FULO 20 - Qullaawa Maxaafa

TONNE HAJAJO

¹ Kaaliiqi kunnira woroonni noo qaale coyi'ri yannara,

² «Gibitsete gobbanni borojjimmate giddonni fushshummo'nehu Kaaliiqi Magani'ne aneeti.

³ «Ane agurranna wolu magani hee'roonke'ne.

⁴ «Gordohono ikko baattote, baattote woroonni wayi giddo noorichinnino ikkiro magansi'rate yitine ayee misileno seekkidhinoonte.

⁵ Kaphu magannara kumbuultinoonte; insano magansidhinoonte. Ani hinaasaancho Maganootina, gibbannoerira sasenna shoole ilama geeshsha annuwate cubbo oosote iillisheemmo.

⁶ Baxxannoerenna hajajo'ya ayirrissannore kayinni kume ilama geeshsha bagamannokki baxillinni baxeemmonsa.

⁷ «Ane Magani'ne Kaaliiqi su'ma doogimale kayissinoonte; doogimale su'ma'ya kayisannohu dikeeraawanno.

⁸ «Fooliishshote Barra wolu barriwiinni baddine qullaawa assitine ayirrisse.

⁹ Looso'ne baala 6 barrinni loosidhe;

¹⁰ lamalki barri kayinni, Magani'ne Kaaliiqira Fooliishshote Barraatina ki'ne, ooso'nenna seenni'ne, borojji'ne, saada'nenna, gobba'nera hee'rannohu wole gobba mannino kunni barrinni looso loosi'roonke.

¹¹ Ani 6 barrinni gordonna gobba, baaranna giddosi noore baala kalaqe lamalki barra fooliishshi'roommo; ani Kaaliiqi Fooliishshote Barra maassi'roommohunna qullaawa assoommohu kunni daafiraati.

¹² «Magani'ne Kaaliiqi aanno'ne baatto aana diri'ne seedanno gede anna'nenna ama'ne ayirrisse.

¹³ «Shitinoonte;

¹⁴ «Foortinoonte;

¹⁵ «Moortinoonte;

¹⁶ «Kaphunni naqqassinoonte;

¹⁷ «Wolu manchi mine yortinoonte; galtesi, borojjesi, handosinna harrichosi woy wolu afi'rinore mittoreno yortinoonte» yii.

MANNU MAGANUNNIWA SHIQQI YAA WAAJJI

¹⁸ Mannu baalunku beleqonna banqo, buudu xurumbi luulonna ilaalu wiliilanna afe waajje huxi'ranni fafe uurre,

¹⁹ Musera, «Maganu coyi'riro reyineemmona, isi coyi'roonkenke; ninke macciishshineemmona ati coyi'rinke» yii.

²⁰ Museno mannaho, «Kaaliiqi iso ayirrissine cubbo loossinannikki gede assa'neralla dayinona waajjitinoonte» yii.

²¹ Mannu fafe uurre hee'reenna, Muse Kaaliiqi noowa kolishshu gomichiwa shiqqi yii.

KAKKALLANNI DARGI DAAFIRA UYINOONNI SEERA

²² Kaaliiqi Muse, «Israeelete mannira, ‹Ani Kaaliiqi gordoho hee're coyi'roommo'neta affinoonni.

²³ Ane agurranna wole maganna heedhoonke; birrunninna culkunni seekkinoonnita kaphu maganna magansidhinoonte.

²⁴ Anera kakkalote darga bushshunni seekke"e; shilqonnitanna mittimmate kakkalo boottannitanna ge'reewunnita hakkiicho kakkalle"e; su'mi'ya qaagamanno gede hedoommo darga baalaho daye maassi'reemmo'ne.

²⁵ Kakkallanni darga kinchunni seekkitinara hasidhiniro boccinoonte; siwiilunni kissiniro lagaawanno daafira, kakkalote dargira di"ikkanno.

²⁶ Hakkiira fultinanni woyite teedi'ne leellannona, kakkallanni dargira dirima seekkitinoonte› yiino yite kulinsa» yee hajajisi.