeessi'nera noo daga, roorenka Edoomira hanqunni fooggale coyi'roommo. Wodaninni kaino hagiirrinninna mishatenni ka'e, baatto'ya adhite saada hossannowa baala amaddino.

⁶ «Kunnira, Israeelete baatto daafira himana coyi'ri. Allaggu xontino xononna abbitino shollinyi daafira, ani Mootichu Kaaliiqi hanqu wo'mino laalanni yeemmore baala ilaallate, gaarrate, wayibbatenna laggate kuli.

⁷ Qooxeessaho noo daga shollitanno gede, ani Mootichu Kaaliiqi xaareemmo.

⁸ Ki'ne Israeelete ilaallara yeemmohu konneeti. Aana'ne heedhanno haqqe baala galagalte lattanno; gumano uyitanno. Israeeleno rahotenni gobbansa higganno.

⁹ Ki'ne daafira xissiisi'reemmo; danchummatennino towateemmo'ne; loonse aana'ne wixa winxanni.

¹⁰ Aana'ne manna batiseemmo; diigaminoha baala galagalchine minneenna katamma'ne hee'nannita ikkitanno.

¹¹ Aana'ne mannunna saada batidhanno gede asseemmo; albinni roore batidhanno. Lowo ooso ilantanno; hakkiicho alba heedhino garinni heedhanno. Albinni roorse duroonseemmo'ne. Hatte yannara, ani Kaaliiqa ikkoommota affinanni.

¹² Manna'ya Israeele, galagale aana'ne hee'ranno gede qole abbeemmo. Ki'neno iqqansa ikkitinanni; kunni ka'a oosonsano dihudidhanno.

¹³ «Ani Mootichu Kaaliiqi yeemmohu konneeti: Mannu ki'ne, ‹Manna ittannoreeti; gosansa oosono hudetenni shitannoreeti› yiino'ne.

¹⁴ Kunni ka'a kayinni, manna ittinannire di"ikkitinanni; gosa'ne oosono hudetenni dishitinanni. Ani Mootichu Kaaliiqi konne coye coyi'roommo.

¹⁵ Ki'ne kunni ka'a dagate haariimo di"ikkitinanni; baatto'neno manna guddannota di"ikkitanno. Ani Mootichu Kaaliiqi konne coye coyi'roommo» yii.

ISRAEELENNITA HAARO HEESHSHO

¹⁶ Kaaliiqi,

¹⁷ «Koo manchi beetto, gari-male heeshshonsanninna bushu loosinsanni baatto batteessitino. Suudinsa ane albaanni, lagaawino manchi gedeeho.

¹⁸ Manna shaatenninna kaphu maganna magansi'ratenni, baatto batteessitino daafira, aara'ya insa aana dirrisoommo.

¹⁹ Assootinsanna ikkitonsa baala busha ikkitino daafira, yoo yuummonsa; allaggu gobbarano billaallisoommonsa.

²⁰ Daga, ‹Kuri Kaaliiqi mannaati; ikkollana, uyinonsa baattonni buqqisantino› yitannansa, martuwa baala dagate mereero qullaawa su'ma'ya xonsiissino.

²¹ Israeelete manni qafadame ha'rino gobba baalate qullaawa su'ma'ya xonsiisino. Kuni coyino, su'mi'ya daafira laalaateemmo gede assinoe.

²² «Xa kune ani Mootichu Kaaliiqi insara yeemmore baala kulinsa. Kunni ka'a asseemmore, martini gobba baalate xonsiissinoonnihu qullaawu su'mi'ya daafira yee asseemmo ikkinnina ki'ne Israeelete daafira yee di"ikkino.

²³ Insa mereero xonamanno gede assitinoonnihu qullaawu su'mi'ya dagate mereero ayirranno gede asseemmo yannara, ani Kaaliiqa ikkoommota affanno. Ani Mootichu Kaaliiqi konne coye coyi'roommo. Ani Qullaawa ikkoommota daga ki'ne widoonni higge affanno gede asseemmo.

²⁴ Dagate giddonni fushsheemmo'ne; gobba baalantenni gamba asse umi'ne gobba qoleemmo'ne.

²⁵ Aana'ne keeraancho waa wixe, kaphu maganna magansi'ratenninna batte'ne baalantenni keeraa'mitinanni gede asseemmo'ne.

²⁶ Haaro wodananna haaro ayyaana eemmo'ne; boo'na wo'mitinoha kinchu wodana fushshe, owaata hajajamanno wodana eemmo'ne.

²⁷ Ayyaana'ya giddo'ne gashsheemmo; seeri'yanna hajajo'ya garinni heedhinanni gede asseemmo'ne.

²⁸ Hakkunni gedensaanni, akaakka'nera oommo baattora heedhinanni. Ani Magano'ne ikkeemmo; ki'neno manna'ya ikkitinanni.

²⁹ Batteessanno'ne coyi baaluwiinni gatiseemmo'ne; kunni ka'a hudidhinannikki gede gide halashsheemmo'ne.

³⁰ Haqqe'ne laalonna gati'ne gidi bati'ranno gede asseemmo. Hakkunni gedensaanni dagate mereero hudete shollinyi diamaddanno'ne.

³¹ Hatte yannara, busha ikkito'nenna assitinoonniha busha coye qaaggine, cubbi'neranna assitinoonni batte baalate ki'nenee cee'mitinanni.

³² Israeele, Konne baala asseemmohu ki'ne daafira yee ikkinokkita affe! Assitinoonni sao baalate saalfattinanni shollitinanni gede hasi'reemmo. Ani Mootichu Kaaliiqi konne coye coyi'roommo» yii.

³³ Mootichu Kaaliiqi, «Ani cubbi'ne baalunkunni keereenseemmo'ne yannara, diigaminoha baala mintine, galagaltine katamma'nera heedhinanni gede asseemmo.

³⁴ Gate'neenni higge sa'inori baalunku mullicho ona ikke nooha affino. Xa kayinni, galagalchitine loossine shaqqishshinanni gede asseemmo.

³⁵ Laihu baalu, ‹Mullicho ona ikkite nooti tini baatto, hiitto ikkite Edeni Gennete labbu! Alba ba'inoti, diigantinotinna mulla darga ikkitino katamma, xa hiitto ikkite qiishonnitanna mannu hee'rannota ikka dandiitu?› yaanno.

³⁶ Hatte yannara, baotenni gattinori qooxeessi'nera noo daga baala, diigantino katamma galagalche minoommohunna ba'inota moola baatto shaqqishoommohu ani Kaaliiqa ikkoommota affanno. Ani Kaaliiqi konne baala asseemmo gede hexxo oommo; yoommoreno wonsheemmo» yii.

³⁷ Mootichu Kaaliiqi, «Israeele mitte higge ledde kaa'lote huuccidhannoe. Anino, manninsa kiiro ge'reewunnite geeshsha asseemmo.

³⁸ Alba Yerusaalamete ayyaana ayirrinsanni barra, kakkalote shiqinshanni ge'reewi wo'mannonte gede, diigantino katammara mannu wo'manno. Hatte yannara, ani Kaaliiqa ikkoommota affanno» yii.