HIZIQEELI 28 - Qullaawa Maxaafa

XIROOSI MOOTERA HIMANNOONNI HIMANA

¹ Kaaliiqi,

² «Koo manchi beetto, ani Mootichu Kaaliiqi yeemmore Xiroosi mootera, ‹Wodanikki boo'natenni duu'raminohura, atenee maganu gede assite kiirootto; maganu gede baarunni qoqqowaminohura ayirradu barcimira ofolloottota coyi'rootto. Atenee maganu gede assite kiirittorono, ati manchoho ikkinnina horonta magano di"ikkootto.

³ Ati Daanieelinni roore hayyichaatini? Xa ati afoottokkiri dinoni?

⁴ Ogimmakkinninna hayyokkinni lowo culkanna birra gamba assi'rootto; jirono duu'nootto.

⁵ Daddalu hayyo afi'rootto daafira, jirote aana jiro duu'nootto; jirokki batinyinni kainohunni naaxxootto.

⁶ « ‹Xa ani Mootichu Kaaliiqi yeemmoti, ati maganu gedee ogeessa ikkoottota hedakkinni,

⁷ aanakki bala tugannoha mararro afi'rinokki diina haa're abbeemmohe. Insano ogimmakkinninna hayyokkinni afidhe duu'noottoha dancha coye baala guddanno.

⁸ Ateno shite baaru diimera tuggeennahe, hakko waamamatto.

⁹ Shitahera dagganno woyite atenee xaano maganu gede assite kiiratto ikka? Shitannori angara eatto woyite ati mancho ikkoottota, kayinnilla magano ikkoottokkita afatto.

¹⁰ Magano egentinokki allaggi angara e'e, macharaarro woshichi gede cancanante reyatto. Ani Mootichu Kaaliiqi konne coye coyi'roommo› yiino yite kulisi» yiie.

XIROOSI MOOTE UWANNO GARA

¹¹ Kaaliiqi galagale,

¹² «Koo manchi beetto, Xiroosi mootera iillitanno baora kiirte wi'li. Ani Mootichu Kaaliiqi yeemmore, ‹Ogimmakki batinyinninna lowo geeshsha xuma ikkakkinni egennamoottoho.

¹³ Edeni shaqqado darga Maganu gate hee'rootto. Duumo dilqa, baqqala dilqa, kaajjado siwiila, haanja dilqa, xoxxorraamo dilqa, bule dilqanna duumu woy haanju dani dilqinni biifinsoonniha culku imaana uddi'rootto; ilamitto waro kuri baalu agare noohe.

¹⁴ Qullaawu Ilaali'ya aana nooha minekki agaranno gede, kirubeeli woroommohe. Atino giirate gede dilquwate mereero ka'anna kawa ha'ramootto.

¹⁵ Ilamitto waro ati addinta danchaho; gedensaanni kayinni bunshe assa hanafootto.

¹⁶ Wole gosa ledo daddi'litanni, mararro nookkihanna busha ikkootto. Kunni daafira, Qullaawu Ilaali'ya aaninni ishinu gede fushshe tugoommohe; kirubeelino cululluqa dilqa kinna giddonni shorrannohe gede assoommohe.

¹⁷ Danikki xummenni kainohunni naaxxootto; maccaha ikkakki gowwa assitinohe. Kunninni kainohunni woro qole wigidiidoommohe; wole mootoollano atenni jiiltanno gede assoommo.

¹⁸ Cubbikkinninna hanaaqu daddalikkinni assootto saonni kainohunni, magansi'ratto darguwa baala battaabbino. Kunnira, hedeweelcho giira kayise, katama mucuqqi asse giiroommo; caaqqi yiihu baalu buluulo ikkite gatoottota afanno.

¹⁹ Kuneeti baitto! Hingenni dianfannihe; egentinohe gobba baala waajjite huxidhino. Atera iillitino bao iillitannonsakki gede waajjitino› yiino yite kulisi» yiie.

SIDOONAHO HIMANNOONNI HIMANA

²⁰ Kaaliiqi,

²¹ «Koo manchi beetto, Sidoonaho himana kuli.

²² Hakkiicho hee'ranno mannira ani Mootichu Kaaliiqi yeemmore kulinsa: Sidoona, ani atera hanqunni kaoommo; ate aana asseemmore lae, mannu baalu ayirrisannoe. Ate giddo heedhannore qorichishatenni Qullaawa ikka'ya leellisheenna ani Kaaliiqa ikkoommota afanno.

²³ Atera dhibba soyemmo; dooggakkirano mundee lolakkanno gede asseemmo. Raga baalaho bala tungannihe; mannakki shinanni. Hatte yannara, ani Kaaliiqa ikkoommota afatto» yiie.

ISRAEELE GOBBANSARA KEERE HEEDHANNO

²⁴ Kaaliiqi, «Ajishshe la'annoseri, gaangaawisera noo gosa baala utunna kokko'lu gede ikkite kunni ka'a Israeele digawajjitanno. Ani Mooticha Kaaliiqa ikkoommotano affanno» yii.

²⁵ Mootichu Kaaliiqi, «Israeelete manna billaallisoommo gobba baalatenni qole abbeemmonsa. Dagano ani Qullaawa ikkoommota affanno; Israeelete manni soqqamaanchi'ya Yaiqoobira oommotera uminsa baattora hee'ranno.

²⁶ Hakkiicho keere heedhanno; minnano mi'nitanno; woyineno kaasidhanno. Ajishshe la'annonsare ollaansa qorichisheemmo. Israeele kayinni yaaddo nookkiha hawaqidhe heedhanno. Hatte yannara, ani Kaaliiqi Maganonsa ikkoommota affanno» yii.