FULO 34 - Qullaawa Maxaafa

LAYINKIMEESHSHO SEEKKINOONNITA BOCAME KINNA

¹ Kaaliiqi Musera, «Hiiqqite hunittori aana noo hajajo borreesseemmona, 2 bocame kinna albiri gede assite seekki.

² Qixxaabbe galte, soodo guto ane ledo xaadate Siina Ilaali birxe fuli.

³ Ledokki mittuno dayonke; mittuno ilaalu aana leelloonke; mitte saadano hayisso ittara ilaalu hundira shiqqoonke» yiisi.

⁴ Museno albiri gede asse 2 bocame kinna seekki; soodimaroho gute Kaaliiqi yiisinte gede lamenta bocame kinna haa're Siina Ilaala fuli.

⁵ Kaaliiqi gomichu giddoonni hige dirre hakko isi ledo uurre, ani Kaaliiqaati yee qullaawa su'masi kulisi.

⁶ Kaaliiqi albasiinni hige sa"anni Musera, «Ani Kaaliiqi maareemmohonna hanqoho muddameemmokkiho; mararaancho Maganooti; ammanama'yanna bagamannokkihu baxilli'ya bati'raho.

⁷ Bagamannokkihu baxilli'ya kumunni kiirranni ilamara iillanno; sao, sarxonna cubbo agureemmo; ikkirono, sao assinoha horonta dikeereenseemmo; annuwate cubbira ooso sasenna shoole ilama geeshsha qorichisheemmo Maganooti» yee kulisi.

⁸ Museno rahe umosi heeshshi asse Kaaliiqira kumbuuli,

⁹ «Mooticha'ya ballo, baxattoeha ikkiro, kuni manni mokkookka ikkirono, ledonke fulatto gede huucci'reemmohe; cubbonkenna saonke agurte mannakki assi'rinke» yii.

GONDOORU HAAROO'MA

¹⁰ Kaaliiqi Musera, «Kuneeti ani ki'ne ledo gondooro e"eemmo; manni'ne baalu albaanni, baattote aana noo manni mereero anfe egenninoonnikki maalale asseemmo; ani mulekki asseemmo coyi waajjishannohona, kuni ledo nootto mannino dhagge'ya la"anno.

¹¹ Techo barrinni hajajeemmohe hajajo agadhi; anino Amooraawoota, Kana"aanoota, Hitoota, Ferizoota, Hiwootanna, Iyaabuusoota albi'nenni shorreemmo.

¹² Woshshaadote giddora eessanno'nena, martinanni gobba manni ledo namoontinoonte.

¹³ Kakkalote darguwansa hiiqqaqqe; magansidhanno sooddiyye cancanne; Asheera yinanni maganota kakkalote mokkollo murmurre.

¹⁴ Ani Kaaliiqi hinaasaancho Maganootina, wole magano magansidhinoonte.

¹⁵ Magannansa ledo foortanno woyitenna kakkalo shiqishidhanno woyite ki'neno woshshite kakkalote sagale itissanno'nena, hatte gobba manni ledo namoontinoonte.

¹⁶ Ooso'nera insa seenne haadhiniro, kaphunnita magannansa magansidhanno gede asseenna, anera ammanantannokkire ikkitanno.

¹⁷ Magansi'rate yitine siwiila daashshitine misilla seekkidhinoonte.

¹⁸ «Timu Ayyaana ayirrisse; Gibitsetenni fushshoommo'ne barra ikkino daafira, hajajoommo'ne garinni Abiibi aganira 7 barra shiishinokki tima itte.

¹⁹ Umo ilamino beettinna umo qalantino saada baala anete.

²⁰ Umo qalamino harricho ge'rechu wilii'lichinni woxxe; woxxa hoogginiro kayinni haxo hiiqqe. Labballi ooso'ne baala woxxe. Ane albira ayino mulla anganni shiqoonke.

²¹ «Lee barra loosidhe; lamalki barra kayinni fooliishshidhe; wixi'nanninna mixxinanni yannara nafa lamalki barra fooliishshidhe.

²² Umi qamade gamba assidhinanni yannara, Gide Gamba Assi'rate Ayyaana ayirrisse; diru goofimarchira laalo gudhitinanni yannano ayirrisse.

²³ Labbaahu baalu ane Israeelete Magano Kaaliiqa magansi'rate dirunni 3 hige shiqona.

²⁴ Daga albi'nenni hooleemmo; gobba'neno halashsheemmo; dirunni 3 higgine ane Magani'ne Kaaliiqi albira shiqqinanni yannara, baatto'ne ayino diyoranno.

²⁵ «Saada kakkaltinanni yannara, shiishshino sagale ledo shiqishshinoonte; Mararrote Ayyaanira gorrinoonni saada maala soodora gashshitinoonte.

²⁶ Baatto'ne laalcho umiha ane Magani'ne Kaaliiqi minira abbe. Wilii'licho amate adonni gaffinoonte» yiisi.

²⁷ Kaaliiqi lede Musera, «Atenna Israeelete ledo gondooro e"eemmohu kunni garinniitina, kulummohere baala borreessi» yiisi.

²⁸ Hakkiicho Muse itikkinninna agikkinni Kaaliiqi ledo 40 barranna 40 hashsha keeshshi. Tonnenta gondooru hajajono bocame kinna aana borreessi.

MUSE SIINA ILAALI AANINNI DIRRI

²⁹ Muse Siina Ilaalinni dirri yannara, tonnenta hajajo borreessinoonniti lamenti bocame kinna angasi no; Kaaliiqi ledo hasaawanni keeshshino daafira, dirri woyite albisi xawanni no; isi kayinni xawanni noota diafino.

³⁰ Aarooninna Israeelete manni baalu Muse la"anno woyite albisi xawanni noo daafira, mulisira shiqqi yaa waajji.

³¹ Muse kayinni woshsheennansa, Aarooninna gosate roorrooti baalu isiwa daggu; isino hasaawisinsa.

³² Hakkunni gedensaanni Israeelete manni baalu shiqeenna, Kaaliiqi Siina Ilaalira uyinosi hajajo baala kulinsa.

³³ Muse insa ledo hasaawa gudihu gedensaanni albasi diphi.

³⁴ Kaaliiqi ledo hasaawara Dukkanu giddora eanno yanna baalantera guggu'linoricho aaninni hoo'lanno; hakkiinni fulanno woyite, Kaaliiqi hajajinosire baala Israeelete mannira kulanno.

³⁵ Israeelete manni xawinoha Muse alba la"anno; isi qole Kaaliiqi ledo hasaawara ha'ra geeshsha albasi diphanno.