FULO 36 - Qullaawa Maxaafa

¹ «Baasilaeeli, Oholiaabinna wolootu Qullaawu Dukkanira hasiisannore seekkitanno gede Kaaliiqi hayyonna ogimma uyinonsari baalu Kaaliiqi hajajinore assitanno» yii.

MANNU UYINO AFANSHI BATINYE

² Muse Baasilaeeli, Oholiaabinna Kaaliiqi ogimma uyinonsarenna loosoho shiqanno gede umisinni kainoha baala woshshi.

³ Insano, Israeele Qullaawu Dukkani loosira ikkanno gede abbitinore baala Muse anganni haadhu; mannuno soodo soodontenni agurikkinni afanshansa Musewa haa're abbi.

⁴ Hakkunni gedensaanni, Qullaawa Dukkana seekkitanno ogeeyye baala loossanno looso agurte dagge Musera,

⁵ «Mannu Kaaliiqi hajajino loosira hasiisannohura aleenni bati'ra afansha abbanni no» yite kultusi.

⁶ Museno mannu hakkiinni sayise Qullaawu Dukkanira ikkanno afansha abbannokki gede qacha manna soyi. Mannuno afansha abba uurrisi.

⁷ Abbitino afanshino hendoonni loosira ikke gatannoho.

QULLAAWA DUKKANA SEEKKINOONNI GARA

⁸ Loossannori giddonni egennantino ogeeyye, Qullaawa Dukkana 10 dukko ledo seekkitu; Dukkana seekkitinohuno kirubeeli misile ledo bule, xiillittenna duume shalonniiti.

⁹ Mitte mittenti dukko hojja 28 cigile, godowa 4 cigile ikkitanno; baalanti dukko taalote.

¹⁰ Onte dukko mitto widoonni, onte mitto widoonni xaadisse gobbu.

¹¹ Mittu widiidi dukko handaarira bule shalonni ilo wortu; wolu widiidi dukkorano hatto assitu.

¹² Xaadinsoonni dukko mittu widiiditera 50 ilo wortu; layinki widiidi dukkorano 50 ilo wortu.

¹³ Lamunku widiidi dukko xaadisannoha 50 culku qarawa seekkitu.

¹⁴ Meu ordanni dukkana dimbannita 11 dukko seekkitu.

¹⁵ Baalanti dukko taalte, hojja 30 cigile, godowa 4 cigile ikkitanno.

¹⁶ Onte dukko mitto widoonni, lee dukko mitto widoonni worte xaadisse gobbu.

¹⁷ Xaadinsoonni dukko giddonni qaccete dukkora 50 ilo wortu; layinkiterano hattonni assitu.

¹⁸ Dukko mittowa xaadisate 50 camote qarabba seekkitu.

¹⁹ Dukkanaho aanaanni dimbanniha duumo ge'rechu goganna, cuukkinoonni goga seekkitu.

²⁰ Dukkanaho suwashsho waacconni waalcho seekkitu.

²¹ Baalunku waalchi hojja 10 cigileeti; godowa 1 cigilenna darateho.

²² Mittu mittunku waalchi mimmitunni xaadisannoha 2 qara afi'rino.

²³ Dukkanaho wodiidi ragaanni 20 waalchi no;

²⁴ lemoonte waalchuwara woroonni birrunni seekkinoonniti 40 lekkuwa no; mittu mittunku waalchira woroonni lamunku qarira lame lame lekkuwa noonsa.

²⁵ Dukkanaho aliyye ragaanni 20 waalchuwa wortu.

²⁶ Mittu mittunku waalchira woroonni lame lame lekka worteenna, mitteenni 40 ikkitu.

²⁷ Dukkanaho badheenni galchimi ragaanni 6 waalcho wortu.

²⁸ Dukkanu madde baalate badheenni lame lame waalchuwa wortu.

²⁹ Maddete noo waalchuwa alinni woro geeshsha xaaddinote; lamente maddera noorino hakkuyi garinni seekkinoonnireeti.

³⁰ Sette waalchuwara mittu mittunkura lame lame birrunni seekkinoonni lekkuwa noonsa.

³¹ Waaccote haqqinni 15 waawanna seekkitu; kunni garinni mittu widiidi waalchuwara onte waawanna wortu;

³² onte wole widoonni noo waalchuwara wortu; onte dukkanaho badheenni galchimi ragaanni noo waalchuwara wortu.

³³ Mereeri waawanchi waalchuwate hi'ra amade qaccetenni qaccete geeshsha iillanno.

³⁴ Waalchuwateno culka xallitu; waawanna giddoonni qolle sayinsanni kassa culkunni seekkite, waawannateno culka xallitu.

³⁵ Dukkuwa bule, xiillittenna duume shalonni seekkite, seesiinsoonnita kirubeeli misile aanaho qa'missu.

³⁶ Shoole tuuqqa waaccote haqqinni seekkite, aanaho culka xallitu; dukko waalchu ledo xaadinsanni qarabba culkunni seekkite, 4 birru lekkuwa wortunsa.

³⁷ Dukkanu xullichira bule, xiillittenna duume heqonni goonde seekkinoonni dukko wortu.

³⁸ Onte dawaayye qarabbate ledo wortu; gumayichuwansanna daabbuwansa aana culka xallitu; ontenta lekkuwano camotenni seekkitu.