FULO 23 - Qullaawa Maxaafa

HALAALAANCHO YOO

¹ «Kaphu odoo dudubbooti; afoottokkire coyidhe bunshe loosannoha keereensitooti.

² Bunshe loosannoha woy halaale dawisanno manni batinye la'e hoodensa hadhooti.

³ Buximasi daafira yite buxichoho golante coyidhooti.

⁴ «Baarigaarikki booto woy harricho bainoha afittoro massite uyisi.

⁵ Giwannohe manchira harrichu hogowunku uwe nooha affe agurte sa'ootina kaa'lite kayisisi.

⁶ «Yoote darga buxichu coye dawissooti.

⁷ Beebba coyidhooti; ani busha loosannoha dikeereenseemmona, keeraancho mancho beebbatenni shitooti.

⁸ Yoo yaanno manchira ille ballisse, keeraanchu qarramanno gede assitannona gubbo ittooti.

⁹ Ki'neno Gibitsete gobbara manni gobba manna ikkitine heedhinoonni daafira, qarrammanni gara affinoonnina, manni gobba manna gadadissinoonte.

LAMALKI DIRONNA LAMALKI BARRA

¹⁰ «Lee diro baatto'ne loosidhine gide gamba assidhe.

¹¹ Lamalki diro kayinni baatto fooliishshidhona gashshe. Hakko diro baattote aana fulinore buxane ittona gamba assidhinoonte; insawiinni gatinohano dubbu moyichi itona agurre. Ejedhe'nenna woyinete laalo'neno hattonni assitine agurre.

¹² Lee barra looso'ne loosidhe; handi'nenna harrichi'ne fooliishshi'ranno gede, borojji'neranna giddo'ne hee'rannohura manni gobba mannirano fooliishsho ikkanno gede lamalki barra fooliishshidhe.

¹³ Yoommo'nere baala seekkitine agadhe; wole maganna huuccidhinoonte; su'mansano ga'nitinoonte.

SASE JAJJABBA AYYAANNA

¹⁴ «Ane ayirrissinanniti dirunni 3 ayyaanna heedho'ne.

¹⁵ Ani hajajoommo'ne garinni, Gibitsetenni fultinihura Abiibi yinanni aganira yinoonni barrinni Timu Ayyaana ayirrisse. Kunni ayyaaninni 7 barra shiishinokki tima ittinanni. Ane magansi'rate shiqqinanni yannara mulla anganni dagginoonte.

¹⁶ Gide gamba assidhinanni yannara, umiha aatenni Gide Gamba Assi'rate Ayyaana ayirrisse. «Diru goofimarchira laalo gamba assidhinanni yannara, Daasu Ayyaana ayirrisse.

¹⁷ «Dirunni 3 hige labballu baalunku Mootichu Kaaliiqi albira shiqona.

¹⁸ «Anera kakkaltinanni saada mundee ledo shiishino tima shiqishshinoonte. Tenne ayyaannara shiqinshanni coomino hashsha galoonke.

¹⁹ Diru dirunkunni jajji'neha umiha qara laalcho ane Kaaliiqi Magani'ne minira haadhine abbe. «Wilii'lichu maala amate adonni gaffinoonte.

UYINOONNI HEXXONNA BIDDISHSHA

²⁰ «Hadhinanna doogo towatanno'ne gedenna qixxeessoommo'ne dargirano haa're massanno'ne gede, sokkaasincho alba asse soyemmo'ne.

²¹ Ane su'minni daannoha ikkino daafira, yaanno'neta seekkitine macciishshe; isira gara gibbinoonte. Gara gibbiniro dimararanno'ne.

²² Isi yaanno gede ikkitinironna ane hajajo wonshitiniro, diini'nera diina ikkeemmo; gibbanno'nereno giweemmo.

²³ Sokkaasinchi'ya alba'neenni ha'ranni, Amooraawootu, Hitootu, Ferizootu, Kana"aanootu, Hiwootunna Iyaabuusootu gobba haa're massanno'ne; anino insa huneemmo.

²⁴ Magannansa magansidhinoonte; qoltineno soqqantinoontensa; loosinsarano karsantinoonte. Magannansa co'o assitine hunne. Magansidhannota sooddiyyensano hiiqqaqqe.

²⁵ Ane Magano'ne Kaaliiqa magansidhiniro, anino sagale'nenna waa'ne maassi'reemmo; dhibbano ki'newiinni hooleemmo.

²⁶ Gobba'ne meenti ilaweelo di"ikkanno; godowano dikisi'ranno; dirono seediseemmo'ne.

²⁷ «Qarrissanno'ne gosa balaxe waajjishiisheemmo; ki'ne ledo olantannore baala masiseemmo; diinna'ne baala badheegge xooqqanno gede asseemmo.

²⁸ Ki'nera balaxe alba qole harridiida soye, Hiwoota, Kana"aanootanna Hitoota albi'nenni shorreemmo.

²⁹ Ikkollana, baatto mulla ikkitanno daafiranna moyichu bati'ranno daafira, mittu dirinni hune digudeemmo.

³⁰ Ilantine batidhine baatto ragidhina geeshsha shiimu shiimunni fushshe gudeemmo.

³¹ Danna'neno Duumu Baarinni Mediteraaniyu Baari geeshsha, halallitte gobbanni kayise Efiraaxisi Wayi geeshsha iillisheemmo. Baattote aana noore baala anga'nera sayise eenna albi'nenni shorritine huntinanni.

³² Insanna magannansa ledo namoontinoonte.

³³ Magannansa magansidhineenna woshshaado ikkite ane aana sao assitinanni gede assitanno'nena, konne manna baatto'ne aananni hoo'le» yii.