HIZIQEELI 21 - Qullaawa Maxaafa

KAALIIQI BISE

¹ Kaaliiqi,

² «Koo manchi beetto, Yerusaalametenna mannu magansi'rannowa himana coyi'ri.

³ Ani Kaaliiqi yeemmore kulte Israeelete gobba qorophisiissanni, ‹Ani diinakkiiti; bise'ya fushshe danchanna busha badummokkinni duuchanka sheemmo.

⁴ Bise'ya fushshe wodiidinni aliyye geeshsha, danchanna busha badummokkinni duuchanka gudeemmo.

⁵ Ani Kaaliiqi bise'ya fushshoommotanna galagaleno kou giddora qoleemmokkita mannu baalu afino.

⁶ «Koo manchi beetto, mannu baalu afannohewa heedhe, hexxo mudhite dadillitanni uri!

⁷ ‹Mayira urattto?› yite xa'mitannohe woyite, ‹Albillittete daara noohu bushu duduwi daafira yeeti. Hakku duduwi daanno yannara, wodani'ne daaqanno; anga'ne shaqqitanno; goonte'ne waa ikkitanno; gulubba'neno qece yitanno. Kunino keeshshikkinni ikkanno; digatannoho yaanno Mootichu Kaaliiqi› yite kulinsa» yiie.

⁸ Kaaliiqi,

⁹ «Koo manchi beetto, himana coyi'ri; ani Kaaliiqi yeemmore mannaho kuli. Bise, gamanxoonnitanna fiinoonni bise,

¹⁰ shitara gamanxoonni; banqote gede bilicci yitara fiinoonni. Manni'ya qorophishiishsha'yanna, qoricha'ya lashshi assinohura, kunni ka'a hagiirru dihee'ranno.

¹¹ Bise fiine amandanni gede, gamanxe fiine shaannohura uyinoonni.

¹² Koo manchi beetto, tenne bise qixxeessinoonnihu, manna'yanna Israeelete albisoota guddaraatina raari. Insano gatino manni'ya ledo reyitanno; kunnira, hexxo mudhite umo ga'ni.

¹³ Kuneeti ani manna'ya fonqoleemmo; aagintaabbe higa gibburo, kuni duuchunku aanansa daanno.

¹⁴ «Xaano koo mancho, himana kuli; qeexaa'li; biseno ledde ledde gantona; iseno shitannote; gaangeessite amadde gorritannote.

¹⁵ Manni'ya mase uwanno gede assitanno; banqote gede bilicci yitanna, shaate qixxeessinoonni bisenni, kataminsara dano tugammoraati.

¹⁶ Ati iibbado bise, qiniitenna gura murmuri; iillittawa baala muri.

¹⁷ Ani qeexaa'leemmo; hanqi'yano qiidanno; ani Kaaliiqi konne coye coyi'roommo» yiie.

BAABILOONI MOOTE BISE

¹⁸ Kaaliiqi,

¹⁹ «Koo manchi beetto, Baabilooni moote bise haa're daanno woyite, ha'rannota lamenta doogo malaatisi. Lamenti doogo mittu darginni ka'inota ikkitinohura, lamenti doogo baxxite addi addi raga hadhannowa buuxxe malaate wori.

²⁰ Mittu malaati, Amooni katama Raaba kulannoho; layinkihu kayinni, Yihudaho qiinshoonni katama Yerusaalamenniha leellishannoho.

²¹ Baabilooni moote doogga xaaddannowa malaateho kaansoonni hossuwa mule uurranno; hiittenne doogo hige ha'ra hasiissannosiro afate hixa ga'nanno. Kaphu magannasino mala xa'mi'ranno; kakkalote gorrinoonni saada hellee la"anno.

²² Kuneeti qiniiticho angasinni, ‹Yerusaalame› yitanno borro aanaho noo hixa amadanno. Hakkawoyintenni, olaho adawadhinanni gede, katamu huxxi mule bushsha duunnanni gede, huxxisinna waalchisi mokkollo hiiqqaqqinanni gedenna mannano shinanni gede malaate uyi.

²³ Yerusaalamete manni eino gondoorinni kainohunni, kuni coyi iillannonke yee dihedino. Kayinnilla, konne himana kulloonnihu cubbonsa qaagiissatenna qafadantannota kulateeti.

²⁴ Kunnira, ani Mootichu Kaaliiqi yeemmohu konneeti: Cubbi'ne leellino; sao assitinoonnire ikkitinoonnita mannu duuchunku afino. Ikkito'ne baalatenni cubbaataamma ikka'ne leellishshinanni. Kunnira, yoo yeemmo'ne; diini'nerano sayise eemmo'ne.

²⁵ «Ati bunshenna batte wo'mitinohehu Israeelete albisaancho, goofimarchu qoricha eemmohe barri iillino.

²⁶ Ani Mootichu Kaaliiqi konne coye coyi'roommo: Umikki ba'latto hooli; xaaxi'rootto hocco tiri. Kunni ka'a bashsho gede coyi horonta dihee'ranno; buxanete roorre uyitine, xa gashshite noore dirrisse.

²⁷ Bao! Bao! Ee halaalenka katamaho bao dagganno gede asseemmo. Ikkollana, dooroommohu daa geeshsha kuni coyi di"ikkanno; hatte yannara isira sayise eemmo» yii.

AMOONOOTAHO MALLOONNI BISE

²⁸ Qoleno, «Koo manchi beetto, himana coyi'ri! Israeele xontannorira Amoonootaho ani Mootichu Kaaliiqi yeemmore, ‹Huntanno bise qixxaabbino; iseno, shitaranna banqote gede bilicci yitara fiinoonnite.

²⁹ « ‹La'inanni ajuuja dharaho; kultinanni himanino kaphoho. Ki'ne, bunshenna batte wo'mitino'nereeti; goofimarchu qoricha adhitinanni barri iillino; bise haxo'nera suuntanni no.

³⁰ « ‹Bise, koise giddora qolle; ilantinoonni gobbara yoo yeemmo'ne.

³¹ Hanqi'ya wolqa bubbanno giira gede aana'ne dirritanno; shaa rossinorira kaajjaddaho sayise eemmo'ne.

³² Giira guddanno'ne; mundee'ne umi'ne gobbara du'nantanno; layinkimeeshsho qaaganno'nehu dihee'ranno. Konne coye coyi'roommohu ani Mootichu Kaaliiqaati› yiino yite kulinsa» yiie.