HIZIQEELI 30 - Qullaawa Maxaafa

KAALIIQI GIBITSE QORICHISHANNO

¹ Kaaliiqi,

² «Koo manchi beetto, ani Kaaliiqi yeemmore baala kultanni konne himana coyi'ri: Bayisibao! Dartu barri daanni no!

³ Kaaliiqi loososi loosanno barri iillino! Hakku barrino daga baalate, gomichu guggushshannohanna, qarru bati'rannoha ikkanno.

⁴ Gibitsete ola ikkanno; Itiyophiyahono lowo qarri kalaqamanno. Lowo manna Gibitsete gobbara shinanni; gobbano saamante mulla ikkite gattanno.

⁵ «Itiyophiyunni, Liibiyunni, Liidiyunni, Arabetenninna Israeelete manni giddonni dagginori baalu kunni olinni gooffanno» yiie.

⁶ Kaaliiqi, «Aliyye ragaanni Migidoolinni kayise, wodiidi ragaanni Asiwaani geeshsha noori Gibitse agartannori baalu olunni gooffanno. Gibitse hexxitanno olanto ba'anno. Konne coye coyi'roommohu ani Mootichu Kaaliiqaati.

⁷ Baattono, wolootunni roore mullicho ikkitanno; katamma baalanti diigante gattanno.

⁸ Gibitsete ittanno giira qaseemmo yannaranna agaratannosere baala shinanni yannara, ani Kaaliiqa ikkoommota affanno.

⁹ «Hakku barri iilleenna Gibitse ba'anno yannara, fafisi're keere hee'rannoha Itiyophiyu manna olunni waajjishiishshanno soqqamaano, markaawetenni soyemmo. Mannuno waajje huxi'ranno; hakku barrino mule no!»

¹⁰ Mootichu Kaaliiqi, «Gibitsete durumma hunanno gede Baabilooni moote Nabukadanatsoori ane anga asse soyemmo.

¹¹ Isino marartannokkire kaajjadda olantosi hoode adhe, baatto hunara daanno. Insano, Gibitse bisetenni guddanno. Reeshshuno gobba wo'manno.

¹² Abbayi Waa mooshsheemmo; Gibitseno bushu mannira sayise eemmo. Kunnira, allaggu gobba gudisse huntanno. Ani Kaaliiqi konne coye coyi'roommo» yii.

¹³ Mootichu Kaaliiqi, «Memfiisi noo misillanna kaphu maganna baala huneemmo. Gibitse gashshara ka"annohu dihee'ranno; baattote aana waajjille facci asse agureemmo.

¹⁴ Fatiroosi yinanniwa mullicho darga asseemmo; aliyye ragaanni noohura Tsoaani katamira giira qaseemmo; dannuwa katama Tebisiha qorichisheemmo.

¹⁵ Gibitsete qara qiisho ikkinohu Pelusiyemi katamano hanqi'yanni huneemmo. Tebisi bagadaano baala gudeemmo.

¹⁶ Gibitsete giira qaseemmo; Pelusiyemino lowo geeshsha qarramanno. Tebisiti kinchu huxxuwa diigantanno; Memfiisi Katamano fullannikki shetto amaddannosi.

¹⁷ Heliyopoliisinna Buubasitisi katammara hee'ranno wedelli baalu olunni gooffanno. Hakkiinni gatanno manni qafadamanno.

¹⁸ Gibitsennita wolqansa hiiqqaqqe, hexxitannota jawaantensa huneemmo yannara, Xafinaasi tunsichu amadanno. Gibitse gomichu beeshshanno; katammasera hee'ranno manni baalu qafadamanno.

¹⁹ Gibitse kunni garinni qorichisheemmo yannara, ani Kaaliiqa ikkoommota affanno» yii.

GIBITSETE MOOTERA WOLQA BA'ANNO

²⁰ Qafadammummohunni tonaa mitikki diro, umi agani eihunni lamalki barra Kaaliiqi,

²¹ «Koo manchi beetto, ani Gibitsete mooteta cigilesi hiiqqoommo; sissa gane hursannosi ogeessi dihee'ranno. Kunnira, xaate kunni ka'a wolqa afi're bagado dikayisanno.

²² Anino Mootichu Kaaliiqi, Gibitsete moote aana hanqunni kaoommo. Hiiqqantinotano gattinotano lamenta angasi lede hiiqqammora qixxaawoommo; bagadisino angasinni uwanno gede asseemmo.

²³ Gibitsoota gobba baalate billaalliseemmo.

²⁴ Kunni garinni Baabilooni moote cigile jawaachishe, ane bagado anga woreemmosi. Gibitsete moote cigile kayinni hiiqqeemmo; diinisi albaanni korrisanni reyanno.

²⁵ Gibitsete moote daafurse Baabilooni moote jawaachisheemmo. Ani anga woreemmosi bagadinni Gibitsete heemmeeqi'ranno yannara, mannu baalu ani Kaaliiqa ikkoommota afanno.

²⁶ Gibitsoota gobba baalate billaalliseemmo. Hakkunni gedensaanni ani Kaaliiqa ikkoommota affanno» yii.