FULO 26 - Qullaawa Maxaafa

KAALIIQI GALANNO DUKKANA SEEKKINANNI GARA

¹ «Ani galeemmowano fila heqonni gannoonnita bule, xiillittenna duume heqonni 10 dukko seekki; aanaho kirubeeli misilla goonde seekkinona.

² Mitte mittenti dukko mimmito roortukkinni godowa 28 cigilenna hojja 4 cigile ikkitona.

³ Onte onte dukko mimmitunniwa xaadinse gombona.

⁴ Onte ontente xaadinsoonni dukko hunda bule heqonni seekkinoonni ilo wori.

⁵ Mittu widiidi dukkora 50 ilo wori; layinkiterano 50 ilo wori; ilo baalanti mimmitoho badhe wodhitona.

⁶ Lamunku widiidi dukko xaadissannota 50 culku qarabba seekki. Kunni garinni xaadinseenna dukkana ikkanno.

⁷ «Dukkana gollannita 11 dukko meu ordanni seekki.

⁸ Mitte mittente dukko hojja 4 cigile, godowa 4 cigile ikkitona; baalunku qooli mimmitu ledo taalo ikkona.

⁹ Onte dukko mitto widoonni, 6 dukko mitto widoonni worte gowi; leelki dukko erte dukkanaho albaanni ledde diwi.

¹⁰ Mittu widiidi dukko qaccennitera hundaho 50 ilo wori; layinki widiidi qacceterano hundaho 50 ilo wori.

¹¹ Ontawu camote qarabba seekkite, ilote giddoonni qolte sayisi; lamenka widiido xaadisse mitto ikkanno gede assi.

¹² Dukkanu dukkowiinni gatinohu daratu, dukkanaho badheenni rarra"anno gede assi.

¹³ Dukkana dibbanno dukko lamunku widiidita hojja mitte mitte cigile assineenna ka'aanna kawaanni rarra'ona.

¹⁴ «Dukkanaho aanaanni duumo ge'rechu goganna cuukkinoonni goga diwi.

¹⁵ «Dukkanu waalchuwano waaccote haqqinni seekki.

¹⁶ Mittu mittunku waalchi hojja 10 cigile, godowa 1 cigilenna darate ikkona.

¹⁷ Taale uurranno gede mittu mittunku waalchira 2 qari hee'rosina. Baalunku waalchira hatto assi.

¹⁸ Dukkanaho wodiidi widoonni 20 waalcho seekki.

¹⁹ Lemuunku waalchira woroonni 40 birru lekkuwa seekki; mittu mittunku waalchira woroonni xaadissannota 2 lekka wori.

²⁰ Dukkanaho layinki widoonni aliyye ragaanni 20 waalcho seekki;

²¹ insarano 40 birru lekkuwa heedhonsana; mittu mittunku waalchira lame lame lekka heedhonsana.

²² Dukkanaho badheenni galchimi ragaanni 6 waalcho wori.

²³ Dukkanaho lamente maddera badheenni 2 waalcho wori.

²⁴ Tini maddete waalchuwa hundunni kayisse, umu geeshsha xaaddanno gede assi. 2 madde kalaqinohu lamunku waalchi mittu garinni seekkamona.

²⁵ Tonaa lee birru lekkuwa worroonnihu 8 waalchi hee'rona; mittu mittunku waalchira lame lame lekkuwa heedhona.

^26-27 «Dukkanaho mitto widoonni noo waalchuwara 5 waawanna, layinki widoonni noo waalchuwara 5 waawanna, badheenni galchimi ragaanni noo waalchuwara 5 waawanna waaccote haqqinni seekki.

²⁸ Mereeri waawanchi waalchuwate giddoonni hige dukkanaho qaccetenni qaccete geeshsha iillona.

²⁹ Waalchuwate culka xalli; waawanna worranni kassa culkunni seekki; waawannateno culka xalli.

³⁰ Dukkanano ilaalu aana leellishummohe gede assite qasi.

³¹ «Qullaawu Holgi dukko seekkine suqqinoonnitenni bule, xiillittenna duume shalonni seekki. Kirubeeli misillano goonde seekkinanni gede assite,

³² culka xallinoonnitera waaccote tuuqqara suti; qarabbansano culkunnita, shoolenti lekkuwansano birrunni seekkinoonnita ikkitona.

³³ Dukkono qarabbate aana rarra'ona; Gondooru Taabootano dukkote giddora eessi; dukkono Qullaawa Darganna Qullaawa Holge baddannota ikkitona.

³⁴ Maarote barcimano Gondooru Taabooti aana Qullaawa Holge wori.

³⁵ Xarapheezza Qullaawu Dargira aliyyeenni, caabbicho worrannihano Qullaawa Darga wodiidi ragaanni wori.

³⁶ Dukkanu xullichirano seekkine suqqinoonnitenni bule, xiillittenna duume shalonni seesiinse seekkinoonni dukko wori.

³⁷ Dukkoteno 5 waaccote tuuqqa seekkite aanaho culka xalli; qarabbansano culkunni seekkinona; tuuqqateno 5 lekka camotenni seekki.