FULO 39 - Qullaawa Maxaafa

QEESOOTU IMAANA QIXXEESSINOONNI GARA

¹ Qeesootu Qullaawa Mine soqqantanni uddidhanno imaana bule, xiillittenna duume shalonni gantu; Aarooniha qullaawa imaana Kaaliiqi Musera hajajino garinni qixxeessitu.

² Culkaame gagasu uddano bule, xiillittenna duume shalonni gantu.

³ Culka gante maniissite xilatu gede assite murmurtu; qolteno heqote gede murmurte karsite hayyotenni bule, xiillittenna duume shalonni seesallitte uddano gantu.

⁴ Gagasu uddano duu'ri'nanni kasa, lamenka widoonni wortu.

⁵ Kaaliiqi Musera hajajino garinni culku xilatinni bule, xiillittenna duume shalonni seekkine gannoonni hiito mittu daninni gagasu uddano ledo mitteenni seekkitu.

⁶ Dilqu kinna culku migiri aana worte aanaho, tonaa lamente Israeelete ga're su'ma borreessitu.

⁷ Hakkunni gedensaanni, Kaaliiqi Musera hajajino garinni, Kaaliiqira mannasi qaagiissitannota Israeelete ooso su'ma borreessinoonni kinna, gagasu uddano aana wortu.

GAGASU KIISE SEEKKINOONNI GARA

⁸ Gagasu kiiseno ogimmatenni gagasu uddano seekkini garinni seekkitu.

⁹ Iseno shoolenka raga taashshine erroonnite; seendillenna godowa mitte mitte taakkooti.

¹⁰ Dilqa kinna 4 dirinni wortu; umi dirira duumo, baqqalanna daama xawado dilqa,

¹¹ layinki dirira haanja xoxxorraamo, bulenna hincilaallaamo dilqa,

¹² sayikki dirira duumo, daama xoxxorraamonna xiillicha dilqa,

¹³ shoolki dirira bule, burcuqqaamonna haanja dilqa wortu. Kuri baalunku gaangaawira culku shura seekkitu.

¹⁴ Tonaa lamenta Israeelete ga're qaagiissate, mitte mittente Israeelete ga're su'minni 12 kinna wortu.

¹⁵ Gagasu kiisera filu culkinni siiwimma gannoonni meqeerraasine wortu.

¹⁶ Lame culku migiranna lame culku cuue seekkite gagasu kiisera lamenka widoonni xaadisse wortu.

¹⁷ Lamenka culku meqeerraasine gagasu kiisera ka'aanninna kawaanni noo cuu'a ledo xaadissu.

¹⁸ Wole lamu meqeerraasinchi qacce lamunku migiri ledo xaadissu; kunni garinni qotu aanaanni dirranno kasa gagasu uddanohu ledo xaadissu.

¹⁹ Lame culku cuu'a seekkite, gagasu uddanora aante nootera gagasu kiisetera lamente qacce ledo xaadissu.

²⁰ Hakkunni gedensaanni 2 culku cuue seekkite, gagasu uddanora lamunku qoti kasira woroonni seekkine gannoonni hiito xaadinsannitera aleenni qolte mitteenni amadisiissu.

²¹ Kaaliiqi Musera hajajino garinni gagasu kiise aana noo cuu'a, gagasu uddanora noo cuu'a ledo bulu fatilchinni usurtu; gagasu kiise hiitote aleenni noo daafira shoshshoggitannokki gede assite duudhu.

WOLE QEESETE IMAANA SEEKKINOONNI GARA

²² Gagasu uddanora giddoonni uddi'nanni qamise, bulu xilati callunni gannoonnite;

²³ qamisete goowa worre, dadhantannokki gede erre goondoonni.

²⁴ Qamisete handaarira seekkine suqqinoonnitenni bule, xiillittenna duume shalonni shaffo seekkitu.

²⁵ Filu culkinni bilbilla seekkite, shaffote mereero qaamo qaamo assite wortu.

²⁶ Kaaliiqi Musera hajajino garinni, Aarooni soqqanshote fulanno yannara, tenne handaaraho bilbilanna shaffo qaamo qaamo worroonni uddano uddi'ranno.

²⁷ Aarooniranna oososira shaashshine suqqinoonni fuuttinni shamissa gantunsa;

²⁸ qolteno umoho xaaxi'nanniha, wodhinanni koffiyanna luko shaashshine suqqinoonni fuuttinni seekkitunsa.

²⁹ Qodhinanni hiitono Kaaliiqi Muse hajajino garinni, shaashshine suqqinoonnihunni bulu, xiillichunna duumu xilatinni borreessine gannoonnite.

³⁰ Filu culkinni qullaawa ba'lattora malaate worte seekkite, aanaho «Kaaliiqira baxxitinote» yite borreessitu.

³¹ Iseno, Kaaliiqi Muse hajajino garinni, umoho xaaxi'nanni koffiyira albaanni bulu xilatinni usurtu.

BAALUNKU LOOSI JEEFO

³² Kaaliiqihu Qullaawu Dukkani loosi goofi; Israeele baalanka coye Kaaliiqi Musera hajajino garinni assitino.

³³ Dukkananna ledo uduunne baalanka Musewa haadhe abbitu; uduunnuno: Qarabbate, waalchuwate, waawannate, tuuqqatenna lekkuwansaati.

³⁴ Guggushshinanniha duumo ge'rechu goga, cuukkinoonni goga, Qullaawu Holgi dukko,

³⁵ bocame kinna worroonniha Gondooru Taaboota, dawaayyenna maarote barcima,

³⁶ xarapheezzanna ledosi uduunne, Kaaliiqira shiqinshanniha qullaawa tima,

³⁷ filu culkinni seekkinoonniha caabbicho worranni uduunnicho, dirroonni caabbiyyenna ledonsa uduunne, caabbiyyete zayitenna ledo uduunne baala,

³⁸ culkunni seekkinoonniha hixaana giirranni uduunnicho, buurranni zayite, tanni yee su'naanno hixaana, Dukkanu xullichira seekkinoonni dukko,

³⁹ camotenni seekkinoonniha kakkalote uduunnichonna camonniha buluulo sayisanno uduunnicho, dawaayyenna ledonsa uduunne, hayishshi'nanni saanenna shaese,

⁴⁰ Dukkanu nafarira ikkitanno dukkuwa, tuuqqanna lekkuwansa, nafaru xullichira seekkinoonni dukkonna siibba, Dukkana bedeendanni ciffanna Dukkanu giddo uduunne,

⁴¹ qeesichu Aarooninna oososi soqqantanno yannara uddidhannoha qullaawanna biifado imaanaati.

⁴² Israeelete manni, Kaaliiqi Musera hajajino garinni baalanka looso loose gudi.

⁴³ Museno loosamino looso baalanka lai woyite, Kaaliiqi hajajino garinni loosaminota afi. Isino manna maassi'ri.