FULO 5 - Qullaawa Maxaafa

MUSENNA AAROONI GIBITSETE MOOTE ALBIRA SHIQQU

¹ Hakkunni gedensaanni Musenna Aarooni Feriooniwa marte, «Israeelete Magani Kaaliiqi, ‹Halalla mare ane ayirrisate jila jilona manna'ya aguri› yiinohe» yitusi.

² Ferioonino, «Isi afummona, Kaaliiqi ayeti? Isi yiinota macciishshe Israeele mayira agureemmo? Ani Kaaliiqa diegennoommo; Israeeleno hadhara diagureemmo» yii.

³ Musenna Aaroonino, «Ibiraawootu Magani ninke ledo xaadino; halallira sasu barri doogo ha'ne Maganinke Kaaliiqira kakkalo shiqishi'neemmona agurinke; konne assa hoongummoro, dhibbunninna bagadunni goonfeemmo gede assannonke» yite dawartusi.

⁴ Ferioonino, «Ki'ne Musenna Aarooni, manna loosa mayira hooltinanni? Xa ka'ine konne manna loosoho ha'ranno gede asse!

⁵ Ki'ne kiirotenni Gibitsoota roortinoonni; ki'ne lamunku qoltine manna loosannokki gede assitinanni heedhinoonni!» yiinsa.

⁶ Hakko barranni Feriooni kaajjadda Gibitsoota loosiissannonsa gedenna insara roorroota ikkitanno gede hajajanni:

⁷ «Xuube seekkate albi gede cide ki'ne uyitinoontensa; cide uminsa hasse abbitona.

⁸ Alba seekkitanno xuubewiinni mitteno kiiro xe'ukkinni shiqishshanno gede asse. ‹Ha'ne Maganinkera kakka'li'neemmona agurinke› yitanni qarrissanni nooehu cee'maleeyye ikkitino daafiraati.

⁹ Haafare macciishshitanno yanna heedhukkinni, loosu duu're amadannonsa gede asse» yii.

¹⁰ Israeele loosiissannori kaajjaddu Gibitsootinna roorrootinsa marte mannaho, «Moote kunni ka'a cide uyinanni'nekki gede hajajino.

¹¹ Kunnira, umi'ne hassine abba hasiissanno'ne; kayinnilla seekkitinanni xuube kiiro albitewiinni xe'oonke» yitunsa.

¹² Mannuno cide hasi'ranni Gibitsete gobba baala tuqi.

¹³ Gadadissanno Gibitsootino, «Barru barrunkunni alba cide shiqinshanna seekkitinanni geeshshi xuube kiiro xe'ukkinni seekkitine shiqishshe» yite gadachitunsa.

¹⁴ Israeele gadadissanno Gibitsooti, loosiissara worroonnire Israeelete murroota, «Techo albite geeshshi xuube seekkitine shiqisha mayira hoogginoonni?» yitanni gantunsa.

¹⁵ Loosiissannori Israeelete murrooti mootenniwa marte, «Moote, ninke soqqamaanokki togo mayira assittonke?

¹⁶ Cide uyininkekkinni xuube seekkineemmo gede hajanjoonninke; kunni aanano gannanni hee'noonninke; tenne beebba assidhannonkeri kayinni ate mannaati» yite ku'litu.

¹⁷ Feriooni daware, «Ki'ne horonta looso baxxinannikki cee'maleeyyeeti. ‹Ha'ne Kaaliiqira kakka'lineemmona agurinke!› yitinannihu kunniraati.

¹⁸ Xa ka'e loosunniwa marre! Cide horonta diuyinanni'ne; ikkeennano alba seekkitinanni xuubewiinni kiiro xeissinikkinni shiqisha hasiissanno'ne» yiinsa.

¹⁹ Israeelete roorrooti, kiiro albitewiinni xe'inokki xuube seekkite shiqisha hasiissannonsata buuxxuhu gedensaanni qarru amadinonsata affu.

²⁰ Feriooniwiinni fultanni heedhenni, agarte noonsarinni Musenninna Aarooninni xaaddu.

²¹ Insano Musenna Aarooni, «Feriooninna ledosi gashshaano illete gibbannonke gedenna shitannonke gede assitinoonnita Kaaliiqi afino; tenne isi yoo'ne!» yitunsa.

MUSE KAALIIQA ABBOOSHSHI'RI

²² Muse galagale hige Kaaliiqira, «Kaaliiqa, konne manna mayira shetisatto? Aneno kawiira mayira soyittoe?

²³ Ani ate su'minni coyi'rate Feriooniwa shiqummonkunni mannu aana qarra batisino; atino konne manna gatisate assoottori dino» yii.