FULO 13 - Qullaawa Maxaafa

KAALIIQI ISRAEELE UMIHA BAALANKA ISIRA UYITANNOSI GEDE HAJAJI

¹ Kaaliiqi Muse,

² «Israeelete manni giddonni umo ilaminohunna saadate giddonnino umo qalaminohu baalu aneha ikkanno gede badie» yiisi.

TIMU AYYAANA AYIRRISATE UYINOONNI SEERA

³ Muse mannaho, «Kaaliiqi wolqasinni Gibitsete gobbanni borojjimmatenni gatise fushshino'ne barri konneetina habbinoonte. Kunni barrinni shiishino tima ittinoote.

⁴ Ki'ne kunni barrinni diroho umi agani Abiibi yinannihunni Gibitse agurtine fultinanni heedhinoonni.

⁵ Kana"aanootunnita, Hitootunnita, Amooraawootunnita, Hiwootunnitanna, Iyaabuusootu baatto ragisiisanno'ne gede Kaaliiqi akaakka'nera xaarino; tenne malawunna ado wo'mitino baatto haa're massanno'ne yannara, diru dirunkunni umi aganira konne ayyaana ayirrissinanni.

⁶ Lamala barra wo'ma shiishinokki tima ittinanni; lamalki barra Kaaliiqi ayyaana ayirrissinanni.

⁷ Lamalu barri geeshsha shiishino tima kisidhinoonte; shiishshino sagaleno gobba'nera heedhoonke.

⁸ Ayyaana ayirrissinanni yanna baalantera, togo assitinannihu Kaaliiqi Gibitsetenni fultini waro assino'ne danchumma qaagate ikkinota ooso'nera kullensa.

⁹ Kuni ayyaanino, anga'nera usudhitinoonnihunna albi'nera wodhitinoonni malaati gede ikko'ne; Kaaliiqi Gibitsete gobbanni jawa wolqasinni fushshino'ne daafira, seerisi wo'manka woyite afii'nenni fafikkinni marro higgine buuxxinanni gede qaagiissanno'ne.

¹⁰ Kunni daafira, diru dirunkunni tenne yannara konne ayyaana ayirrisse.»

UMO ILAMINOHUNNA UMO QALAMINOHU KAALIIQIHO

¹¹ «Kaaliiqi ki'neranna annuwa'nera uyino'ne hexxo garinni Kana"aanootu gobba haa're masse, baattonsa ragisiisanno'ne yannara,

¹² bayira beetto Kaaliiqira uyitinanni; saada'neti umi qallono Kaaliiqita ikkitanno.

¹³ Harrete qallo ikkituro, gocunni woxxitinanni; woxxitinannikkiha ikkiro kayinni haxo hiiqqe. Labbaaha bayira beetto baala woxxe.

¹⁴ Kunni ka'a ooso'ne, ‹Konne mayira assinanni?› yite xa'mitu'nero, ‹Gibitsete gobbara borojjimmatenni hee'neemmore Kaaliiqi jawa wolqasinni fushshinonke.

¹⁵ Gibitsete moote wodanasi dilleesse agura giwinke yannara, Kaaliiqi Gibitsennita umi ilanna umi qallo baala shee gudino; umi qallo kakkalleemmohu kunniraati; bayirraadda labballi oosonke kayinni woxxineemmo.

¹⁶ Tini wogano angankera usudhinoommohunna albinkera wodhinoommo malaati gede qaagiissitannonke; Kaaliiqi jawaata angasinni Gibitsete gobbanni fushshinonketa qaagiissitannonke› yitine kullensa» yii.

GOMICHUNNITANNA GIIRATE HEELLIICHO

¹⁷ Gibitsete moote Israeele hadhara aguri yannara, Filisxeemete gobba widoonni hige ha'ra mulimma roorte heedheennanni, hakkaanni higge hadhanno gede diassinonsa. Hakkaanni higge hadhannokki gede hoolinonsahu, albaanni noo diininni xaadduro waajjite galagalte Gibitse higganno yeeti.

¹⁸ Kunni daafira, Duumu Baari widoonni halallitte gobba giddoonni qole haa're ha'rinsa; Israeeleno olaho qixxaawinohu gede ikkite Gibitsetenni fultu.

¹⁹ Israeele Yooseefi miqqa agurte hadhannokki gede xaartino garinni, Muse Yooseefi miqqa haa're ha'ri. Togo assinohu Yooseefi, «Kaaliiqi gatise fushshanno'ne waro miqqa'ya tenne gobbanni haadhine fushshe» yiino daafiraati.

²⁰ Israeele Sukootinni ka'e halalli qaccera Etaami yinanniwa marte baxxisidhu.

²¹ Hashshanna barra hadhanno gede, Kaaliiqi barra gumichu heelliichonni, hashsha giirate heelliichonni massaginsa.

²² Kunni garinni gomichu heelliicho barra, giirate heelliicho hashsha wo'manka woyite albansaanni hadhu.