HIZIQEELI 25 - Qullaawa Maxaafa

AMOONIRA HIMANNOONNI HIMANA

¹ Kaaliiqi,

² «Koo manchi beetto, alba Amooni baatto widira higge Amoonootaho himana kuli.

³ Ani Kaaliiqi yeemmore macciishshitanno gede: Qullaawu Mini'ya battaawanna, Israeelete baatto ba'annanna Yihudu mannino qafadamanna affine hagiidhitinoonni.

⁴ Kunninni hagiidhitinoonnihura, soojjaati halallinni dagganno gosa horritanno'ne gede asseemmo; gobba'nera urdete qacha kalaqidhe heedhanno. Ki'ne jajja ittanno; ado'neno agganno.

⁵ Raaba Katama gaalu hosannowa, Amooni gobba baalanta ge'reewu hosannowa asseemmo; ani Kaaliiqa ikkoommota kunninni affinanni.

⁶ «Ani Mootichu Kaaliiqi: Ki'ne hagiirrunni qeexaa'litinoonni.

⁷ Konne assa'nenni, saantannoriranna mulqidhanno dagara sayise eemmo'ne. Layinkimeeshsho manna ikkitinannikki gede woy umi'ne baatto heedhanno'nekki gede asse huneemmo'ne. Hatte yannarano, ani Kaaliiqa ikkoommota affinanni» yee coyi'rie.

MOAABIRA HIMANNOONNI HIMANA

⁸ Mootichu Kaaliiqi, «Moaabinna Edoomi, ‹Yihudu wole gosa gedeeho› yitinona,

⁹ Beetiyeshimooti, Ba"aalimeooninna Qiriyatayimi yinannita egennantinota Moaabira golo ikkitino katamma nafa diinu gawajjanno gede asseemmo.

¹⁰ Kunni ka'a, Moaabi gashshootino hee'rannokki gede, Amooni ledo mitteenni soojjaati gosa dagge amaddannosi gede asseemmo.

¹¹ Ani Moaabi qorichisheemmo; insano ani Kaaliiqa ikkoommota affanno» yii.

EDOOMIRA HIMANNOONNI HIMANA

¹² Mootichu Kaaliiqi, «Edoomi manni Yihuda mararro nookkiha rabbisino daafira, lowo sao assino.

¹³ Kunnira, xa Edoomi qorichisheemmotanna hakkiicho noo mannanna saada baala gudeemmota egensiiseemmo. Temaani kataminni kayise Dedaani katami geeshsha noo gobba mullicho asseemmo; mannano bagadu gudanno.

¹⁴ Manni'ya Israeele ane daafira, Edoomi rabbissanno; insano Edoomira buwinoha hanqo'ya leellishshanno. Qorichisheemmonsa woyite, ani Mooticha Kaaliiqa ikkoommota affanno» yii.

FILISXEEMETE HIMANNOONNI HIMANA

¹⁵ Mootichu Kaaliiqi, «Filisxeemootu lowo dirinni diina ikkitinonsare Yihudoota jaddotenni rabbisidhino; Yihudano diinoomunni gudate hasidhino.

¹⁶ Kunnira, Filisxeemoota qorichisheemmotanna baattote aaninni huneemmota leellisheemmo; Filisxeemootu xawira gattinore baala gudeemmo.

¹⁷ Lowo geeshsha qorichisheemmo; lowo geeshsha rabbisi'reemmo; hanqo'ya leellisheemmonsa yannara, ani Kaaliiqa ikkoommota affanno» yii.