HIZIQEELI 10 - Qullaawa Maxaafa

MAGANU AYIRRINYI QULLAAWU MININNI HO'LI

¹ Qoola afi'rino kalaqami umma iimaanni nooha xawannoha qalcho lawannoricho laummo. Kalaqamu aanano bulu dilqinni seekkinoonniha mootete barcima lawannore laummo.

² Maganuno waajjo shaalado uddano uddi'rino mancho, «Kalaqamu woroonni noo lami-qale mereeroonni higge sa'e ha'ri. Cilaattete kiffala cu'mite haadhe, katamu aana finci» yiisi. Anino la"anni hee'reennanni ha'ri.

³ Giddora ei woyite, kirubeeli Qullaawu Minira wodiidi ragaanni uurre no; giddoyidono gomichu diwe no.

⁴ Kaaliiqi ayirrinyi kirubeeli aaninni kae, Qullaawu Minira e'nanni xullicho mari. Hakkunni gedensaanni, gomichu Qullaawa Mine wo'mi. Qullaawu Mini nafarano Kaaliiqiti ayirrinyu caamile xawissu.

⁵ Kirubeeli buuwanno woyite macciishshinannihu qoollasi luuli, gobbaanni noo nafari geeshsha nafa macciishshamanno. Luulinsa Wo'manka Dandaanno Magani hirbi gedeeho.

⁶ Maganu hattenne waajjo shaalado uddano uddi'rino mancho, kirubeeli hunda noo lami-qale mereerinni giira haa'ranno gede hajaji. Hakkawoyintenni giddora e"e, qallate giddonni mittete mule uurri.

⁷ Kirubeeli giddonni mittu mereeronsa noo giira aaninni hiixate boode kiffalla haa're, waajjo shaalado uddano uddi'rino manchi anga wori; manchuno kiffalla haa're ha'ri.

⁸ Anino mittu mittunku kirubeeliti qoolaho woroonni noo anga mannunnite gedeeta ikkitinota afummo.

^9-10 Hattono mittu mittunku kirubeeli mule mimmito labbannota 4 lami-qale afummo. Hatti qallano dilqu kinchi gede xabbannote. Mitte mittenti qale, mimmitoho giddoonni qolle sayinse xaadinse seekkinoonnita labbanno.

¹¹ Qallano, hakku kalaqami alba hige noo widira higge hadhanno; qolteno kawanna ka'a higgukkinni kirubeeli hoode hadhanno.

¹² Bisinsaranna badhensara, anguwansaranna qoollansara, qalla nafa gattukkinni baalunkura illuwa noonsa.

¹³ Anino, «Daaddanno qalla!» yitanno huuro macciishshummo.

¹⁴ Mittu mittunku kirubeeli 4 alba afi'rino. Umihu bootu alba, layinkihu mannunniha, sayikkihu doobbiichunniha, shoolkihu qole allamurchu alba lawannoho.

¹⁵ Kuni kirubeelino alba Kebaari Wayi mule afummoho. Kirubeelino iima hige kae,

¹⁶ higiwano higiro, qallano ledonsa hadhanno. Qoollansa diriirsite buubbannowa baala ledonsa hadhanno.

¹⁷ Kirubeeli uurranno woyite, qallano ledonsa uurritanno; kirubeeli buuwannowa baala qallano ledo hadhanno. Togo ikkitannohu, kirubeeli yiinsata ikkitanno daafiraati.

¹⁸ Hakkunni gedensaanni, Kaaliiqi ayirrinyi Qullaawu Mini nafarchinni kae, kirubeelira iimaanni noo darga mare uurri.

¹⁹ Ani konne la"anni hee'reenna, kirubeeli qoollansa diriirsite baattote aaninni iimira higge buubbanno yannara, qallano ledonsa hadhu. Kaaliiqi Minira soojjaatoonni noohuwa huxxu waalchiwa iillite, mitte higge taxxi yitu. Israeelete Magani ayirrinyino aanansa no.

²⁰ Ani laummo woyite, Kebaari Wayi mule hee're Israeelete Magani hunda afummo kirubeeli ikkinota buuxummo.

²¹ Mitti mittinsara 4 albinna 4 qooli noonsa; mittu mittunku qoolira woroonni mannunnita labbanno anga no.

²² Albuwansano Kebaari Wayi mule afummo kirubeeli albuwa labbannote; mittu mittunku kirubeeli suwe alba hige ha'ranno.