FULO 8 - Qullaawa Maxaafa

Beche'naama

¹ Hakkunni gedensaanni Kaaliiqi Musera, «Feriooniwa marte, ‹Kaaliiqi, ha're soqqamoena manna'ya aguri;

² giwittoro kayinni gobbakkira beche'naama wo'mitanno gede asseemmo.

³ Abbayi Wayira beche'naama wo'mitanno daafira, hakkiinni fulte mootete minira, galattowa, daallasikki aanira, ledokki gashshaanonna mannikki minna, hattono boosaallikkiranna gidekki worranni uduunni giddora nafa e'anno.

⁴ Beche'naama kukkubbitanni atewa, mannikkiwanna ledokki gashshaasine baalunkuwa dagganno yiino› yite kulisi» yii.

⁵ Kaaliiqi Musera, «Beche'naama fulte Gibitsete baatto baala wo'mitanno gede, xashshuwatenna kofamma baalate aana siqqo kayisona Aaroonira kuli» yii.

⁶ Aaroonino Gibitsete wayi baalu aana siqqosi kayisi; beche'naamano fulte baatto wo'mitu.

⁷ Ikkollana, bittannorino hattonni bitansanni beche'naama Gibitsete baatto tuqqanno gede assitu.

⁸ Ferioonino Musenna Aarooni woshshe, «Kaaliiqira kakkalanno gede manna'ne agureemmona, beche'naama anenna manni'ya aaninni hoolanno gede Kaaliiqa huucce"e» yiinsa.

⁹ Museno, «Atera, ledokki gashshaanoranna mannikkira huucceemmo'nena ati hasi'ratto yanna kulie; hakkunni gedensaanni beche'naama atenna minikki baalu aaninni ho'lite Abbayi giddo calla heedhanno gede asseemmo» yee dawari.

¹⁰ Ferioonino, «Hakkawoyiteetiro ga'anni huuccie» yii. Museno, «Maahoyye yootto gede asseemmo; atino Maganinke Kaaliiqi gedeehu wolu magani nookkita hakkawoyite afatto.

¹¹ Beche'naama ate aaninni, minikki giddonninna soqqamaasinekki, ledokki gashshaanonna mannikki baalu aaninni ho'litanno. Abbayi Wayi giddo calla heedhanno» yiisi.

¹² Hakkunni gedensaanni, Musenna Aarooni Feriooniwiinni fulte hadhu; Ferioonira soyino beche'naama hoolanno gede Muse Kaaliiqa huucci.

¹³ Muse huuccinonte gede Kaaliiqi minnate, hoobbatenna xawo baalaho noo beche'naama reyite gooffanno gede assi.

¹⁴ Gibitsootuno beche'naama baalanta gamba assite base basete duuntu; bowanyeno gobba wo'mitu.

¹⁵ Feriooni beche'naama reyitinota afiti, wodanasi dilleesse Kaaliiqi coyi'rinonte gede Musenna Aarooni yitinota macciishsha giwi. Biinne

Biinne

¹⁶ Kaaliiqi Musera, «Baattote aana noo buko siqqotenni gananno gede Aaroonira kuli; hakkunni gedensaanni, Gibitsete baattora noo buko biinnete soorrantanno» yiisi.

¹⁷ Aaroonino angasi gotti asse siqqotenni baattote aana noo buko gani; Gibitsete baattora noo buko baalanti biinnete soorrantu; biinneno mannunna saadate aana tuuddu.

¹⁸ Bittannorino bitansanni biinne qalantanno gede wo'naa'ltu; kayinnilla heddino gede di"ikkinonsa. Biinnete woyite base baala wo'mitu.

¹⁹ Bittannorino, «Kuni Maganu loosooti» yite Ferioonira kultu; Feriooni wodani kayinni dillaawe no; Kaaliiqi coyi'rinte gede Musenna Aarooni yitinore dimacciishshino. Toronde

Toronde

²⁰ Kaaliiqi Musera, «Ga'a soodo gutte Feriooniwa marte wayi laga dirranna xaadi; Kaaliiqi, ‹Magansi'rannoe gede manna'ya ha'rona aguri!

²¹ Giwittoro kayinni ateranna minikkira, ledokki gashshaanoranna mannikki baalaho toronde soyemmo; Gibitsete minnara torondu wo'manno; baattono toronde calla ikkitanno.

²² Manni'ya hee'rannotera Geeseemi Baattora kayinni torondu hee'rannokki gede asseemmo; konne asseemmohuno, ani Kaaliiqi tenne Gibitsete gobbara loosanni noommota afatto gedeeti.

²³ Mannikkinna manni'ya mereero badooshshe woreemmo; tini maalaleno ga'a barrinni ikkitanno› yiino yite kulisi» yii.

²⁴ Kaaliiqi yiinonte gede, Feriooni minenna ledosi gashshaano minna baalate torondu tuudanno gede assi; Gibitsete baatto gudise torondu ewelo huni.

²⁵ Hakkunni gedensaanni, Feriooni Musenna Aarooni woshshe, «Martine hakko heedhinoonniwa Gibitsete gobbara Magani'ne Kaaliiqira kakka'le» yiinsa.

²⁶ Museno, «Hatto assa digaraho; ninke Maganinke Kaaliiqira kakkalleemmo kakkalo Gibitsootaho lagote; tenne saada insa affanna kakkallummoro aarante kinnatenni gante dishitannonke?

²⁷ Kunni daafira, Kaaliiqi hajajinonke garinnni 3 barri doogo halallira ha'ne kakka'la hasiissannonke» yii.

²⁸ Feriooni daware, «Xeertidhine hadhinannikkiha ikkiro, halalla martine Magani'ne Kaaliiqira kakkaltinanni gede agureemmo'nena, anerano huucce"e» yii.

²⁹ Museno, «Ga'a barrinni torondu ate aaninni, ledokki gashshaanonna mannikki aaninni ho'lanno gede xaanni Kaaliiqa huucceemmo; kayinnilla albi gede dogge mannu ha're Kaaliiqira kakkalannokki gede hooltooti» yii.

³⁰ Muse Feriooniwiinni fule ha're Kaaliiqa huucci.

³¹ Kaaliiqino Muse huuccinonte gede assi; toronduno Feriooni, ledosi gashshaanonna mannu baalunku aaninni mittuno gatikkinni kae ho'li.

³² Ikkollana Feriooni wodanasi dilleesse, Israeelete manna ha'ra hooli.