HIZIQEELI 24 - Qullaawa Maxaafa

AKKALA SIWIILU DISSITE

¹ Qafadammummohunni honsikki diro, tonnikki aganira, tonnikki barra, Kaaliiqi,

² «Koo manchi beetto, Baabilooni moote Yerusaalame gaangeesse amada hanafanno barra ikkino daafira, konne techo barra borreessite tajete amadi.

³ Ani Mootichu Kaaliiqi insara kuloommota tenne masalo haxawarru manni'yara, « ‹Siwiilu dissite booso worte waa wonshi.

⁴ Dancha dancha maala tafunnihanna hayunniha murmurte, qoe afidhino miqqano cancante aanaho ledde gafi.

⁵ Danchu ge'rechi maala haadhe, siwiilu dissitera worte haqqe woroonni duuni; maalunna miqqa su'niite ra'anno gede assi› yiino yite kulinsa» yiie.

⁶ Mootichu Kaaliiqi, «Manna shitannori katamira aanne'e! Kuni katami, xillu aaninni ka"annokki dissite gedeeho; giddo noo maala shiimuno gatikkinni gudinse haa'nanni.

⁷ Katamu giddo manna shinoonni; mundeeno, bushshu diwannowa ikkikkinni kinnaame baattora du'nantino.

⁸ Mundee lae aarame rabbiseemmo gede, hakkiicho diwannori nookkiwa kinnate aana facci asse aguroommo» yii.

⁹ Mootichu Kaaliiqi, «Manna shitannori katamira aanne'e! Giirranni haqqe ani umi'ya woreemmo.

¹⁰ Lowo haqqe abbi! Giira woggari! Maala gafi! Waco hufisse gudi! Miqqano gicilshi!

¹¹ Camotenni seekkinoonnita mullicho siwiilu dissite, duu'mita geeshsha maashshi yiino kashili aana wori; kunni garinni xillu aaninni kae ho'leenna keeraa'mitanno.

¹² Hatto assineennano, giirate buwani xilla aaninni dihunanno.

¹³ Yerusaalame! Foorrekki batteessitinohe; ani keereensammohera hasi're hee'reennanni, ati kayinni keeraa'ma giwootta. Wolqa'ya leellishammohe geeshsha horonta dikeeraa'matta.

¹⁴ Ani looseemmo yanna kuneeti daggino; cubbokki lashshi asse dilaeemmo. Mararummokkinni assootta bunshe baalate qorichisheemmohe. Konne coye coyi'roommohu ani Mootichu Kaaliiqaati» yii.

HIZIQEELI GALTE REYO

¹⁵ Kaaliiqi,

¹⁶ «Koo manchi beetto, baxattotinna ille worte la"attoti galtekki qoomante hedeweelcho reyitannona, hururante wi'litooti; hindiiddono fushshidhooti.

¹⁷ Mannu afannohe gede ikkite heqqifatte wi'litooti; dadillekki leellishate mullu uminni woy mulla lekkanni hadhooti. Umono heeshshi yitooti; waakkisono ittooti» yiie.

¹⁸ Soodo guto mannu ledo hasaawummo; hatte hawarronni galte'ya reyitu. Layinki soodo hatto Kaaliiqi kulie gede ikkoommo.

¹⁹ Mannuno, «Togo mayira ikkitto?» yee xa'mie.

²⁰ Anino, «Togo ikkeemmo gede kulinoehu Kaaliiqaati.

²¹ Ki'ne Israeeleteno, ‹Wolqa'ne adawadhitinanniha, ille wortine la'inannihanna wodani'ne fooliishshi'rinoha Qullaawa Mine'ya batteesseemmo. Yerusaalamete gattinore ooso'nenna seenne'ne olu giddo shinanni› yee kuleemmo'ne gede hajajinoe.

²² Hatte yannara, ki'neno ani ikkoommo gede ikkitinanni; umo heeshshi diyitinanni; waakkisono di"ittinanni.

²³ Mullu uminninna mulla lekkanni dihadhinanni; hururantine diwi'litinanni. Hindiiddo'neno difushshidhinanni; cubbi'nenni kainohunni jaabbinanni; gurura'inanni ka'a kawa higginanni.

²⁴ Hatte yannara, ani ki'nera malaate ikkeemmo'ne; ani ikkummo gede ikkitinanni. Kuni baalunku ikkanno yannara, isi Mooticha Kaaliiqa ikkinota affinanni gede Kaaliiqi coyi'rino» yee dawaroommonsa.

²⁵ Kaaliiqi, «Xaano koo mancho, la"a baxxannoha, adawadhitinohanna hagiidhitinoha marte maaxantannoha jawaata Qullaawa Mine, hattonni oosonsanna seennensano haa're hooleemmo.

²⁶ Ani togo asseemmo barra baotenni gatino manchi daye, tenne ikkito baala duduwannohe.

²⁷ Hakko barra, danqe hee'rannohu afiikki fa'nanno; hakko manchi ledono hasaawatto. Mannahono malaate ikkatto; insano ani Kaaliiqa ikkoommota affanno» yiie.