FULO 9 - Qullaawa Maxaafa

Saadate goofo

¹ Kaaliiqi Musera, «Feriooniwa marte, ‹Ibiraawootu Magani Kaaliiqi magansi'rannoe gede manna'ya ha'rona aguri!

² Xaano agurattokkiha ikkiro,

³ saadakki baalante aana wolqaataamo dhibba tugeemmo; fardikki, harrekki, gaalikki, lalikki, ge'reewikkinna meikki goofanno.

⁴ Israeeletenna Gibitsete saada mereero badooshshe woreemmo; Israeelete saada giddonni mittuno direyanno.

⁵ Ani Kaaliiqi konne coye ga'a asseemmo› yiino yite kulisi» yii.

⁶ Kaaliiqi layinki soodo yiinonte gede assi; Gibitsootu saada baalanti reyite gooffu; Israeelete saada giddonni kayinni mitte nafa direyitino.

⁷ Feriooni ikkinore xa'meenna, Israeelete saada mitte nafa reyitinokkita kullisi; kuni duuchu ikke hee'reennanni wodanisi dillaawino daafira manna ha'rara diagurino. Darshe

Darshe

⁸ Hakkunni gedensaanni Kaaliiqi Musenna Aarooni, «Boosonni buluulo hoowunni cu'mitine haadhineenna, Muse Feriooni albaanni masse iima qole finchona;

⁹ kuni buluuli maniidhino buko gede ikke Gibitsete baatto baala tuqanno yannara, mannunna saadate aana shetissannota busha mada kalaqqanno darshe dagganno» yiinsa.

¹⁰ Insano shiima buluulo haadhe Feriooni albaanni marte uurritu; Muse iima qole fincita, mannunna saadate aana mada kalaqqanno darshe kalaqantu.

¹¹ Bittannorino darshitino daafira, Muse albira shiqa didandiitino.

¹² Kaaliiqi kayinni Feriooni wodana dilleessi. Isino balaxe kulinonte gede Feriooni Musenna Aarooni yitinore dimacciishshino. Kaade

Kaade

¹³ Hakkunni gedensaanni Kaaliiqi Muse, «Ga'a soodo gutte ka'e Feriooniwa marte, ‹Ibiraawootu Magani Kaaliiqi, magansi'rannoe gede manna'ya ha'rona aguri;

¹⁴ giwittoro kayinni, gobba baalate aana ane gedeehu wolu nookkita afatto gede, ledokki gashshaanonna mannakki calla ikkikkinni, ate umokkino wolqaataamu qoomaminni ganeemmo.

¹⁵ Atenna mannakki dhibbunni ganoommoro, baalunku baattote aaninni gooffinanni.

¹⁶ Kayinnilla, reyattokki gede assoommohehu, wolqa'ya afatto gedenna su'mi'ya gobba baalate ayirranno gede assateeti.

¹⁷ Kuneeti xaa geeshsha kakkachite manna'ya agura giwootto.

¹⁸ Xa maahoyyena, ga'a tenne yannara, kunni albaanni Gibitsete baattora dirrite egentinokkita akkimale kaade dirriseemmo.

¹⁹ Kunnira, xawoho noo saadanna gobba noo jajja baala minira qollanni gede hajaji; minira einokki mannanna saada baalanta kaade dirrite guddanno› yite kulisi» yii.

²⁰ Feriooni ledo gashshaano giddonni mitu mitu Kaaliiqi coyi'rino coye waajjitino daafira, borojjensanna saadansa minira qo'litu.

²¹ Kaaliiqi coyi'rinore lashshi assituri kayinni, soqqamaanonsanna saadansa gobba agurtu.

²² Hakkunni gedensaanni Kaaliiqi Muse, «Gibitsete baattora kaade xeenimma dirrite manna, saadanna gate noo jajja baala gantona, angakki iima qolte kayisi» yiisi.

²³ Museno siqqo iima qole kayisi; Kaaliiqino beleqonna kaade dirrisi; banqono baatto hawuurtu. Gibitsete baattora kaade xeenimma dirritu.

²⁴ Lowo geeshsha bati'ra kaade, banqotenna belequ ledo dirritu; togoo kaade Gibitsete gobbara horonta dirrite diegentino.

²⁵ Kaade Gibitsete gobbara xawoho noore baala, mannunna saadano gattukkinni cancantu; gate noo jajja baala cancanteeenna, haqqeno hiiqqaqqante uulla ubbu.

²⁶ Kaade Israeelete manni hee'rannowa Geeseemi Baattora calla didirritino.

²⁷ Feriooni Musenna Aarooni woshshe, «Cubbo loosoommota xa afoommo; Kaaliiqi garaho; aninna manni'ya kayinni so'noommo.

²⁸ Xaate tini wolqaataame kaadenna belequ ikkinonkena, Kaaliiqa huuccenke; hadhinanni gede agureemmo'ne; kunni ka'a konniicho dikeeshshitinanni» yiinsa.

²⁹ Museno Ferioonira daware, «Katamunni fulayi hee'renni anga'ya kayise Kaaliiqa huucceemmo; belequnna kaadeno uurritanno; atino baatto Kaaliiqita ikkitinota afatto.

³⁰ Atinna ledokki gashshaano Kaaliiqa Magano waajjitinannikkire ikkitinoonnita afoommo» yiisi.

³¹ Dare noo hayixinna daraarte noo shalaalano co'o yite ba'u.

³² Qamade kayinni aja noo daafira, ba'ukkinni gattu.

³³ Muse Feriooniwiinninna katamu giddonni fule ha'ri; angasi fane Kaaliiqa huucceenna, belequ, kaadenna xeenu hakkawoyintenni uurri.

³⁴ Feriooni kayinni, kuni coyi uurrinota afihu gedensaanni, galagale cubbo loosi; isinna ledosi gashshaanono wodanansa dilleessitu.

³⁵ Feriooni wodanino dillaawi; Kaaliiqi Muse widoonni qole coyi'rinonte gede, Feriooni Israeele hadhara diagurino.