FULO 11 - Qullaawa Maxaafa

GIBITSOOTUNNIHU UMI UMIRICHI REYI

¹ Hakkunni gedensaanni Kaaliiqi Musera, «Feriooniranna mannisira mitto qoomama lede soyemmo; hakkunni gedensaanni hadhinanni gede aguranno'ne; aguranno'ne woyite, mittuno gattinikkinni shorre ha'risanno'ne.

² Israeelete manni labbaahuno meyatino ollaansa ikkitino Gibitsootiwiinni culkunna birru irra huuccidhe adhitanno gede xaanni kulinsa» yiisi.

³ Kaaliiqi, Israeelete Gibitsootu albaanni gaacheena uyinsa; Feriooni ledo gashshaanonna mannu baalu, Museno ayirrisisi.

⁴ Muse Ferioonira, «Kaaliiqi, ‹Hashshu mereero Gibitsete baattora ha'rameemmo.

⁵ Mootimma ragi'rannohu Feriooni beettinni kayise, woroonni noo borojjicho iltino beetti geeshsha, Gibitsete baattora umo ilaminohu baalu reyanno; saadanniti umi qallono reyitanno.

⁶ Gibitsete baatto baalate ikkite egentinokkitinna kunni ka'ano ikkitannokkiti wolqaataame wi'la kalaqantanno.

⁷ Israeeletenna saadansa mereero kayinni kashshi yaannori nafa dihee'ranno. Hatte yannara ani Israeeletenna Gibitsete mereero badooshshe woroommota affinanni› yiino» yee kulisi.

⁸ Museno, «Ledokki gashshaano baalu dagge woxarattannoe; manna'ya adhe ha'reemmo gede huuccidhannoe; hakkunni gedensaanni ha'reemmo» yee hasaawasi gudi; tenne coyi'rihu gedensaanni, lowo geeshsha hanqe Feriooni albinni fule ha'ri.

⁹ Kaaliiqi balaxe Musera, «Feriooni ki'ne yitinoonnita dimacciishshanno; macciishsha giwannohuno, Gibitsete gobbara asseemmoti lowo maalale gatte noo daafiraati» yee kulinosi.

¹⁰ Musenna Aarooni tenne maalale baala Feriooni albaanni assitu; kayinnilla, Kaaliiqi Feriooni wodana dilleessino daafira Israeele gobbasinni fultara diagurino.