HIZIQEELI 16 - Qullaawa Maxaafa

YERUSAALAME KAALIIQIRA DIAMMANANTINO

¹ Kaaliiqi galagale,

² «Koo manchi beetto, Yerusaalame assitino coyi mageeshshi geeshsha tiyyi'nanniha ikkinoro kulise.

³ Mootichu Kaaliiqi isera yaannore, ‹Ilamoottahu Kana"aani baattoraati; annikki Amooraawichaho; amakki kayinni Hitichote.

⁴ Ilamitta yannara, suuwinohehu woy hayishshinohehu woy maxinetenni amammade hoccunni xaaxinohehu ayino dino.

⁵ Konne mitto coye nafa assahera ate mararinohu ayino dino; ilamitta woyite mittuno baxinohehu nookkihura xawoho tugamootta.

⁶ « ‹Anino hakkaanni hige sa"anni hee're, mundeetenni dana ba'e fittifattanna afoommohe; fugante reyattara wore diaguroommohe.

⁷ Mu'ra towantannihu gede asse towatoommohe; hojjaameettenna jawaata beetto ikkootta. Unuunikkino guntuti; dananchikki seedi; ikkollana mullicho nootta.

⁸ « ‹Galagale mulekkiinni saummo woyite, mine assi'rate iilloottata afoommo. Mulqame nooha bisokki seemma'yanni diwe baxeemmoheta egensiisate xaaroommo. Adhammohera gondooro e"e umi'yata assi'roommohe. Konne coye coyi'roommohu ani Mootichu Kaaliiqaati.

⁹ « ‹Hakkunni gedensaanni, mundee aanikkinni hayishshe hooloommo; ejersu zayitenni bisokki cuukkoommohe.

¹⁰ Biifado imaana uddisiisoommohe; danchu goginni seekkinoonni koatte woroommohe. Biifado shaashe umikkira usuroommohe; haarrete kaabbano uddisiisoommohe.

¹¹ Angate gumenna goowu irra wore biifisoommohe.

¹² Sanokkira cuue, maccakkira buticha, hattono umikkira wodhattata biifado ba'latto oommohe.

¹³ Birrunninna culkunni seekkinoonnihu lowo irri noohe; biifadu goondoonnihunna haarretenni gannoonnihu lowo imaani noohe. Fila bulleenni gannoonni tima, malawonna ejersu zayite itootta. Mootete galte gedee xuma ikkootta.

¹⁴ Addinta biifado assoommohehura, xummekkinni kainohunni gobba baalate egennamootta. Konne coye coyi'roommohu ani Mootichu Kaaliiqaati.

¹⁵ « ‹Kayinnilla, konne biinfillekkinna egennamakki ku'lite dayi baalii ledo foorootta.

¹⁶ Imaanikki aaninni gama haadhe magansi'ratta darguwa biifisi'ritta; hakkiichono foorrekki ledootta; umokki sayisse wolootaho ootta.

¹⁷ Ani oommoheha birrunninna culkunni seekkinoonni irra massite labballo kaphu maganna seekkite magansi'rootta.

¹⁸ Ani oommoheha biifado goondoonni imaana massite misillate uddisiisootta. Ani oommoheta ejersu zayitenna hixaana misillate shiqishootta.

¹⁹ Fila bullee, ejersu zayitenna malawo sagalimmate oommohe. Ati kayinni kaphu maganna hagiirsiisate fushshaate assite shiqishootta. Konne coye coyi'reemmohu ani Mootichu Kaaliiqaati.

²⁰ « ‹Hakkiinnino sa'e, anera iloottare oosonna seenne massite kaphu magannara kakkalootta. Anera ammanama hoogakki ajjeennahe,

²¹ ooso'ya gorrite kaphu magannara kakkalootta.

²² Tiyyi'nanni foorre assatta woyite, mullicho mundeetenni dana ba'e fittifatittata anjekki yannare nafa diqaagootta› yite kuli» yii.

