FAARSO ROORE FAARSO 8 - Qullaawa Maxaafa

¹ Ati, ama'ya unuuna qane lophinohu, rodii'ya gedeeha ikkattoehu baino! Hatto ikkoommero, doogote afi're sunqeennahe, ayino dimishannoe.

² Ama'ya minira massi'reennahe, baxillu gara rosiisattoehu baino. Roomaanete laalonni coomminshoonnita, fila woyinete xajje hayikkisi'reemmahehu gatino.

³ Guracho angasi barkisannoe; qiniitichotenni hanqafannoe.

⁴ Ki'ne Yerusaalamete seenne! Baxillu umisi hasi'ra geeshsha, kayissinannikki gedenna, baqqi assitinannikki gede eegameemma'ne.

LEELKI FAARSO IDAYICHOTE JAALLA

⁵ Baxillaanchose irkidhe, halallinni daggannoti tini ayeti? Bi're amakki gamaa'mite iltuhewa, laalanno haqqichi hunda goxxe noottoha, baqqi asse kayisoommahe.

ADHANTANNO BEETTO

⁶ Hegere baxillinni wodanikki giddo qa'misie; angakkira maatamu gede ane calla amadie. Baxillu reyote gedee jawaataati; hinaasuno waammate gedee kaajjadooti; baxillu giirate gede buwanno; baxillu Kaaliiqi buwanooti.

⁷ Wayi batinyi baxillu giira xoyissa didandaanno; lolahuno fee haa're ha'ra didandaanno. Noosi jiro baalantenni baxille hidhara hasi'rannohu hee'riro, baxille woxunni anfannikki daafira, hakkonne mancho mannu arrassannosi.

ADHANTANNO BEETTO RODUUWA

⁸ Unuunu leellinokkiti shiima rodoo noonke; adhannohu xa'mi'riro, rodoonke hiissineemmo?

⁹ Ise huxxa ikkitoommero, birru shae seekkineemmosehu baino. Huxxu waalcho ikkitoommero, Libaanoosi haqqenni cufana seekkineemmosehu baino.

ADHANTANNO BEETTO

¹⁰ Kuneeti ani huxxaho; guntuti'yano huxxu shae gedeeho. Baxillaanchi'ya ledo hee'rummaro, hagiirrenna keere afi'reemma.

ADHANTANNO BEETTO JAALLA

¹¹ Selemoonira Ba"aali-Hamooni yinanniwa, woyinete dargi noosi; woyinete dargano loossannorira kiraho uyino; mittu mittunku 1,000 kinchu birra abbitannosi.

ADHANTANNO BEETTO

¹² Woyinete dargi ane umi'yaho; Selemooni'ya, ati 1,000 kinchu birra gatisidhe, loosaasinete 200 kinchu birra uyi.

ADHANNO BEETTO

¹³ Baxillaancho'ya, kaashshu giddo heedheenna, jaalla'ya huurokki macciishsha hasidhinona, hanni anerano huurokki leellishie.

ADHANTANNO BEETTO

¹⁴ Baxillaancho'ya, rakke anewa amo; su'niitanno haqqe fultanno ilaalla aana, kukkubbanno geedimo woy aja gaarraancho lawi.