HIZIQEELI 18 - Qullaawa Maxaafa

CUBBO LOOSSANNORI REYITANNO

¹ Kaaliiqi,

² « ‹Annuwa shiishinoha woyinete guma ittino; oosonsara kayinni hinko shilli yitino› yitanni Israeele mimmitoho marro higge kultanno maammaashshi kuni maati?

³ «Ani Mootichu Kaaliiqi heeshshote Magano ikka'yanni xaareemmona, konne maammaashsha Israeelete kunni ka'a leddine dimaammakkinanni.

⁴ Mittu mittunku manchi lubbo anete; annunnitino beettunnitino anete; cubbo loosanno manchi umisilla reyanno.

⁵ «Danchu suwashshunna ammanamino manchi hee'riro,

⁶ Israeelete maganna kaphunnita dimagansi'ranno; woy kakkalloonnire mittoreno di"itanno; manni galteno diugganno. Woy godowu dayino mancho ledo siimu xaadooshshe diassanno.

⁷ Ayeno didoganno; woy aye jajjano wolqatenni diadhanno. Woxe liqiissanno woyite amadisiinsoonnisire baala qolanno; hudi'rinoha itisanno; kallinoha uddisiisanno.

⁸ Woxesi qallote diliqiissanno; woy mitte bunsheno diassanno; giwantinore araarsate halaale coyi'ranno.

⁹ Togoo manchi hajajo'ya wonshanno; seera'yano ayirrisanno. Sumbesinni kainohunni lubbotenni hee'ranno; togo yeemmohu ani Mootichu Kaaliiqaati.

¹⁰ «Kayinnilla kunni manchira manna shaannohu woy wole aane noo cubbo loosannohu bushu beetti hee'risiro,

¹¹ annu mittoreno assikkinni, beettu kayinni tulluwate kaphu magannara kakkallanni kakkalo itiro, wolu galte uggiro,

¹² buxanenna qarrantinore miiciro, manni jajja wolqatenni adhiro, woxe liqiissanno woyite amadote adhinoha qolannokkiha ikkiro, wole daga magansidhannowa mare kaphu maganna magansi'ratenni tiyyi'nanni coye assiro,

¹³ woxesi qallote liqiissiro, kuni beetti lubbotenni hee'rara dandaannoni? Horonta lubbotenni hee'rara didandaanno. Konne baala tiyyi'nanni coye assino daafira reyanno; reyosirano isi umisilla xa'mamanno.

¹⁴ «Qoleno kunni beettira labbaa beetti ilamisiro, annu loosanno cubbo baala la"anno. Kayinnilla annu ha'rino doogo ha'ra dihasi'ranno.

¹⁵ Israeelennita kaphu maganna dimagansi'ranno; woy kaphu magannara kakkalloonni kakkalo di"itanno; wolu manchi galte diugganno.

¹⁶ Ayeno dimiicanno; woy manni jajja wolqatenni diadhanno; woxe liqiissanno woyite amadote adhinore digatisi'ranno. Hudi'rinoha itisanno; kallinoha uddisiisanno.

¹⁷ Buxane horonta beebba diassi'ranno; woxesino qallote diliqiissanno; seera'ya ayirrisanno; hajajo'yano wonshanno. Togoo manchi lubbotenni hee'ranno ikkinnina annisi loosino cubbinni direyanno.

¹⁸ Annisi kayinni hanaaqunninna wolqatenni manna baala beebba assi'rino; kunnira, isi umisi loosino cubbinni reyino.

¹⁹ « ‹Hatto ikkina, beettu annu cubbira qorichishamannokkihu mayiraati?› yitinanniha ikkanno; beettu taalonna dancha coye assino. Hajajo'ya baala seekke agadhino daafira, isi addinta lubbotenni hee'ranno.

²⁰ Reyo hasiissannohu cubbo loosanno manchootilla; beettu annu cubbira diqorichishamanno. Annuno beettu cubbira diqorichishamanno; danchu manchi danchummasinni dancha waaga adhanno. Bushu manchino bunshesinni qorichishamanno.

²¹ «Bushu manchi cubbo loosa agure Seera'ya agadhiro, taalonna dancha coye assiro, addinta lubbotenni hee'ranno ikkinnina direyanno.

²² Taalo coye assinohura, loosino cubbo baala agurreennasi lubbotenni hee'ranno.

²³ Ani bushu manchi reyannota hagiidheemmoha lawanno'neni? Dee'ni; ani hagiidheemmohu, cubbosi aagintaawe hige lubbutenni hee'rirooti; togo yeemmohu ani Mootichu Kaaliiqaati.

²⁴ «Kayinnilla, keeraanchu manchi danchamma assa agure, bushu manni gede bushanna tiyyi'nanni coye assiro, lubbotenni hee'rannoha lawanno'neni? Dee'ni; alba assino danchumma nafa dikiirantannosi. Ammanama hoogasinninna assino cubbinni kainohunni reyanno.

²⁵ «Ki'ne Israeelete manni, ‹Mootichu assanno coyi gara di"ikkino› yitinanniha ikkanno; ki'ne Israeele ani yeemmota macciishshe. Heddinanni woyite, ani asseemmo coyi baalu gara di"ikkino? Gara ikkitinokkiti ki'ne hadhinanni doogooti.

²⁶ Danchu manchi danchumma agure, bunshe assiro, assino bunshenni reyanno.

²⁷ Bushu manchi cubbo loosa agure taalonna dancha coye assiro, lubbosi gatisi'ranno.

²⁸ Assino coyi busha ikkinota afe cubbo loosa agurino daafira, lubbotenni hee'ranno ikkinnina horonta direyanno.

²⁹ Ki'ne Israeele kayinni, ‹Mootichu assanno coyi gara di"ikkino› yitinanni. Heddinanni woyite, ane doogo gara di"ikkitino? Gara ikkitinokkiti ki'ne doogooti.

³⁰ «Xaano Ani Mootichu Kaaliiqi ki'ne Israeelete yeemmo'nehu konneeti: Mitto mitto'ne assooti'ne garinni qorichisheemmo. Kunnira, assitinanni bunshewiinni higge; cubbi'nenni kainohunni umo'ne huntinoonte.

³¹ Busha looso'ne baala agurtine, haaro surrenna haaro wodana kalaqidhe; ki'ne Israeele reyo mayira hasidhinanni?

³² Ani ayino reyara dihasi'reemmona, baalunku cubbi'nenni higgine lubbotenni heedhe; togo yeemmo ani Mootichu Kaaliiqi» yii.