FULO 25 - Qullaawa Maxaafa

QULLAAWU DUKKANIRA YINE UYINANNI AFANSHA

¹ Kaaliiqi Musera,

² «Afansha abbannoe gede Israeelete mannira kuli; baxe aannohu baalu anganni afansha haa'ri.

³ Haa'ratto afanshino: Culka, birra, camo,

⁴ bule, xiillittenna duume shalo, seesallitte uddano, meu ordanni gannoonni imaana,

⁵ duumo ge'rechu goga, cuukkinoonni goga, waaccote haqqa,

⁶ caabbichu zayite, buudhinanni zayiteranna hixaanaho worrannita su'niitanno qimame,

⁷ dilqa kincho, gagasu uddanonna gagasu kiise aana worranni shuraati.

⁸ Ledonsa hee'reemmo gede qullaawa dukkana qassoena.

⁹ Dukkananna giddo uduunne ani kuleemmohe garinni seekkisiisi.

GONDOORU TAABOOTA

¹⁰ «Taaboota waaccote haqqinni seekkinona; seendille 2 cigilenna darate, baqo 1 cigilenna darate, hojjano 1 cigilenna darate ikkona.

¹¹ Giddoonninna gobbaanni fila culka xallite aanaannino culku xiyyo seekki.

¹² Shoole culku kasa seekkite, shoolente lekkara wori; lamenka widoonni lame lame kasa wori.

¹³ Taaboota dunkanni dawaayye waaccote haqqinni seekkite aanaho culka xalli.

¹⁴ Taaboota dunkanni dawaayye midaadoho noo kassa giddoonni qolte sayisi.

¹⁵ Dawaayyu taabootu kassa giddo hee'rona; giddonni horonta fultoonke.

¹⁶ Eemmoheta tonnenta hajajo borreessinoonnita lamenta bocame kinna Taabootu giddo woratto.

¹⁷ Seendille 2 cigilenna darate, baqo 1 cigilenna darate ikkino tuana filu culkinni seekki; konne maarote barcimaati yinanni.

¹⁸ Daashshinoonni culkinni 2 kirubeeli misilla seekkite, maarote barcimira lamenka widoonni wori.

¹⁹ Maarote barcimi ledo mitteenni, 1 misile mitto widoonni, layinki misile wole widoonni worte seekki.

²⁰ Tini misilla qoollansa ale qolte diriirsite, maarote barcima goltanno gede assi; albano mimmitu widira higgona; misillano alba maarote barcimi widira higgona.

²¹ Maarote barcima taabootu aana wori; ani eemmoheta 2 bocame kinna aana borreessinoonnita tonnenta hajajono taabootu giddo wori.

²² Hakkiicho ani atera leelleemmohe; Gondooru Taabooti aana noo misilla mereero hee're Israeelete mannira kulatto hajajo baala eemmohe.»

KAALIIQIRA SHIQINSHANNIHA TIMU FUSHSHAATE WORRANNI XARAPHEEZZA

²³ «Seendille 2 cigile, baqo 1 cigile, hojja 1 cigilenna darate ikkanno xarapheezza waaccote haqqenni seekki.

²⁴ Aanaho fila culka xallite, qaccuwate culku xiyyo wori;

²⁵ xiyyote qaccera seendille 1 qubbicho ikkitannota culku gooro wori; goorote qaccerano xiyyo wori.

²⁶ Shoole culku kasa wori; kassano shoolente maddera noo lekkuwara wori.

²⁷ Xarapheezza dunkanni dawaayye worranni gede, kassa goorote mule heedhona.

²⁸ Xarapheezza dunkanni dawaayye waaccotenni seekkite, aanaho culka xalli.

²⁹ Maaqquwanna tuanna, agattote fushshaate worranni xiltuwanna finiinna filu culkinni seekkite wori.

³⁰ Anera shiqinshanni timi wo'manka woyite xarapheezzu aana hoogoonke.

CAABBICHO WORRANNI UDUUNNICHO

³¹ «Caabbicho worranni uduunnicho filu culkinni seekki; caabbicho worranni uduunnichira lekkasinna daabbasi daashshinoonni culkinni seekki. Seesu daraarcho, guntuwasinna qoolasi ledo mitteenni seekkinona.

³² Caabbichu daabbi aana lamenka widoonni sase sase caabbiyye worranni sinna heedhona.

³³ Leente sinnara mitte mittentera guntuwunna qoolisi ledo sase sase kookete daraaro lawannori hee'ronsana.

³⁴ Daabbu aana, seesunniha 4 kookete daraaro lawannore guntubbatenna qoollate ledo wori.

³⁵ Sinna daabbu ledo xaaddinowa, mittu mittu guntuwi hee'rona.

³⁶ Guntuwanna sinna daabbunku ledo mitteenni filu daashshinoonni culkinni seekkinona.

³⁷ Lamalanta caabbiyye qixxeessite albiido xawissanno gede wori.

³⁸ Qarawanna baccicho filu culkinni seekki.

³⁹ Caabbicho worrannihanna ledosi uduunne baala, 35 kiilo culkinni seekkinona.

⁴⁰ Ilaalu aana leellishummohe garinni xiinxallite seekki.