HIZIQEELI 14 - Qullaawa Maxaafa

MAGANU KAPHU MAGANNA MAGANSIDHANNORE GIWANNO

¹ Mitu mitu Israeelete geerri dagge alba'yaanni ofoltu.

² Insa hakko heedheenna Kaaliiqi,

³ «Koo manchi beetto, kuni manni wodanansa kaphu magannara uyinoha ikkinohura, kaphunniti magannansa cubbunniwa massitannonsa gede umonsa facci assite agurtino. Konne ikkina, ani xa'midhinore qoleemmonsaha lawannonsani?

⁴ «Xaano ani Mootichu Kaaliiqi yeemmore kulinsa; wodanasi kaphu magannara uyinohunna cubbunniwa massitannosi gede fajjino Israeelichi baalu, himanaancho xa'mi'rara dayiro, hoodensa ha'ranno maganna kaphunnitera maltino dawaro afi'ranno.

⁵ Hakkuri kaphu maganna Israeele anewiinni faffanno gede assitino. Kayinnilla, xa qoleemmonsa dawaronni anewa higgannoha ikkanno.

⁶ «Kunnira, ani Mootichu Kaaliiqi Israeelete yeemmore kulinsa: Tiyyi'nanni maganna kaphunnitewiinni agurtine anewa higge.

⁷ Israeele woy giddonsa heedhannori wole gobba manni anewiinni baxxite kaphu maganna magansi'ratenni cubbo loossannoha ikkiro, qolteno mala xa'mi'rate himanaanonniwa hadhannoha ikkiro, ani umi'ya Kaaliiqi dawaro eemmonsa.

⁸ Ani umi'ya insa giwatenni wolootaho bangagooshshe ikkanno gede asseemmo. Mannu ani Kaaliiqa ikkoommota afanno gede, manni'ya mereerinni insa huneemmo.

⁹ «Mittu himanaanchi dogame kapho himanannoha ikkiro, kapho himananno gede assoommohu ani Kaaliiqaati. Ikkirono, giwe manni'ya mereerinni iso fushshe huneemmo.

¹⁰ Himanaanchohonna isinni ma'lara daannohura mittu gari qorichi iillannonsa.

¹¹ Konne asseemmohu, Israeele ane agurtannokki gedenna umonsano cubbunni batteessitannokki gede assateeti. Kunni garinni insa manna'ya ikkitanno; anino Maganonsa ikkeemmo. Konne coye coyi'reemmohu ani Mootichu Kaaliiqaati» yii.

NOHI, DAANIEELINNA IYYOOBI

¹² Kaaliiqi,

¹³ «Koo manchi beetto, mitte gobba manni cubbo loosironna ammanamannokkiha ikkiro, anga'ya diriirse sagale baala huneemmo. Hude soye mannunna saada mitteenni gooffanno gede asseemmo.

¹⁴ Nohi, Daanieelinna Iyyoobi giddonsa heedhuro nafa, keeraanchimmansa insa umonsalla gatissannota ikkinnina wole digatissanno. Konne coye coyi'roommohu ani Mootichu Kaaliiqaati.

¹⁵ «Woy manna shaanno moyicho soyummoro, mannu hakkiichira mara bararraaqeenna baatto mulla gattanno.

¹⁶ Ani Mootichu Kaaliiqi heeshshote Magano ikka'yanni xaareemmona, hakkuri sasunku keeraano nafa hakkiicho heedhuro, uminsa lubbo ikkinnina oosonsa nafa gatisa didandiitanno; baattono mulla darga ikkite gattanno.

¹⁷ «Woy hatte gobbara ola kayisummoro, mannanna saada gudanno bagadinni co'o yite ba'anno gede asseemmo.

¹⁸ Ani Mootichu Kaaliiqi heeshshote Magano ikka'yanni xaareemmona, hakkuri sasunku keeraano hakkiicho heedhuro nafa, uminsa lubbo ikkinnina oosonsa nafa gatisa didandiitanno.

¹⁹ «Hatte gobbara dhibba soye, hanqi'yanni lowo manninna saada gooffanno gede assummoro,

²⁰ ani Mootichu Kaaliiqi heeshshote Magano ikka'yanni xaareemmona, Nohi, Daanieelinna Iyyoobi hakko heedhuro nafa, keeraanchimmansa umonsa ikkinnina oosonsa nafa digatissanno» yaanno.

²¹ Mootichu Kaaliiqi qole, «Mannanna saada mitteenni gudammora 4 busha coye Yerusaalamete aana abbeemmo. Hakkuno: olaho, hudete, moyichohonna dhibbaho.

²² Mittu manchi nafa oososi ledo gate ki'newa shiqqi yiiro, seekkitine la'e. Mageeshshi geeshsha bushuulle ikkitinorono buuxxe. Kunni garinni Yerusaalamete aana abboommo qorichi hasiisinoha ikkinota affinanni.

²³ Hatte yannara, assoommori baalunkura kaimu maatiro seekkitine buuxxinanni. Konne coye coyi'reemmohu ani Mootichu Kaaliiqaati» yii.