YERUSAALAMENNITI FOORRETE HEESHSHO

²³ Mootichu Kaaliiqi, «Goofimarchu iillinohena, atera aanne'e! Loosootta bunshe tenne calla ikkitukkinni,

²⁴ doogga baalantera kaphu maganna magansi'rattatanna fooratta darguwa qixxeessi'rootta.

²⁵ Kunni garinni jajjabba doogga gama kaphu maganna magansi'nanni darguwa qixxeessidhe atenee shollishootta; dayi baalira manninatekki sayisse ootta; barru barrunkunni foorrekki batisootta.

²⁶ Ane hanqisate yite, hakkuri sarmitannokkiri Gibitsootu olliikki, ledokki foortanno gede assootta.

²⁷ «Xa kayinni, ate qorichishatenna qeechakki ikkinoha atoote'ya atewiinni haa're hoolate anga'ya diriirsoommo. Foorrekkinni kainohunni gibbannoheriranna tiyyidhannoherira Filisxeemootaho sayise oommohe.

²⁸ «Wolootu ledo loosatta foorre ikka hooggeennahe, Asoorootu hoode dodatta; albano ati insa elooti. Ikkollana, insano kassi diassitinohe.

²⁹ Hakkuri daddalaasine Baabiloonootu ledono elle amadde foorootta. Ikkollana, insano kassi diassitinohe» yii.

³⁰ Mootichu Kaaliiqi, «Foora mancho saalu nookkite gede, konne baala coye assootta.

³¹ Doogga baalate kaphu maganna magansi'ratenna foorate seyannohe darga qixxeessi'rootta. Wolootu gede woxe nafa adhittakkinni fooratta.

³² Ayiddaannase gibbe wolu ledo foortanno mancho gedeeta ikkootta.

³³ Foortanno manchora woxe baantannise; ati kayinni woxe adha agurte ellakkira calla elatta; ragu ragunkunni dagge ate ledo foortara woxe ootta.

³⁴ Kunnira, ati baxxoottata foora mancho ikkootta. Ikkollana, fooratta gedenna woxe baatatta gede giddeessinohehu dino; umikkilla baxxe manninatekki ootta. Kunnira, ati horontanni baxxoottate!» yii.

MAGANU YOO YERUSAALAMETE AANA

³⁵ Mootichu Kaaliiqi qole, «Foora Yerusaalame yeemmoheta macciishshi.

³⁶ Imaanakki mulqidhe, foortanno mancho gede ellakkiranna tiyyi'nannirira kaphu magannakkira, manninatekki reqecci assootta; kaphu magannara kakkalate oosokki gorrootta.

³⁷ Kunninni kainohunni, baxoottansarinna giwoottansari lede, hakkore albi ellakkino gamba asse abbeemmo. Insano gaangeessitannohe gede asseemmo. Imaanakkino mulqe teedikki albansaanni reqecci yaanno gede asseemmo.

³⁸ Adhamase gondooro diigge, manna shitanno mancho gede asse qorichisheemmohe. Hanqi'yanninna buwanno aari'yanni sheemmohe.

³⁹ Angansara sayise eemmohe daafira, kaphu maganna magansi'ratenna foorrete seekki'rootta darguwa baala diigganno. Imaanakkinna irrakki baala mulqite mullicho gatissannohe.

⁴⁰ «Albiti ellakki aaramino manni kinnatenni gane, bisetenni doddole shaannohe gede aanakki kakkayissanno.

⁴¹ Minnakki giirtanno; qorichishamakki meentu baalu la"anno gede assitanno. Kunni garinni foorrekkinna ellakkira foorrete woxe baatakki uurritanno gede asseemmo.

⁴² Hakkunni gedensaanni, hanqi'ya qiideenna sammi yeemmo; hakkunni ka'a hanqe diaarameemmo.

⁴³ Anjekki yannara assoommohere baala hawootta; kunni assootta coyi baalunni hanqisoottae. Kunnira, anino battennihu cubbikki deerrinni qorichisheemmohe. Tiyyi'nanni coyi assoottahu baalu aana, foorre mayira leditta? Konne coye coyi'reemmohu ani Mootichu Kaaliiqaati» yii.

