FULO 7 - Qullaawa Maxaafa

¹ Kaaliiqi Musera, «Ani ate Ferioonira Maganu gedeeha assoommohe; rodiikki Aarooni atera himanaancho ikke coyi'ranno.

² Ani hajajeemmohere baala Aaroonira kulisi; isino Israeele gobbasinni fultara aguranno gede Ferioonira kulona.

³ Ikkollana ani Feriooni wodana dilleesseemmo; kunninni kainohunni Gibitsete gobbara aye geeshshi maalale asseennano,

⁴ yitinannire dimacciishshanno; hakkunni gedensaanni, Gibitsete gobbara lowo qarra abbe manna'ya Israeele hakkiinni haa're fushsheemmo.

⁵ Kunni garinni hanqunnita anga'ya aanansa kayise Israeele insa gobbanni fushsheemmo yannara, Gibitsootu ani Kaaliiqa ikkoommota affanno» yiisi.

⁶ Musenna Aaroonino Kaaliiqi yiinonsare baala wonshitu.

⁷ Feriooni ledo hasaabbu yannara, Musera 80 dirosiiti; Aaroonira qole 83 dirosiiti.

AAROONI SIQQO HAMASHSHO IKKITU

⁸ Kaaliiqi Museranna Aaroonira,

⁹ «Feriooni, ‹Ewelumma'ne afeemmo gede hanni maalale assitine leellishshe"e› yii'nero, Aarooni siqqosi Ferioonira albaanni tugona; hatte yannara siqqo hamashsho ikkitanno» yiinsa.

¹⁰ Kunnira, Musenna Aarooni Feriooniwa marte Kaaliiqi hajajinonsa gede assitu; Aarooni siqqo Feriooninna ledosi gashshaano albaanni tuganno woyite hamashsho ikkitu.

¹¹ Hakkunni gedensaanni, Feriooni hayyoolenna bittannore woshshi; insano bitansanni Aarooni assi gede assitu.

¹² Siqquwansa uulla tuggu yannara, soorrante hamaso ikkitu; ikkollana Aarooni siqqicho egemmite guddunsa.

¹³ Kuni duuchu ikkihu gedensaannino, Feriooni wodanasi dilleessi; Kaaliiqi coyi'rinonte gede Musenna Aarooni yitinore macciishsha giwi. Wayi mundeete soorrami

GIBITSETE TONNU MAALALETE QOOMAMI DIRRI ( )

Wayi mundeete soorrami

¹⁴ Hakkunni gedensaanni Kaaliiqi Muse, «Feriooni wodanasi dilleesse, ‹Manna diagureemmo› yiino.

¹⁵ Kunnira soodo gutte Feriooniwa mari; wayi laga dirrinohunni xaadatto; hamashsho ikkitu siqqo anga haadhe marte wayi gama agari.

¹⁶ Xaadatto woyite, ‹Ibiraawootu Magani Kaaliiqi mannisi ha're halalla magansi'rara aguratto gede kulammohera soyinoe; ati kayinni kune techo geeshsha diagurootto.

¹⁷ Xa kayinni Kaaliiqi ayimma afatto; kuneeti, ani tenne siqqonni Abbayi Waa ganeemmo; wayino mundeete soorramanno.

¹⁸ Giddo noo qulxu'mi baalu ree goofanno; wayino lowo geeshsha bowanno; Gibitsootu konne waa aga didandiitanno› yiino yite kuli» yiisi.

¹⁹ Kaaliiqi Musera, «Aarooni Gibitsete gobbara noo wayibba, xashshuwatenna kofamma baalate aana siqqo kayisanno gede kulisi; hattenne yannara wayi baalu mundeete soorramanno; haqqunninna kinchunni seekkinoonni uduunni giddo noo wayi nafa gatikkinni mundee ikkanno» yii.

²⁰ Musenna Aaroonino, Kaaliiqi hajajinonsa gede assitu; Aaroonino Feriooninna ledosi gashshaano alba siqqo kayise Abbayi Waa gani. Wayino gudisame mundeete soorrami.

²¹ Wayi giddo noo qulxu'mi baalu ree goofi; wayi bowino daafira, Gibitsootu agate didandiitino. Gibitsete baatto baala mundee calla ikkitu.

²² Hakkunni gedensaanni, Feriooni bitaammi bitansanni hattonni assitu; isino wodanasi dilleessi; Kaaliiqi yiinonte gede, Musenna Aarooni yitinoreno macciishsha giwi.

²³ Yinoonni coye baala maanko yiikkinni galagale minira ha'ri.

²⁴ Gibitsootu Abbayi Waa agate dandiitinokki daafira, agganno waa afi'rate Abbayi gama bue u'mitu.

²⁵ Kaaliiqi waa mundeete soorrinkunni 7 barra ikki.