HIZIQEELI 12 - Qullaawa Maxaafa

ISRAEELETE QAFADAMA HIZIQEELI LAWISHSHUNNI LEELLISHI

¹ Kaaliiqi,

² «Koo manchi beetto, ati hee'rattohu haxawarru manni mereerooti. Insa haxawarroota ikkansanni kainohunni ille heedheennansanni dila'anno; macca heedheennansanni dimacciishshitanno.

³ «Kunnira koo mancho, daramannohu gede uduunnekki usudhite barru hashshikkinni fulte ha'ri. Hakko haxawarrootino miteekkite affannoha ikkannona konne darga agurte wolewa ha'ratto woyite manna baalaho leelli.

⁴ Baalunku ate la"a dandaanno gede barra arrishsho e'ukkinni darame wolewa ha'rannohu gede ikkite uduunnekki usudhi. Hawarroo barra daramanni noohu gede ikkite qaraawattanna mannu baalunku afohena.

⁵ La"annohe yannara minekki kurkurte xullo fushshi; uduunnekkino hatte xullo giddoonni lulluqqisse fushshi.

⁶ Ha'ratto dargi leellannohekki gede uduunnekki qotikkira duqqite illekki diphite tunsote hadhanna laohena; assattori baalu Israeelete qorophishiishsha ikkanno» yiie.

⁷ Anino Maganu hajajinoere baala assoommo; hakko barranni uduunne'ya daramanno manchi gede ikke usudhoommo. Hawarrita mine anga'yanni kurkure xullo fushshe, hakkaanni qole uduunne'ya lulluqqise fushshoommo; mannu baalu la"annae usuraminoha uduunne'ya qoti'yara duqqe ha'roommo.

⁸ Layinki soodo guto Kaaliiqi,

⁹ «Koo manchi beetto, kuri aggawarrootu Israeelooti, ‹Kuni assattori baalu maati?› yite xa'mitinohe.

¹⁰ Kunnira, ani Mootichu Kaaliiqi yeemmore kulinsa. Kuni himani Yerusaalame gashshinohuranna hakko hee'ranno manni baalaho kulloonniho.

¹¹ Kuni ati assootto coyi baalu, insa aana ikkara rahino coyira malaate ikkinota kulinsa. Insano, qafadante hadhannore ikkitanno.

¹² Insa gashshaanchi, uduunnesi usudhe qotisira duqqe, insa minesi kurkurte fushshitannosi xullo giddoonni lulluqqe tunsichunni fule xooqanno; illesi diphino daafira baatto dila"anno.

¹³ Kayinnilla, ani meemmote gedee woshshaado wore amadeemmosi; illesinni laikkinni reyannowa Baabilooni katama haa're masseemmosi.

¹⁴ Ledosi loossannorenna ayirradda agaraanosi baala faro faronta billaalliseemmo; mannuno shaara hasannonsa.

¹⁵ «Allaggu gobbara hee'ranno manni mereero billaalliseemmonsa yannara, ani Kaaliiqa ikkoommota affanno.

¹⁶ Insa giddonni shiimu manni olunni, hudetenninna dhibbunni gatanno gede asseemmo. Kunni garinni wole ga're mereero heedhe assitinori saalsiisannore ikkinota buuxxanno. Togo asse qorichishoommonsahu ani Kaaliiqa ikkoommota affanno» yee coyi'rie.

MASINO HIMANAANCHI MALAATE

¹⁷ Kaaliiqi,

¹⁸ «Koo manchi beetto, sagalekki massanni iti; agatto woyiteno qece yite huxi'ri.

¹⁹ Tini ajuujano xa gobbansara heedhannorira Yerusaalamete mannira, Mootichu Kaaliiqi leellishinota ikkitino gede manna baalaho kuli. Insano ittanno woyite massanno; agganno woyiteno qece yite huxidhanno. Hakko hee'rannohu baalu seerimale ikkinohura baattonsa mulqantanno.

²⁰ Xa mannu wo'me noo katamma ba'anno; baattono mullicho uulla ikkitanno. Hatte yannara, ani Kaaliiqa ikkoommota affanno» yiie.

DANCHA MAAMMAASHSHANNA BUSHA HIMANA

²¹ Kaaliiqi,

²² «Koo manchi beetto, Israeelete manni, ‹Kuneeti yanna sa'e hadhino; ajuujano mullare ikkite gattino› yaanni mayira coyi'ranno?

²³ Ani Mootichu Kaaliiqi kunni daafira yeemmore kulinsa; kuni maammaashshi kawiinni sa"annokki gede asseemmo. Layinkimeeshsho Israeelete gobbara tenne dimaammaankanni. Hattenne agurte, ‹Kuneeti yanna iillitino; himanu baalu wo'maraati!› yite kulinsa.

²⁴ «Israeelete manni mereero kaphu ajuuja woy so'rote himani kunni ka'a horonta dikulamanno.

²⁵ Ani Mootichu Kaaliiqi hedoommore coyi'reemmo; coyi'reemmo qaali baalunku wo'manno. Kunni ka'a horonta dikeeshshanno; ki'ne haxawarrootu aana, abbeemmo yee qorophisiisoommore baala yanna'nera wo'manno gede asseemmo. Konne coye coyi'roommohu ani Mootichu Kaaliiqaati» yiie.

²⁶ Kaaliiqi lede,

²⁷ «Koo manchi beetto, Israeelootu ajuujakkinna himanikki seedu dirinni wo'mannoho yite heddanno.

²⁸ Kunnira, ani Mootichu Kaaliiqi yeemmore kulinsa: Ani cyi'roommori baalu wo'manno; horonta dikeeshshanno. Konne coye coyi'roommohu ani Mootichu Kaaliiqaati» yiie.