SEENNUNO AMANSA GEDEERE IKKI

⁴⁴ Kaaliiqi, «Yerusaalame, mannu atere kayise, ‹Seennuno amansa gedeereeti› yaanni maammaashsha assi'rannohe.

⁴⁵ Halaaleho, ati amakki beettooti; amakki ayiddaannasenna oosose shagaggidhe gibbino. Atino ayiddaannansanna oosonsa giwinori roduuwikki gedeete; ama'ne Hitittete; anni'ne Amooraawichaho.

⁴⁶ «Yerusaalame, rodookki seennise ledo, aliyyeenni noo Samaariyaati. Maa'ne rodookkino seennise ledo wodiidoonni noo Soddoomaati.

⁴⁷ Hoodensa hadhe insa assitannore assatenni digalfatootta? Roorenka shiima yanna gedensaanni assootta coyi baalunkunni insa dansoottata ikkootta.

⁴⁸ «Ani Mootichu Kaaliiqi heeshshote Magano ikka'yanni xaareemmona rodookki, Soddoomunna seennise assino bunshe, atinna seennikki assitinoonnite gedeeta di"ikkitino.

⁴⁹ Soddoomunna seennise duushshitino sagale afi're qarru nookkiha keere hee'rinohura naaxxino; buxanenna qarrantinore dikaa'lino.

⁵⁰ Insa boo'ninna haxawarre ani giweemmo coye baala assino; ati afittante gede insa hunoommo.

⁵¹ «Samaariyu cubbi ati loosoottahu darate nafa di"ikkino; isenni roore ati addinta tiyyi'nanni cubbo loosootta. Ate bunshe roduuwikkitenni ledo taashshiniro, insa keeraano lawanno.

⁵² Kuneeti xaano shollinyekki callakki duqqa hasiissannohe. Ate cubbi addinta tiyyi'nanniha ikkinohura, roduuwikki atenni taashshiniro, keeraano lawanno. Roduuwakki atenni taashshineenna keeraano lawannore ikkino daafira, ati saala uddidhe ofolli» yii.

SODDOOMUNNA SAMAARIYU HAAROO'MA

⁵³ Kaaliiqi Yerusaalame, «Soddoomanna seennese, Samaariyanna seennese, galagale duroonseemmo yannara, ateno duroonseemmohe.

⁵⁴ Umokki qolte saalfatatta; ate shollanni, roduuwikki atenni woyyinore ikkansanni sheshifatanno.

⁵⁵ Insa albi gede duroo'manno; atinna seennikkino haaroo'mitinanni.

⁵⁶ Boo'nitta waro, Soddooma diqacifatootta?

⁵⁷ Hattonni loosootta bunshe baala leeltara albaanni, Soddooma haariimootta. Xa kayinni, atinni ise gedeeta ikkootta; xa ati Edoomootaho, Filisxeemootahonna giwannohe olliira haariimo ikkootta.

⁵⁸ Assoottahu saalsiisannohunna battete loosi baalunni kainohunni, sheta hasiissannohe. Ani Mootichu Kaaliiqi konne coye coyi'roommo» yii.

HEGERE GONDOORO

⁵⁹ Mootichu Kaaliiqi, «Coyi'rootta qaale lashshi assatenni gondoorokki diigoottahura, atera malino qoricha eemmohe.

⁶⁰ Ikkollana, anjekki yannara ate ledo eoommo gondooro qaageemmo; hegere gondooro ate ledo e"eemmo.

⁶¹ Bayiranna maa'ne roduuwikki, galagale atewa daanno yannara, assoottari baalu qaagamannahe saalfatatta. Gondoori'ya giddo nookkire ikkirono, insa seennekki ikkanno gede asseemmo.

⁶² Ate ledo eoommoha gondooro'yano haaroonseemmo; atino hatte yannara ani Kaaliiqa ikkoommota afatta.

⁶³ Assootta sao baala agureemmohe; ati kayinni hattenne baala sao qaagatenni lowo geeshsha saalfatattahura mittoreno coyi'ra didandaatta. Konne coye coyi'roommohu ani Mootichu Kaaliiqaati» yii.