FULO 21 - Qullaawa Maxaafa

BOROJJE ASSINE AMANDANNI GARA

¹ Kaaliiqi Musera, «Israeelete mannira kulattonsa seeri konneeti:

² Ibiraawicha ikkinoha borojjimmate hidhittoro, 6 diro soqqamohena; lamalki diro asalu nookkihu gede assite borojjimmatenni fushshisi.

³ Callichisi dayinoha ikkiro callichisi ha'rona; galtesi ledo dayinoha ikkiro kayinni iseno adhe ha'rona.

⁴ Galtesi mootichisi haa'rinosita ikkituronna oosono iltinosiha ikkiro, isenna oosose mootichisiwa gatteenna isi callichisi ha'rona.

⁵ Borojjichu kayinni, ‹Mooticha'ya ate, galte'yanna ooso'ya baxeemmo'ne daafira fule diha'reemmo› yiiro,

⁶ mootichisi magansi'nanniwa haa're masse, waalchunniwa shiqqi asse maccasi gontimunni qaseenna, lubbotenni noo geeshsha borojjichosi ikkona.

⁷ «Mittu manchi meya beettosi borojjimmate hiriro, labballu gede borojjimmatenni fultoonke.

⁸ Shiima yanna gedensaanni galte assi're hidhinoti, mootichase hagiirsiisa hoogguro kayinni, annise woxxosena; wole gobba mannira hira dihasiissanno. Hatto assiro eino sheemaati diigamanno.

⁹ Beettisira galte assi'rate hasi'riro kayinni, umisi beetto gede asse kiirosena.

¹⁰ Mittu manchi layinki galte adhiro, umitera sagale, imaananna galtimma xeisoonkese.

¹¹ Konne sasenka coye wonshannosekkiha ikkiro kayinni, asalu nookkite gede asse borojjimmatenni fushshosena.

BUNSHE ASSANNO MANNA QORICHISHATE WORROONNI SEERA

¹² «Manna gane shaanno mancho shinona.

¹³ Shaate hede ikkikkinni danotenni manna shiinohu, maaxantinara qixxeesseemmo dargira xooqona.

¹⁴ Kayinnilla egenne xagarrotenni manna shaannoha, xooqe kakkalo'ya dargira mariro nafa, hakkiinni fushshitine shiiyye.

¹⁵ «Annasi woy amasi ganannohano shinona.

¹⁶ «Manna moore hirannoha, woy hirara yee haa're minesi maaxi'rannoha shinona.

¹⁷ «Annasi woy amasi xonannohano shinona.

¹⁸ «Lamu manchi giwanteenna, ku'u ko'onne kinchunni woy tuntummotenni ganiro, ganaminohu kayinni reyikkinni gatiro, ganinoha shinoonke.

¹⁹ Ganame uttaawe goxinowiinni tirate bordunni irkisi're xawo fuliro, ganinosi manchi ganamasinni kainohunni xeinosire riqiwosina; jawaata geeshshano towatosina.

²⁰ «Labbaaha woy meya borojjichosi gane shaannoha qorichinshona.

²¹ Gannoonni manchi mittunna lamu barri giddo reya hoogiro kayinni qorichishamoonke; borojjichosi hooga umise isira qorichaho.

²² «Lamu manchi giwantanni heedhe, godowinni noo mancho affukkinni ganteenna umose ka'uro wole gawajjo kayinni iilla hooggusero, ganise manchi ayiddaannise ku'lannore oona; aannoreno geerru coyi'rona.

²³ Mancho gawajjantinoha ikkiro, lubbote darga shiinoha shinona.

²⁴ Ille huninoha ikkiro illesi hunnona; hinko hiiqqinoha ikkiro hinkosi hiiqqinona; anga hiiqqinoha ikkiro angasi hiiqqinona; lekka hiiqqinoha ikkiro lekkasi hiiqqinona.

²⁵ Giirinoha giirrona; madiissinoha madiissinona; ganinoha ganne qollona.

²⁶ «Borojjichisira woy borojjichosira ille gane huninohu, illete darga borojjimmatenni fushshe agurona.

²⁷ Borojjichisira woy borojjichosira hinko gane hiiqqinohu, hinkote darga borojjimmatenni fushshe agurona.

JAJJU AYIDDI ANNIMMA

²⁸ «Bootu manna qase shiiro, kinnatenni ganne shinona; maalasino intoonke. Bootu anna kayinni kinsoonke.

²⁹ Bootu albaanni qasannoha ikkinota anfe, ‹Hoo'li› yine kulleennanni, bootu anni kayinni afanni wore agureenna manna shiiro, booto kinnatenni ganne shinona; bootu annano shinona.

³⁰ Shii'rino ayiddi guma itara hasi'rannoha ikkiro kayinni, yinoonnisi geeshsha oona.

³¹ Bootu meya woy labbaa beetto qasiro, yoo mitto garaantilla.

³² Bootu labbaaha woy meya borojjicho qase shiiro, bootu anni borojjichu annira 30 kinchu birra oona. Booto kayinni kinnatenni ganne shinona.

³³ «Mittu manchi bale fane aguriro, woy bale ume tuikkinni agureenna bootu woy harrichu giddo uwiro,

³⁴ balete anni reyitu saada umisira gatisi're, annaho saadasi fushshitanno waaga oona.

³⁵ Mittu manchi booti wolunniha qase shiiro, lubbotenni noo booto hirte woxe taalo beeqqitona. Reyi booti maalano beeqqitona.

³⁶ Bootu albanni qasamannoha ikkinota anfoonniha ikkironna, bootu annino wore agurinoha ikkiro, qase shii booti anni reyi booto umisira gatisi're, lubbotenni nooha shii'rihura oosina.