HIZIQEELI 35 - Qullaawa Maxaafa

EDOOMIRA HIMANNOONNI HIMANA

¹ Kaaliiqi

² «Koo manchi beetto, Edoomi Ilaalira himana kuli.

³ Ani Kaaliiqi yeemmore baala, « ‹Edoomi Ilaala, kuneeti ani atera diinoomunni kaeemmohe; mullicho ona baatto asseemmohe.

⁴ Katammakkino diigeemmo; baattokkino mullicho asseemmo; hakkunni gedensaanni ani Kaaliiqa ikkoommota afatto.

⁵ « ‹Atera Israeelete galtino koma noohehura, loosonsa mixxitu yannara, kaa'la agurte sammi yite uurrite laootto.

⁶ Kunnira, ani Mootichu Kaaliiqi heeshshote Magano ikka'yanni xaareemmona, ate reyote sayise eemmo. Horonta digatatto; manna shaate sao noohe daafira, ateno reyo hassannohe.

⁷ Ani Edoomita Ilaalaame gobba mullicho ona asseemmo; hakkaanni hige sa"annoha baala sheemmo.

⁸ Ilaallakkinna gaarrakki reeshshunni guggushsheemmo; laggakkiranna dareerrakkira bagadu shiino manni reeshsha wonsheemmo.

⁹ Hegerera mullicho darga asseemmohe; layinkimeeshsho katammakkira mittuno dihee'ranno. Hatte yannara ani Kaaliiqa ikkoommota afatto.

¹⁰ « ‹Kaaliiqi Maganonsa ikke hee'reennanni, lamenka manna Yihudanna Israeele baattonsa ledo umikkire assi'rate hedootto.

¹¹ Kunnira, ani Mootichu Kaaliiqi heeshshote Magano ikka'yanni xaareemmona, manni'ya aana leellishootto hanqira, hinaasiranna gibbora, atera malino qoricha eemmohe. Ate qorichisheemmohu aanansa assootto saora ikkinota manni'ya afanno.

¹² Hakkunni gedensaanni ati, «Israeelete baatto mulla darga ikkitinona, bibbindeemmonsa» yite oso'littota ani Kaaliiqi macciishshoommota afatto.

¹³ Ane seyatte, boo'natenni aana'ya coyi'roottore macciishshoommo› yiino yite kulisi» yii.

¹⁴ Kunnira, ani Mootichu Kaaliiqi, «Gobba baala ate uwara hagiidhitanno gede, mullicho ona gobba asseemmohe.

¹⁵ Fiixi'ya Israeelete baora hagiidhittonte gede, Seiiri Ilaallanna Edoomi baatto baala mullicho ona ikkitanno. Hatte yannara, ani Kaaliiqa ikkoommota mannu baalu afanno» yii.