HIZIQEELI 26 - Qullaawa Maxaafa

XIROOSIRA HIMANNOONNI HIMANA

¹ Qafadammummohunni tonaa mitikki dirinni aganaho umi barra Kaaliiqi,

² «Koo manchi beetto, Xiroosi katamira hee'ranno manni, ‹Yerusaalame diigantino! Daddaluno giwinose! Kunni ka'a ninke ledo heewisantara didandiitannona, ninke duroo'mineemmo› yaanni hagiidhanno.

³ «Kunnira ani Kaaliiqi yeemmoti: Xiroosi katama, kuneeti ani hanqunni kaoommohe; atera bala tugganno gede lowo daga kawiira haa're abbeemmo. Insano baaru dambali gede ikkite aanaho ka'annohe.

⁴ Katamikkita kinchu huxxuwakki diigganno; qiishokkino hiiqqaqqitanno. Bushshakki baala fee hoole, kinna calla reqecci asse agureemmo.

⁵ Hattenne kinna, baaru giddo qulxu'me amaddannori woshshaadonsa haqqitannowa asseemmo; ani Mootichu Kaaliiqi coyi'roommona, daga Xiroosi saantanno.

⁶ Mereeri gobbara heedhannori nafa, bisetenni doddolantanno; hatte yannara, Xiroosi ani Kaaliiqa ikkoommota afanno» yii.

⁷ Mootichu Kaaliiqi, «Xiroosira bala tuganno gede, mootoollate moote ikkinoha Baabilooni moote Nabukadanatsoori aliyyenni haa're abbeemmo. Isino, jawaata olanto ledo lowo faradinni, faradi gaaretenninna faradaasinetenni dukkisame daanno.

⁸ Mereeri gobbara hee'ranno manni baalu, bagadunni goofanno; diinuno huxxikki birxe geeshsha bushsha duunanno. Batinye wonqonni gaangeessite amadanno'ne.

⁹ Kinchu huxxakki, diinganni meenchinni gananno; hakko meenchinni qiishokki dhoosanno.

¹⁰ Faradinsa kayisanno buko, gomichu gede ikkite guggushshitannohe. Faradi gaarensanna faradinsa eanno woyite, dhoohinohu kinchu huxxi shashshafamanno.

¹¹ Faradaasinensa dooggakki baala sibbiiqqanno; mannakkino bagadunni guddanno. Lowiddaanna tuuqqakkino hiiqqaqqante uulla ubbanno.

¹² Diinnakki jirokkinna daddalu uduunnekki saantanno; kinchu huxxuwakkinna biifadda minnakki baala diigganno. Kinna, haqqenna diigammore baala massite baaru giddo huntanno.

¹³ Sirbakkinna gingilaatunnita huurokki baala sammi asseemmo.

¹⁴ Qulxu'me amaddannori woshshaadonsa haqqitanno kinna calla reqecci yite gattanno; katamuno layinkimeeshsho digatamaramanno. Konne coye coyi'roommohu ani Mootichu Kaaliiqaati» yii.

¹⁵ Mootichu Kaaliiqi Xiroosi katamira, «Horramatto yannara, baaru qaccera hee'ranno manni bisetenni gorramanno manni raare macciishshe waajje huxi'ranno.

¹⁶ Baaru mule noo gobba mootoolla ayirradu barciminsa aaninni dirritanno; maareekonnihanna gashshootu imaana mulqidhe, waajjite huxidhanni uulla ofoltanno. Atera iillino qarra heddanni lowo geeshsha masse huxidhanno.

¹⁷ Insano, ‹Egennamino katami diigami! Markabbansa baaru baalunku aaninni adhantu. Kunni katami manni baaru roorrootaati; baaru mule heedhannore baala waajjishshinoreeti.

¹⁸ Kuni katami diigami barra, giddichuwa huxidhino; giddichuwate hee'ranno manni baalu, diigamasinni kainohunni masino› yaanni wi'lannohe» yii.

¹⁹ Mootichu Kaaliiqi, «Ayino hee'rara dandaannokki katamma diigantinote gede, mullicho asseemmohe; lowo baari egemmannohe gede asseemmo.

²⁰ Jeennaate dirrite albi manni ledo xaadatto gede asseemmohe. Reyitinori ledo fiixa ikkite hee'ratto gede, hakko baattote woroonni noo jeennaatira diigante ba'inori ledo wore agureemmohe. Kunninni kainohunni, layinkimeeshsho mannu dihee'rannohe; lubbotenni noori ledo dikiiramatto.

²¹ Mannu ate lae jiilanno gede asseemmo; hakkiichi gawalo ikkannohe. Mannuno hase hoogannohe; konne coye coyi'roommohu ani Mootichu Kaaliiqaati» yii.