HIZIQEELI 15 - Qullaawa Maxaafa

TIDHITINOKKITA WOYINETE HAQQICHO

¹ Kaaliiqi,

² «Koo manchi beetto, woyinete haqqicho sini wole dubbu haqqe sinna ledo hiitto ikke taalanno?

³ Mittore nafa assi'rate kaa'lannoni? Uduunne suxxinanniha farqaamo haqqa nafa aanisenni fushshi'nannini?

⁴ Giira kayisi'rate ikkinnina wolirira dikaa'litanno; qaccuwa giirame mereero xoolaminohunni mittore nafa assi'nara dandiinannini?

⁵ Giiramara albaanni nafa mittore dikaa'lanno. Xa giiramihunna xoolamihu gedensaanni roorenka kaa'lannori nookkiha ikkanno.

⁶ «Kunnira, Mootichu Kaaliiqi yaannoti tenneeti: Woyinete haqqicho dubbunni haa'ne giirranninte gede, Yerusaalamete hee'ranno mannano haa're,

⁷ qorichisheemmo. Mitte giiranni gattino; xa kayinni wole giira ittannonsa. Insa qorichisheemmo yannara ani Kaaliiqa ikkoommota afatto.

⁸ Insa anera ammanantannokkire ikkitino. Anino baattonsa mulla ikkitanno gede asseemmo. Konne coye coyi'reemmohu ani Mootichu Maganoho» yiie.