FULO 33 - Qullaawa Maxaafa

KAALIIQI ISRAEELE SIINA ILAALINNI KA'E HADHANNO GEDE HAJAJI

¹ Kaaliiqi Musera, «Gibitsetenni haadhe fushshootto manni ledo, Abirihaamira, Yisihaaqiranna Yaiqoobira, ‹Sirchi'nera eemmo› yee xaaroommo baatto ka'ine hadhe.

² Sokkaasincho'ya alba'neenni ha'ranno gede soye, Kana"aanoota, Amooraawoota, Hitoota, Ferizoota, Hiwootanna Iyaabuusoota shorre huneemmo.

³ Adonna malawu lolakkanno gobba hadhe. Kayinnilla, ki'ne mokkookku wodanire ikkitinoonni daafira doogote aana gudeemmo'nekki gede, ani ledo'ne diha'reemmo» yii.

^4-5 Kaaliiqi qole Musera, « ‹Ki'ne mokkookku wodanire ikkitinoonnihura, mitte hige fulummoro ki'ne gudeemmo; hanni xa asseemmore malammo geeshsha seesu uduunne'ne baala fushshe› yiino yite mannaho kulinsa» yii. Mannuno konne dadillisanno coye macciishshe wi'li; hatte yannanni kayise mittono seesu uduunne aanaho diwodhino.

⁶ Kunnira, Siina Ilaalinni ka'e hadhunkunni kayisse Israeele seesu uduunne aanaho diwodhitino.

XAADU DUKKANA

⁷ Muse dukkana qachu giddonni xeertise qase, «Xaadu Dukkanaati» yii. Kaaliiqi ledo xaadara hasi'rannohu baalu hakkiira maranno.

⁸ Muse Xaadu Dukkaniwa maranno yannara, mannu baalunku kae uurranno; mittu mittunku Muse mare ea geeshsha dukkanisi xullichira uurre agaranno.

⁹ Muse Dukkanu giddora eanno yannara gomichu heelliicho dirrite, Dukkanu xullichira uurritanno; Kaaliiqino gomichu giddo hee're Muse ledo hasaawanno.

¹⁰ Mannu baalunku xullichi xullichisira hee're, gomichu heelliicho Dukkanu xullichira afanno yannara, kae uurre umo heeshshi yee kumbuuli.

¹¹ Kaaliiqi jaalu ledo hasaambannihu gede ikke alba Musewa hige hasaawanno; hakkunni gedensaanni Muse galagale qacha higanno; wedellichu kaa'laanchisi Newe beetti Iyyaasu kayinni Dukkanu mulinni difafanno.

KAALIIQI MANNUWIINNI BAXXANNOKKI GEDE UYINO HEXXO

¹² Muse Kaaliiqa, «Ati konne manna haa're fushsheemmo gede hajajoottoe; ledo'ya soyattohu ayetiro kayinni dikuloottoe; egennoottoetanna baxattoeta kuloottoe.

¹³ Baxattoeha ikkiro, hedoottori maatiro kulie; konne mannano ateha assite doodhoottota qaagi» yii.

¹⁴ Kaaliiqino, «Ani ledokki ha'reemmo; qeelleno eemmohe» yiisi.

¹⁵ Museno, «Ati ledonke fulattokkiha ikkiro ninkeno kawiinni fushshitootinke.

¹⁶ Ledonke fulattokkiha ikkiro, anenna mannakki baxattota mayinni anfanni? Ninke baattote aana hee'ranno manniwiinni addire ikkinoommohu diati ledonke nootto daafiraati?» yii.

¹⁷ Kaaliiqino Musera, «Seekke egennoommohe daafiranna baxeemmohe daafira yoottore asseemmo» yiisi.

¹⁸ Muse Kaaliiqa, «Maahoyye hakkawoteetiro, ayirrinyikki gaamaarre leellishie» yii.

¹⁹ Kaaliiqino, «Danchumma'ya leellisheemmoheta gaamaarreyya albakkiinni qole sayiseemmo; qullaawa su'ma'yano kuleemmohe; marareemmoha marareemmo; maareemmohano maareemmo.

²⁰ Kayinnilla mannu ane alba lae gatannokki daafira, alba'ya dileellisheemmohe.

²¹ Kune ane mule kaxxite uurratto kinchi noona,

²² ayirrinyi'ya gaamaarre albakkiinni sa'anno woyite, dadhamino kinchi giddo woreemmohe; sa"ammo geeshsha anga'yanni goleemmohe.

²³ Anga'ya hoolummohu gedensaanni, alba'ya ikkikkinni badhe'ya la"atto» yiisi.